Ang Gubat nga Magtapos sa mga Gubat
ANG dako kaayong German zeppelin mihagyong latas sa langit sa kagabhion. Kadto nagpauli gikan sa usa ka pag-atake sa London, ug sa pag-agi sa usa ka balangay sa Essex, gihulog ang mga bomba. Usa niadto nakapatay sa usa ka nars nga nagbakasyon gikan sa gubat sa Pransiya.
Kadto gamay lang nga hitabo sa Gubat sa Kalibotan I, apan kadto dako kaayog kahulogan. Kadto usa ka panig-ingnan sa unsang paagi ang ika-20ng siglo, halayo sa pagpasulod sa usa ka panahon dihang ang tawo ‘dili na makakat-on ug gubat,’ nakakita sa dako kaayong pag-uswag sa mga hinagiban ug sa mga natad sa panggubatan. (Isaias 2:2-4) Sulod sa libolibong katuigan, gibugno ang mga gubat sa mamala ug sa ibabaw sa dagat. Apan sa Gubat sa Kalibotan I, ang away mikuyanap ngadto sa atmospera ug sa ilalom sa dagat. Ingong resulta, nangamatay sa mga bomba ang mga sibilyan, ug daghang barko giunlod ngadto sa kahiladman sa dagat pinaagi sa dili-makitang mga submarino.
Sa pagkamatuod, panahon niadtong unang makalilisang nga gubat sa kalibotan, 8 milyong sundalo ang namatay sa pakig-away, ug ang gibanabanang 12 milyong sibilyan ang namatay gumikan sa mga hinungdan nga nag-apil sa kagutom ug pagkaladlad sa daotang panahon. “Ang trahedya sa Dakong Gubat [Gubat sa Kalibotan I],” sumala sa historyanong si H. A. L. Fisher, “mao nga kadto gibugno tali sa sibilisado kaayong mga katawhan sa Uropa mahitungod sa usa ka isyu nga ang pila ka masinabotong mga tawo dali untang makahusay.” Sa pagkamatarong sa mangilngig nga pagpatyanay, kadto gitawag “gubat nga magtapos sa mga gubat.” Apan kanang mga pulonga sa taudtaod nahimong walay kahulogan.
Usa ka Organisasyon Alang sa Kalinaw
Sa dihang gipahayag ang kalinaw niadtong 1918, ang nayugot nga kaliwatan nangayo nga himoon ang mga lakang sa pagtino nga ang ingong gubat dili na gayod mahitabo pag-usab. Busa, ang Liga sa Kanasoran natawo niadtong 1919. Apan ang Liga maoy usa ka dakong kapakyasan. Sa 1939 ang kalibotan nahibalhog na usab sa gubat sa kalibotan—usa ka gubat nga labi pang daotan kay sa una.
Sa Gubat sa Kalibotan II, daghang siyudad ang nagun-ob, nga naghimo sa sibilyan nga pagkinabuhi nga daotang damgo. Dayon niadtong 1945 ang atomikong mga bomba gihulog sa Hiroshima ug Nagasaki, nga nagpasulod sa tawo sa nukleyar nga panaho. Ang makalilisang nga mga panganod nga daw uhong nga mipataas ibabaw sa duha ka Hapones nga siyudad maoy mga pasiuna sa usa ka hulga nga nagbitay ibabaw sa katawhan sukad niadto.
Bisan pa niana, sa wala pa gani ihulog kadtong mga bombaha, gihimo ang pagpangandam sa pagtukod sa usa ka organisasyong sama sa patay nang Liga sa Kanasoran. Ang resulta mao ang Hiniusang Kanasoran nga Organisasyon, nga sa panguna may samang tumong sa mag-uuna niana—ang pagtipig sa kalinaw sa kalibotan. Unsa bay nakab-ot niana? Aw, walay gubat sa kalibotan sukad sa 1945, apan may daghang ginagmayng gubat nga niana milyonmilyon ang namatay.
Nagkahulogan ba kining ang katawhan dili na gayod makakita sa katumanan sa saad sa Diyos pinaagi ni Isaias nga ang mga tawo ‘dili na makakat-onan ug gubat’? Dili. Kini nagkahulogan lamang nga kini dili ipahinabo sa tawo. Ang Bibliya, nga gitawag ‘usa ka kahayag sa atong dalan,’ mao ang basahon nga nasudlan nianang dinasig nga saad. Ug ang Bibliya mao ang nagapakita nga walay lain kondili ang Diyos mismo ang sa kataposan magpahunong sa tanang gubat.—Salmo 119:105.
