Colosas 3:23—“Bisag Unsay Inyong Buhaton, Buhata ni sa Tibuok Kasingkasing”

“Bisan unsay inyong ginabuhat, buhata kini nga tibuok kalag nga samag para kang Jehova, ug dili para sa mga tawo.”—Colosas 3:23, Bag-ong Kalibotang Hubad.

“Bisag unsay inyong buhaton, buhata ni sa tibuok kasingkasing, alang sa Ginoo, dili sa mga tawo.”—Colosas 3:23, Biblia sa Kristohanong Katilingban.

Kahulogan sa Colosas 3:23

Ang usa ka Kristohanon kinahanglang maningkamot nga mahimong kugihan kay ang iyang tinamdan sa pagtrabaho konektado sa iyang pagsimba kang Jehova nga Diyos.

“Bisan unsay inyong ginabuhat.” Kadtong gustong mosimba kang Jehova maningkamot sa pagsunod sa giingon sa Bibliya diha sa tanan nilang himoon. Maningkamot sila nga mahimong kugihan, matinud-anon, ug kasaligan sa ilang adlaw-adlawng kalihokan diha sa balay, trabahoan, ug eskuwelahan.—Proverbio 11:13; Roma 12:11; Hebreohanon 13:18.

“Buhata ni sa tibuok kasingkasing.” Ang prase nga “sa tibuok kasingkasing” gihubad gikan sa Gregong ekspresyon nga “nagtumong sa determinasyon sa usa ka tawo nga buhaton ang kabubut-on sa Diyos sa tibuok niyang kusog.” a

Busa gamiton sa maong tawo ang tanan niyang kusog ug mental nga katakos aron mahatag ang iyang kinamaayohan sa paghimo sa usa ka buluhaton. Ang ubang hubad sa Bibliya naghubad niini ingong “bug-os kasingkasing” (Ang Biblia, Bag-ong Hubad Nga Binisaya) o “kinasingkasing” (Maayong Balita Biblia).—Tan-awa ang “Colosas 3:23 sa Ubang Hubad.”

“Para kang Jehova, ug dili para sa mga tawo.” Seryosohon sa mga Kristohanon ang bisan unsa nga ilang ginabuhat kay nahibalo sila nga naa ni epekto sa ilang relasyon kang Jehova nga Diyos. Ilabinang importante nila nga mapalipay ang Diyos, dili ang ilang amo o laing tawo. Kon ang usa ka Kristohanon kugihan ug positibo, ang mga tawo modayeg niya ug sa Diyos nga iyang gisimba. Tungod niini, ang usa ka Kristohanon maningkamot “aron ang ngalan sa Diyos . . . dili gayod mapasipalahan.”—1 Timoteo 6:1; Colosas 3:22.

Konteksto sa Colosas 3:23

Ang basahon sa Bibliya nga Colosas gisulat ni apostol Pablo ngadto sa mga Kristohanon sa karaang siyudad sa Colosas.b Lagmit iya ning gisulat sa hapit nang matapos ang iyang unang pagkabilanggo sa Roma, mga 60-61 C.E.

Ang Colosas naay tambag nga makatabang sa mga Kristohanon sa pagsimba sa Diyos nga nagkahiusa bisag lainlain silag kagikan ug sirkumstansiya. (Colosas 3:11) Kini nagdasig nila nga sundogon ang mga hiyas sa Diyos, sama sa gugma, pagkamaayo, ug kaluoy. (Colosas 3:12-14) Gihisgotan sab niini kon sa unsang paagi ang pagsimba sa Diyos angayng makaapektar sa tanang bahin sa kinabuhi sa usa ka tawo.—Colosas 3:18–4:1.

Colosas 3:23 sa Ubang Hubad

“Bisan unsay inyong buhaton, buhata kini uban sa bug-os ninyong kasingkasing ingon nga nagtrabaho kamo alang sa Ginoo, ug dili alang sa mga tawo.”—Ang Biblia, Bag-ong Hubad Nga Binisaya.

“Bisan unsay inyong buhaton, buhata kini sa kinasingkasing sama nga inyo kining gibuhat alang sa Ginoo ug dili alang sa mga tawo.”—Maayong Balita Biblia.

Tan-awa kining mubo nga video nga nagsumaryo sa basahon sa Colosas.