Pagtanyag sa Maayong Balita—Uban sa mga Magasin
1 Walay laing mga mantalaan sa kasaysayan nga adunay impluwensiya alang sa kaayohan diha sa mga kinabuhi sa katawhan kay sa Ang Bantayanang Torre ug Pagmata! Matag gula maoy puno sa nagahatag-kinabuhi espirituwal nga pagkaon. Ang mga resulta sa pagpangdukiduki nga gipresentar uban ang kusganong suportar sa Kasulatan nakasilsil sa mensahe sa kamatuoran diha sa atong mga hunahuna ug kasingkasing.
2 Ang Bantayanang Torre, pinaagi sa iyang mga panid, nagapatin-aw sa mga pagtulon-an sa Bibliya ug nagadala sa atong pagtagad sa katumanan sa mga tagna sa Bibliya. Kini nagadasig sa tanang gigutom sa espirituwal sa pagbag-o sa ilang hunahuna ug mosul-ob sa bag-ong personalidad. (Roma 12:2; Efe. 4:22-24) Ang Pagmata! nagapaigmat sa iyang magbabasa sa talagsaong mga hitabo sa kalibotan. Ang iyang makapadaning mga ilustrasyon nga nagahulagway sa mga katingalahan sa kalalangan makapalihok sa interes diha sa bag-ong kalibotan ug makapalalom sa pagpabili sa Maglalalang.
DILI SAMA SA KALIBOTANON NGA MAGASIN
3 Ang kalibotanon nga mga magasin wala magpakita sa katawhan kon unsaon pagpahimulos sa makatagbaw nga kinabuhi niining kalibotana. Sila walay gitanyag nga paglaom alang sa umaabot ug napakyas sa pagtudlo sa katawhan kon unsaon sa pagbaton sa kinabuhing walay kataposan. Kanang kalibotanong mga magasin gidesinyo aron pagpasiugda sa mga butang sa kalibotan. Pagkasukwahi niini diha sa Ang Bantayanang Torre ug Pagmata!—1 Juan 2:15-17.
4 Walay duhaduha ikaw mismo mibati ug halalom nga pagpasalamat sa matag gula sa Ang Bantayanang Torre ug Pagmata!—mga magasin nga naundan sa tumang kahumot sa kamatuoran gikan sa “matinumanong piniyalan.” (Luc. 12:42) Unsa may atong mahimo aron mouswag ang atong pagpahimutang sa mga magasin ug sa ingon makatabang sa dugang pa nga makapahimulos sa atong mga mantalaan?
PAGBUHAT SA ATONG BAHIN
5 Una pa kita tukmang makadasig sa mga mabuot ug kasingkasing nga mobasa sa atong mga magasin, kinahanglan natong masayran kon unsa ang sulod sa matag usa niana. Kini nagapasabot nga atong basahon ang matag gula una pa kini gamiton sa ministeryo. Kay nasinati sa iyang kaundan, atong magamit ang mga bahin sa balaybalay nga ministeryo, buluhaton sa kadalanan, ug di-pormal nga pagpamatuod alang sa pagpanagtag sa magasin.
6 Dugang pa, pinaagig pagdala sa atong bag-ong mga magasin samtang nagapamalit, nagasakay sa bus o jeep, sa tunghaan, sa atong dapit-trabahoanan, o bisan asa kita moadto, makahimo kita sa pagsakmit sa mga kahigayonan aron makapamatuod. Ang usa ka maayong-pagkapili nga introduksiyon gikan sa Nangatarongan nga libro inubanan sa usa ka punto gikan sa usa sa mga artikulo makaaghat sa tinguha sa usa ka tawo nga mobasa sa atong mga magasin.
7 Bisan tuod tingali mubo ang atong panaghisgot sa dihang nagatanyag sa mga magasin, dili kinahanglang ilimite lang nato ang panaghisgot sa usa ka minuto o kapin pa. Buot natong mogahin ug panahon aron pagtino kung ang tawo ba interesado gayod sa mensahe ug kon siya mobasa ba sa magasin. Kon motungha ang mga pangutana, paningkamotan nato kanunay nga matubag ang mga sukna pinaagig paggamit sa atong Bibliya o sa Nangatarongan nga libro. Pinaagi sa pagkaandam nga manalipod sa atong pagtuo, atong maani ang katingalahang mga panalangin.—1 Ped. 3:15.
8 Kon mouyon ang indibiduwal nga mobasa sa mga magasin, makasulti kita sa kinaiyahan sa atong buluhaton ug sa unsang paagi kining mga magasina gipatik makaduha sa usa ka bulan ingon nga bahin sa usa ka tibuok-kalibotang edukasyonal nga buluhaton sa Bibliya. Ang impormasyon sa panid 2 sa Ang Bantayanang Torre o panid 4 sa Pagmata! nindot kaayong nagasaysay niini. Sanglit ang kaundan sa sunod nga gula kanunayng gitala, kita makasukna ug maykalabotang mga pangutana o dalhon ang pagtagad sa nagasingabot nga mga artikulo. Kini makaagda sa gana sa tawo ug makapalihok kaniya nga mopahayag sa tinguha nga mokuha sa sunod nga gula kon kini moabot na. Mahimong kini sinugdanan na sa usa ka rota sa magasin.
9 Samtang nagakaduol ang kataposan niining sistemaha, hinaot nga atong dalion ang atong paso sa pagtabang sa matinud-anog-kasingkasing nga mga tawo nga makaikyas gikan sa Babilonyang Bantogan. (Pin. 18:4) Hinaot nga si Jehova padayon nga magapanalangin sa atong bug-os nga paggamit sa Ang Bantayanang Torre ug Pagmata! diha sa atong tibuok-kalibotang edukasyonal nga buluhaton sa Bibliya!