Ang mga Ganti sa Pagpasidungog sa Tigulang nga mga Ginikanan

ANG tinuod nga mga magsisimba sa Diyos nagtahod, nagpasidungog, ug nag-atiman sa ilang tigulang nga mga ginikanan tungod kay gimahal nila sila. Kana maoy bahin sa ilang pagsimba. Ang Bibliya nag-ingon: “Pakat-ona una [ang mga anak o mga apo] nga managgawi sa diyosnong pagkamahinalaron diha sa ilang kaugalingong panimalay ug magpadayon pagbayad sa angay nga balos ngadto sa ilang mga ginikanan ug mga apohan, kay kini dalawaton sa panan-aw sa Diyos.” (1 Timoteo 5:4) Bata man kita o tigulang, angayan nga motanyag kita ug “angay nga balos” sa atong mga ginikanan ug mga apohan. Niining paagiha atong gipakita ang apresasyon alang sa ilang gugma, ilang paghago, ug ilang pag-atiman kanato latas sa daghan kaayong katuigan. Aw, utang nato ang ato mismong kinabuhi sa atong mga ginikanan!

Matikdi nga ang pagbayad ug angayng balos sa mga ginikanan ug mga apohan “dalawaton sa panan-aw sa Diyos.” Kini gilangkit sa atong “diyosnong pagkamahinalaron.” Busa, pinaagi sa pagtuman niining tambaga, kita gantihan, nga nahibalong kita nagabuhat kon unsay makapahimuot sa Diyos. Kana magdala kanato ug kangaya.

Adunay kangaya sa paghatag ngadto sa uban, ilabina sa dihang mohatag kita niadtong dagayang nagahatag kanato. (Buhat 20:35) Nan, pagkadako sa ganti kon molihok nga kaharmonya sa prinsipyo sa Bibliya: “Hatagi ang imong amahan ug imong inahan ug hinungdan sa kalipay, pasadyaa ang nanganak kanimo”!​—Proverbio 23:​25, The New English Bible.

Sa unsang paagi kita maghatag ug angayng balos sa atong mga ginikanan ug mga apohan? Sa tulo ka paagi: sa materyal, emosyonal, ug espirituwal. Ang matag usa magdala sa iyang mga ganti.

Paghatag sa Materyal nga Paagi

Kadtong nagaalagad sa Diyos nahibalo nga hinungdanon ang pagtagana sa materyal nga paagi alang sa suod nga mga membro sa pamilya. Si apostol Pablo nagtambag: “Kon si bisan kinsa wala magatagana alang kanila nga iyang kaugalingon, ug ilabina alang kanila nga mga membro sa iyang panimalay, siya nagalimod sa pagtuo ug mas daotan pa kay sa tawong walay pagtuo.”​—1 Timoteo 5:8.

Si Tunji ug Joy nagpuyo sa Kasadpang Aprika. Bisan tuod naglisod sa panalapi, ilang gidapit ang tigulang nga mga ginikanan ni Joy nga mopuyo uban nila. Ang amahan nasakit ug sa ulahi namatay. Si Tunji nahinumdom: “Sa dihang namatay si Papa, si Mama migakos sa akong asawa ug miingon: ‘Gibuhat nimo ang tanan nga maarangan sa tawo. Ayaw gayod batia ang pagkasad-an sa kamatayon ni Papa.’ Bisan tuod gimingaw kami kang Papa, nasayod kami nga gipalit namo ang kinamaayohang tambal alang kaniya ug kanunayng naningkamot nga pabation siya nga gikinahanglan; gihimo namo ang among maarangan sa pagtuman sa among hinatag-Diyos nga responsibilidad. Nabatonan namo ang maong katagbawan.”

Siyempre, dili tanan ang anaa sa posisyon nga motabang sa uban sa materyal nga paagi. Matod sa usa ka lalaki nga nagpuyo sa Nigeria: “Kon ang usa ka tawo dili makaatiman sa iyang kaugalingon, sa unsang paagi siya makaatiman sa laing tawo?” Sa daghang nasod ang kahimtang tingali mograbe pa sa umaabot nga katuigan. Sumala sa panagna sa Hiniusang Kanasoran, sa dili madugay katunga sa populasyon sa sikbit-Sahara nga Aprika magpuyo sa tumang kakabos.

