Ang Bahandi ba Makapalit ug Kalipay?
DAYAG ang pagpanag-iyag daghang salapi dili makahimo sa mga tawo nga mas malipayon. Matud sa magasing Psychology Today: “Sa dihang mokita ug labaw sa kita sa kabos, ang dako nga kita sa katingalahan walay relasyon sa personal nga kalipay.”
Kini gipamatud-an sa Oktubre 29, 1993 nga listahan sa mga patay sa New York Times, nga nagdala sa ulohan: “Doris Duke, 80, Manununod Kansang Dakong Bahandi Dili Makapalit ug Kalipay, Patay Na.” Ang artikulo nag-ingon: “Sa halalom nga takna usa ka gabii sa Roma niadtong 1945, si Gng. Duke, nga kaniadto 33 anyos, misulti sa usa ka higala nga ang iyang dakong bahandi sa pipila ka paagi maoy usa ka babag sa kalipay.”
“Kanang tanang salapi suliran usahay,” mitug-an si Duke sa usa ka higala. “Pipila lang ka beses akong makigdeyt sa usa ka lalaki, mopahayag dayon siya nga nahigugma kaayo kanako. Apan unsaon nako pagkahibalo kon tinuod gayod ang iyang gisulti? Sa unsang paagi ako makaseguro?” Ang Times miingon: “Ang iyang mga pulong niadtong gabhiona nagpakita nga ang iyang kinabuhi naapektohan ug dako, gani nadaot, sa iyang bahandi.”
Sa susama, si Jean Paul Getty, nga kas-a giila ingong kinadatoang tawo sa kalibotan, miingon: “Ang salapi dili kinahanglang may bisan unsang koneksiyon sa kalipay. Tingali sa kawalay-kalipay.” Ug si Jane Fonda, usa ka iladong artista sa Hollywood, kinsa panahon sa katuigang 1970 nagdawat ug tunga sa milyong dolyar matag pelikula, miingon: “Natilawan na nako ang bahandi ug ang tanang materyal nga mga butang. Kini walay kahulogan. Adunay usa ka sikyatrista sa matag swimming pool, bisag dili na hisgotan pa ang mga diborsiyo ug mga bata nga nagdumot sa ilang mga ginikanan.”
Samtang ang bahandi lamang dili gayod makadalag kalipay, dili usab ang sobrang kakabos. Mao nga, ang maalamong tawo dugay na kanhi miingon: “Ayaw ako paghatagi ug kawalad-on ni mga bahandi.” (Proverbio 30:8, 9) Laing magsusulat sa Bibliya nagpahayag nga ang gikinahanglan sa tawo aron magmalipayon mao ang “diyosnong pagkamahinalaron inubanan sa pagkaadunay-igo-sa-kaugalingon. Kay wala kitay gidalang bisan unsa nganhi sa kalibotan, ug ni kita makadala ug bisan unsa pagawas. Busa, nga may makaon ug ikasapot, kita makontento na niining mga butanga.”—1 Timoteo 6:6-10.