Paggawi nga Makahatag Pasidungog sa Pagtulon-an sa Diyos
Dili pa dugay, ang tagdumala sa usa ka kompaniya sa Caracas, Venezuela, nagpadalag sulat sa mga ansiano ug sa ministeryal nga mga alagad sa duol nga kongregasyon sa mga Saksi ni Jehova. Diha niana sila misulat: “Kami nakadawat ug maayo kaayong mga pasalig maylabot sa mga tawo sa inyong relihiyon mahitungod sa ilang pagbati sa kaakohan ug kamatinud-anon. Sa mao nga katarongan nga kami karon nagaduol kaninyo. Tungod sa among kakulang ug trabahante, kami may dinaliang panginahanglan ug duha ka tawo alang sa mosunod nga mga posisyon: usa nga mahimong drayber ug ang lain mahimong manedyer sa bodega. Among pabilhan ug dako ang bisan unsang impormasyon nga inyong ikahatag may kalabotan niini diha sa inyong kongregasyon ug sa usa sa duol. Dili kami gustong magpaempliyo ug dili-Saksi nga mga trabahante. Palihog, pahibaloa kami bisag walay usa nga makuha, sanglit maghulat kami sa inyong tubag sa dili pa maghimog bisan unsang desisyon.”
Human nakit-an ang sulat sa ilalom sa pultahan sa Kingdom Hall, giduaw sa usa sa mga ansiano sa kongregasyon ang tag-iya sa kompaniya nga gihisgotan. Ang tag-iya nakiglabot na sa mga Saksi ni Jehova sulod sa 15 ka tuig ug walay nahinumdomang seryosong mga suliran uban sa iyang mga Saksi nga empliyado. Iyang gihisgotan sila nga seryoso, responsable, matinud-anon, ug kugihang mga trabahante. Unya siya midugang: “Ako nahibalo nga dili ninyo palabyon ang mamumuhat ug daotan, ug inyo pa ganing ipalagpot sila. Kana nagpakita nga ang inyong kongregasyon dili gustong makigkunsabo niining klaseha sa mga tawo.”
Ang maong paggawi makahatag pasidungog sa pagtulon-an sa Diyos. (Tito 2:10) Kini mao ang resulta sa usa ka tinuod nga tinguha sa suod nga pagsunod sa moral nga mga prinsipyo nga gilaraw sa Bibliya.