Kataposan sa Tanang Gubat
Sumala sa gihisgotan sa nag-unang artikulo, may usa ka grupo sa unang siglo nga nagtukod sa usa ka internasyonal nga pag-igsoonay diin imposible nga ang usa ka membro makiggubat batok sa iyang igsoong lalaki o babaye. Kadto ang Kristohanong kongregasyon, kansang mga membro sa literal kaayong diwa ‘nagsalsal sa ilang mga espada nga mga punta sa daro.’ Karong adlawa, samtang ang katawhan sa katibuk-an wala makahimog kauswagan sa pagpapas sa gubat, aduna na usab ing usa ka grupo sa katawhan nga nakakab-ot niining samang talagsaong tumong. Kinsa ba sila?
Sa katuigan sa wala pa ang 1914, kining gamay nga grupo may pagsalig sa Bibliya. Busa, sila nasayod nga ang paningkamot sa mga tawo sa pagpapas sa gubat dili molampos. Gikan sa ilang pagtuon sa Bibliya, ilang nakat-onan nga ang tuig 1914 mahimong usa ka lisoanang punto sa kasaysayan sa tawo, ug sila mihatag ug pasidaan bahin niini sulod sa 40 ka tuig. Ingong katumanan sa tagna sa Bibliya, ang 1914 mao ang sinugdanan sa usa ka panahon nga gitiman-an sa mga gutom, mga kamatay, ug mga linog, ingon man sa gubat. (Mateo 24:3, 7, 8; Lucas 21:10, 11) Mahitungod sa Gubat sa Kalibotan I, ang historyanong si James Cameron misulat: “Niadtong 1914 ang kalibotan, sumala sa nasayran ug gidawat niadto, natapos.”
Sa wala pa matapos ang maong gubat, ang makalilisang nga epidemya sa trangkaso mihampak sa tibuok kalibotan ug nagpatayg 20 milyong tawo—kapin sa doble sa gidaghanon sa mga sundalo nga namatay sa gubat mismo. Sukad niadto, ang mga sakit sama sa kanser ug, mas bag-o pa, ang AIDS nakapalisang sa katawhan.
Matikdi karon ang laing tagna sa Bibliya: “Ug tungod sa pag-uswag sa pagkamalapason ang gugma sa kadaghanan mabugnaw.” (Mateo 24:12) Kini ba natuman? Segurado! Sa matag adlaw, ang palaumagian sa balita nagayagyag sa tibuok-kalibotang pagkamalapason: mga pagbuno, mga pangatake, ug malangkobon nga kagubot. Dugang pa, ang politikanhong panagna mahitungod sa Gubat sa Kalibotan II mao nga kana magpatunghag “kagawasan sa kahadlok.” Sa kasukwahi, ang Bibliya tukmang nagtagna nga ang mga tawo “panguyapan tungod sa kahadlok ug pagpaabot sa mga butang mahitabo sa gipuy-ang yuta.” (Lucas 21:26) Sa makausa pa ang tawhanong mga panagna sayop, ug ang matagnaong mga pulong sa Diyos matuod.
Ang Unang Tighulhog sa Gubat
Ang usa ka tighulhog sa gubat mao ang usa nga nagasiba sa gubat. Ang mga politiko, klerigo, ug bisan negosyante nagadula niining bahina. Apan ang kinalabwang tighulhog sa gubat walay lain kondili si Satanas nga Yawa, nga gitawag sa Kasulatan “ang diyos niining sistema sa mga butang.”—2 Corinto 4:4.
Si Satanas mirebelde kang Jehova nga Diyos mga milenyo kanhi, ug sa ulahi siya nagtental sa panon sa mga manulonda sa pagduyog kaniya. Apan sa 1914 ang iyang panahon natapos na. Ang Bibliya nagasulti kanato: “Ang gubat misilaob sa langit: si Miguel ug ang iyang mga manulonda nakig-away sa dragon, ug ang dragon ug ang iyang mga manulonda nakig-away apan wala modaog, ni may dapit nga hikaplagan alang kanila didto sa langit. Busa gitambog ang dakong dragon, ang unang bitin, ug usang gitawag nga Yawa ug si Satanas, nga nagalimbong sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:7-9.