Kon ikaw anaa sa kabos nga mga kahimtang, tingali mahupayan ka sa tinuod nga sugilanon sa usa ka kabos nga babayeng balo. Sa dinhi pa si Jesus sa yuta, iyang nakita ang usa ka babayeng balo nga mihimog gamayng amot sa panudlanag bahandi sa templo. Mihatag lamang siya ug “duha ka gagmayng sensilyo nga kubos kaayog bili.” Sa gihapon, nga nahibalo sa iyang kahimtang, si Jesus miingon: “Ako magasulti kaninyo sa pagkamatuod, Kini nga babayeng balo, bisan kabos, mihulog ug labaw pa kay sa gihimo sa tanan. Kay ang tanan kanila mihulog ug mga gasa gikan sa ilang mga sobra, apan kini nga babaye gikan sa iyang kawalad-on mihulog sa tanang kahinguhaan nga gibatonan niya.”​—Lucas 21:​1-4.

Sa susama, kon buhaton nato ang labing maayo nga atong maarangan sa pag-atiman sa atong mga ginikanan o mga apohan sa materyal nga paagi, bisan tuod gamay ra kini, si Jehova nakakita ug nagpabili niana. Dili siya magdahom nga mohimo kitag saylo sa atong maarangang buhaton. Lagmit ang atong mga ginikanan o mga apohan mobati sa susama.

Paghatag sa Emosyonal nga Paagi

Ang pagtagana sa atong mga ginikanan ug mga apohan naglangkit ug labaw pa kay sa pag-atiman sa ilang materyal nga mga panginahanglan. Kitang tanan adunay emosyonal nga mga panginahanglan. Ang matag usa, lakip ang mga tigulang, adunay tinguha nga mahalon, mobating gikinahanglan, ug mahimong bililhong membro sa pamilya.

Si Mary, nga nagpuyo sa Kenya, nag-atiman sa iyang tigulang nga ugangang babaye sulod sa tulo ka tuig. Matod pa ni Mary: “Gawas pa sa pagtagana sa iyang materyal nga mga panginahanglan, kanunay kaming makigsulti kaniya. Si Mama diyutay rag mabuhatbuhat sa balay, apan kami mag-estoryahanay ug nahimong suod nga managhigala. Usahay maghisgot kami bahin sa Diyos, usahay mahitungod sa mga tawo sa among pinuy-anan niadto. Bisan tuod siya kapin na sa 90 anyos, ang iyang panumdoman maayo pa kaayo. Siya mahinumdom ug maghisgot bahin sa kinabuhi sa dihang bata pa siya, sa mga adlaw una ang 1914.”

Si Mary mipadayon: “Dili sayon ang pag-atiman sa usa ka tigulang, apan ang pagpapuyo kaniya uban namo nagdalag dagayang ganti. Kami may kalinaw ug harmonya sa pamilya. Ang akong paghatag kaniya nagpalihok sa espiritu sa paghatag diha sa uban sa pamilya. Ang akong bana adunay labawng pagtahod kanako. Ug kon si Mama makadungog kang bisan kinsa nga mosultig hinaras kanako, mosulti dayon siya aron sa paglaban kanako. Walay makasultig haras nga pulong kanako kon anaa siya!”

Paghatag sa Espirituwal nga Paagi

Maingon nga ang paghatag sa materyal ug emosyonal nga paagi magdalag dagayang ganti sa usa nga nagahatag, mao usab sa espirituwal nga mga butang. Si apostol Pablo misulat sa Kristohanong kongregasyon sa Roma: “Ako nangandoy sa pagpakigkita kaninyo, aron ako makahatag kaninyog espirituwal nga gasa aron nga kamo mahimong lig-on; o, labi pang maayo, nga aduna untay pagdinasigay taliwala kaninyo, sa matag usa pinaagi sa pagtuo sa lain, sa inyoha ug sa akoa.”​—Roma 1:​11, 12.

Sa samang paagi, maylabot sa paghatag sa espirituwal nga paagi sa mga tigulang nga nag-alagad sa Diyos, sagad madasig ang usag usa. Si Osondu, nga nagpuyo sa Nigeria, miingon: “Ang nakapainteres kanako pag-ayo bahin sa akong mga apohan mao ang kahigayonan nga ilang gihatag kanako nga makahibalo sa nangagi. Ang akong apohang lalaki, uban sa mapahiyomon niyang mga mata, moasoy sa teritoryo nga iyang gisangyawan ingong bug-os-panahong ministro sa katuigang 1950 ug 1960. Iyang itandi ang presenteng kahikayan sa kongregasyon niadtong panahong na-Saksi siya. Kining maong mga kasinatian nakatabang kanako sa akong pag-alagad ingong payunir.”

