Pagtuman sa Atong Ministeryo sa Gingharian sa Kongregasyon
1 Si Jehova, pinaagi ni Jesu-Kristo, mitugyan ug kaakohan ngadto sa “matinumanong tigdumala,” o manedyer sa panimalay. (Luc. 12:42, 43) Kining kahikayana nagpaposible kanato sa pagdawat ug pinatik nga direksiyon kon sa unsang paagi ‘kita angay nga magagawi sa atong kaugalingon diha sa panimalay sa Diyos.’ (1 Tim. 3:15) Sa unsang paagi ang Watch Tower Publications Index makatabang kanimo sa pagkaplag kon unsay napatik na?
2 Ikaw ba usa ka ansiyano? Adunay duha ka ulohan nga naghisgot sa imong mga kaakohan: “Elders” ug “Overseers.” Ang seksiyong “Elders” adunay mga reperensiya sa pagbulig sa lainlaing mga tawo diha sa kongregasyon, kon unsaon sa pagtambag, mga relasyon diha mismo sa lawas sa mga ansiyano, mga responsabilidad sa mga ansiyano, ubp. Ang mga reperensiya ngadto sa mga kalipikasyon makaplagan ubos sa “Overseers,” sanglit kay mao man kini ang termino nga gigamit sa Bibliya sa dihang gihisgotan kini. Usab ubos sa “Overseers” mao ang opisyal nga mga asaynment, sama sa “presiding overseer,” “service overseer,” ug “secretary.”
3 Kamo nga ministeryal nga mga alagad makakaplag sa impormasyon bahin sa inyong kalipikasyon ug mga kaakohan ubos sa “Ministerial Servants.” Makaplagan usab ninyo ang mga reperensiya sa materyal maylabot sa mga pribilehiyo sa pag-alagad nga bukas kaninyo ug kon sa unsang paagi makapangab-ot alang sa dugang kaakohan.
4 Ang ulohang “Meetings” nagatanyag sa mga reperensiya sa kada bahin sa ulohan, lakip sa kulbahinam nga mga ehemplo ubos sa “efforts to attend.” Siyempre, adunay lintunganay nga mga ulohan alang sa matag usa sa mga miting usab.
5 Nag-ingon ang Salmo 68:11: “Ang kababayen-an nga nagasugid sa maayong balita maoy dakong panon.” Sama sa lalaking mga membro sa kongregasyon, ang mga igsoong babaye kinahanglan usab nga mosunod sa hustong panggawi alang kanila diha sa panimalay sa Diyos. May mga panahon nga motungha ang mga pangutana bahin sa pagpandong sa ulo o kon unsay buhaton sa dihang walay takos nga igsoong lalaki nga presente aron sa pagdumala sa usa ka tigom o morepresentar sa kongregasyon diha sa pag-ampo. Ang ulohang “Women” motultol kanimo ngadto sa impormasyon niining mga ulohana. Makabulig usab ang mga ulohang “Sisters,” “Head Covering,” ug “Prayer.”
6 Tugoting magagawi kita sa atong kaugalingon sa hustong paagi diha sa panimalay sa Diyos, nga nagatuman sa atong ministeryo sa Gingharian sulod sa kongregasyon.