Kini nagapatin-aw nganong ang yuta nahimong peligrosong dapit sukad 1914. Gitagna sa Bibliya ang resulta sa pagkapukan ni Satanas: “Alaot ang yuta . . . tungod kay ang Yawa nanaog kaninyo, nga may dakong kapungot, kay nahibalo nga siya may hamubo na lamang nga panahon.” (Pinadayag 12:12) Unsa ka mubo nga panahon? Si Jesus miingon: “Kining kaliwatana [ang makakita sa mga hitabo sugod sa 1914] dili gayod moagi hangtod mahitabo kining tanan nga butang.” (Mateo 24:34) Unsang mga butang? Ang tanang katalagman ug kagubot nga gitagna ni Jesus alang sa atong adlaw.
Bisan pa niana, ang Bibliya nagapakita nga bisan tapos sa pagkawagtang sa Liga sa Kanasoran ug ang presenteng pagkawalay-katakos sa Hiniusang Kanasoran nga Organisasyon, ang mga nasod dili mohunong sa ilang kaugalingong paningkamot sa pagpatunghag kalinaw. Sa pagkamatuod, ang panahon moabot sa dihang sila maghunahuna nga sila milampos, Aduna unyay dakong singgit sa “pakigdait ug kasegurohan,” apan kini pagasundan sa “kalit nga kalaglagan” niining dunot nga kalibotan. Kay anaa sa kangitngit, ang mga tawo makuratan sa maong mosangpot nga mga hitabo, nga moabot “sama sa usa ka kawatan sa kagabhion.”—1 Tesalonica 5:2, 3.
Sa unsa kini mosangko? Sa gubat nga sa pagkamatuod maoy “gubat nga magtapos sa mga gubat”: ang gubat sa Armageddon, nga gitawag sa Bibliya “ang gubat sa dakong adlaw sa Diyos nga Labing Gamhanan.” Kini magkahulogan sa pagkalaglag sa tanang daotang elemento ug sa ilang mga tigpaluyo. “Ang mga mamumuhat ug daotan mismo pagaputlon.” (Pinadayag 16:14-16; Salmo 37:9) Sa kataposan, si Satanas, ang dakong tighulhog sa gubat, ibutang sa usa ka dapit diin siya dili na makaimpluwensiya sa mga tawo. Sa kataposan, siya usab pagalaglagon.—Pinadayag 20:1-3, 7-10.
Ugaling, matikdi nga kini dili usa ka gubat sa walay-hunahunang paglaglag uban sa binuang nga pagpamatay sa inosente ug sad-an nga managsama. Aduna unyay mga maluwas, ug kini sila mao unya ang “nagahatag sa [Diyos] sa balaang pag-alagad sa adlaw ug sa gabii.” Oo, kadtong dili na makakat-on ug gubat bisan karon ug nagasunod sa mga makigdaitong dalan sa matuod nga Kristohanon maluwas niining kataposan, dakong gubat. Daghan ba unya sila? Ang Bibliya nagatawag kanila “usa ka dakong panon, nga walay tawo ang makaihap, gikan sa tanang nasod ug mga tribo ug mga katawhan ug mga pinulongan.”—Pinadayag 7:9, 14, 15.
Tapos sa Bagyo
Dako gayong kahupayan ang bation niini nila! Inay sa daghang nasyonalistikong mga gobyerno, aduna lamay usa ka gobyerno unya: ang Gingharian sa Diyos. (Daniel 2:44; Mateo 6:9, 10) Inay sa hambogiro ug ambisyoso, ang mga maaghop magapanunod sa yuta ug “makakaplag sa ilang tumang kalipay sa kadagaya sa pakigdait.” (Salmo 37:10, 11) “Ang Diyos mismo . . . magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa.” (Pinadayag 21:3, 4) Si Jehova “magapahunong sa mga gubat hangtod sa kinatumyan sa yuta.” Ang mga espada pagasalsalon nga mga punta sa daro, ang mga bangkaw nga mga galab, ug ‘sila dili na makakat-on pa ug gubat’—Salmo 46:8, 9; Isaias 2:4.
Dili ba nimo buot mopuyo sa maong kalibotan? Siyempre buot nimo! Aw, ang posibilidad anaa. Ang unang lakang mao ang pagtuon sa Pulong sa Diyos, ang Bibliya, ug salig sa imong kaugalingon nga kining paglaoma matuod ug maayog pasikaranan. Unya, susiha gikan sa Bibliya kon unsa ang kabubut-on sa Diyos alang kanimo karon ug lihok sumala niana. Matuod, ang pagtuon nagkahulogan sa paghago, apan kana takos niana. Si Jesus miingon nga ang kahibalo nga imong mabatonan, kon gamiton nimo kana sa tukma, magkahulogan sa “kinabuhing walay kataposan.” (Juan 17:3) May butang ba nga labi pang hinungdanon kay niana?