Palig-ona ang Uban sa Pagbasa sa Ang Bantayanang Torre
1 Sa Mayo, buot tang mopalig-on sa mga nahigugma sa kamatuoran sa pagbasa sa Ang Bantayanang Torre nga makanunayon. Sa tanang magasin nga gipatik karong mga adlawa, kini lamang ang nagasuplay sa hinungdanon espirituwal nga pagkaon nga gikinahanglan niadtong nagapanghupaw ug nagatiyabaw tungod sa makapasubo nga mga kahimtang sa yuta.—Exeq. 9:4.
2 Ang Bantayanang Torre nakabulig na kanato sa pagsabot sa tagna sa Bibliya nga nagapamatuod nga kita nagapuyo sa panahon sa kataposan ug nga ang Gingharian sa Diyos sa di na madugay mopatunghag kalinaw nganhi sa yuta. Ang atong tiunay nga kabalaka sa mga kinabuhi sa uban mopalihok kanato nga ipaambit kining kahibulongang paglaom uban kanila. Ug kita napalig-on sa pagtan-aw nga daghang mabuot-kasingkasing nga mga tawo ang natigom alang sa kaluwasan.—Juan 10:16.
3 Ang Mayo 1 nga Bantayanang Torre nagadala sa ulohang “Pagbuntog sa Krimen sa Masamokong Kalibotan.” Ang Mayo 15 nga gula nagapasiugda sa “Unaha ang Diyos sa Inyong Pamilyahanong Kinabuhi!” Kining maong mga artikulo madaling ikalambigit sa ato karong Ulohan nga Mahisgotan maylabot sa Gingharian sa Diyos. Pangandam ug maayo aron imong ikapakita kon sa unsang paagi ang mga artikulo makabulig sa tagbalay sa pagpadako sa iyang pagsabot sa ulohan nga ginahisgotan.
4 Hinumdomi nga ang atong sugo mao ang pagsangyaw sa maayong balita ug sa paghimog mga tinun-an. Kon ang usa ka tawo dili buot nga mosuskriber apan gustong mobasa sa tinong mga artikulo usahay, hayan maayo nga itala ang iyang ngalan sa imong rota sa magasin ug himoon ang regular nga mga duaw aron ihatod ang mga magasin. Kini magpaarang kanimo sa pag-ugmad sa iyang interes uban sa tumong nga makasugod ug pagtuon sa Bibliya sa kapulihay.
5 Ang Mayo mohatag ug daghang kahigayonan sa pagpakighisgot bahin sa Gingharian sa pamalaybalay ug sa impormal nga paagi. Kita masaligon nga si Jehova magpanalangin sa atong mga panlimbasog sa pagtaganag espirituwal nga tingusbawan alang sa mga maaghop sa atong teritoryo.