Ang uban sa Kristohanong kongregasyon makatabang usab sa paghatag ngadto sa mga tigulang. Si Tunji, nga gihisgotan sa sinugdan, misaysay kon unsay nahitabo sa iyang kongregasyon: “Usa ka batan-ong payunir nga igsoong lalaki nga giasayn sa paghatag ug pakigpulong publiko nagdala sa laraw ngadto ni Papa aron nga duyog nilang maandam kana. Ang nagadumala sa Pagtuon sa Bantayanang Torre miabot ug miingon kang Papa: ‘Ikaw eksperyensiyado. Unsay imong ikasulti aron matabangan akong mouswag?’ Si Papa nakahatag sa maong ansiyano ug praktikal nga tambag. Ang mga igsoon naghisgot sa ngalan ni Papa diha sa mga pag-ampo sa kongregasyon sa daghang higayon. Kining tanan nagpabati kaniyang gikinahanglan.”

Maayong Panggawi Nagadani sa mga Tawo Ngadto sa Diyos

Usahay, samtang kita magpakitag pasidungog ug gugma sa atong mga ginikanan ug mga apohan, atong ginadani ang mga tawo ngadto sa Diyos. Si apostol Pedro misulat: “Padayong-hupti ang inyong panggawi nga maayo taliwala sa mga nasod, aron nga, sa butang nga sila nagapamulong batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita magahimaya sa Diyos.”​—1 Pedro 2:12.

Si Andrew, usa ka Kristohanong ansiyano sa Kasadpang Aprika, mibiyaheg 95 kilometros kaduha sa usa ka semana aron sa pag-atiman sa iyang masakitong amahan, kinsa dili magtutuo. Siya miasoy: “Sa dihang ako nahimong usa sa mga Saksi ni Jehova, ang akong amahan misupak pag-ayo. Apan sa dihang nakita niya kon sa unsang paagi ako nag-atiman kaniya samtang siya masakiton, padayon niyang giawhag ang akong mga manghod nga lalaki ug babaye, ‘Kinahanglang moanib kamo sa relihiyon sa inyong igsoong lalaki!’ Kana nagpalihok kanila, ug karon ang siyam ka anak sa akong amahan ngatanan maoy mga Saksi ni Jehova.”

Ang pagpasidungog ug pag-atiman sa atong tigulang nga mga ginikanan mahimong usa ka hagit, ilabina sa panahon sa kalisod sa panalapi. Apan samtang ang mga Kristohanon maningkamot sa pagbuhat niini, ilang maani ang daghang ganti. Labaw sa tanan, ilang masinati ang kangaya sa paghatag, duyog ang katagbawan sa pagkahibalo nga sila nakapahimuot kang Jehova nga Diyos, kinsa mao mismo ang “Amahan sa tanan nga mga tawo.”​—Efeso 4:6.

[Kahon sa panid 6]

Diyosnong Tambag Alang Niadtong Nagadawat ug Pag-atiman ug Alang Niadtong Nagahatag Niana

Magmadasigon: “Magpahimuot ang matag usa kanato sa iyang silingan sa kon unsa ang maayo para sa iyang ikalig-on.”​—Roma 15:2.

Magmalig-on: “Dili kita moundang sa pagbuhat kon unsay maayo, kay sa takdang panahon kita moani kon dili kita molunga.”​—Galacia 6:9.

Magmapainubsanon: “Dili magabuhat ug unsa man tungod sa pagkamatigion o tungod sa pagpakaimportante sa kaugalingon, hinuon uban sa pagpaubos sa hunahuna magaisip nga ang uban labaw kay kaninyo.”​—Filipos 2:3.

Manggibuhaton ug Maayo: “Padayong ipapangita sa matag usa, dili ang iyang kaugalingon nga kaayohan, apan nianang sa laing tawo.”​—1 Corinto 10:24.

Magmakataronganon: “Ipaila ang inyong pagkamakataronganon ngadto sa tanang tawo.”​—Filipos 4:5.

Magmabination: “Magmaluloton ngadto sa usag usa, magmabination uban ang kalumo, bukas nga magapasaylo sa usag usa.”​—Efeso 4:32.

[Hulagway sa panid 7]

Ang batabatang mga ansiyano makabenepisyo gikan sa kasinatian sa mga tigulang