DEMAS

[lagmit pinamubo sa “Demetrio,” nga nagkahulogang “Kang (Iya ni) Demeter”].

Usa kanhi ka isigkamagbubuhat ni apostol Pablo. Si Demas didto sa Roma kauban sa apostol sa panahon sa iyang unang pagkabilanggo didto, sanglit ang iyang mga pangomosta gilakip diha sa mga sulat ngadto sa mga taga-Colosas ug kang Filemon. (Col 4:14; Flm 24) Sa dihang si Pablo misulat kang Timoteo sa panahon sa iyang ikaduhang pagkabilanggo, si Demas mibiya sa apostol ug miadto sa Tesalonica, lagmit sa iyang kaugalingong lungsod.​—2Ti 4:10.

Wala ibutyag ang tinuod nga hinungdan kon nganong si Demas mibiya kang Pablo ‘tungod sa iyang gugma niining sistema sa mga butang.’ Wala mosulti ang apostol kon si Demas nahimo bang apostata o magsusupak. Lagmit ang gugma ni Demas sa materyal nga mga butang ug sa kalibotanong mga kalingawan nahimong mas kusganon kay sa espirituwal nga mga butang. Tungod sa kahadlok nga basin siya patyon ingong martir uban kang Pablo, si Demas nangitag mas luwas nga dapit aron mapanalipdan ang iyang kinabuhi gikan niadtong sistemaha sa mga butang. Unsa man ugaling ang hinungdan, sa dihang wala moayo ang kahimtang, si Demas napakyas sa paggamit sa iyang talagsaong kahigayonan sa pagpalig-on sa iyang igsoong si Pablo.