Unsay Makapalipay sa mga Tawo?

Sulod sa duha ka dekada usa ka grupo sa mga tigdukiduki sa tibuok kalibotan ang naghimog usa ka sistematiko nga pagtuon bahin sa kalipay. Ang ilang mga kaplag? “Ang kalipay dayag nga wala kaayo magdepende sa gawas nga mga kahimtang,” nagtaho ang magasin nga Scientific American.

Kining siyentipikanhong basahon nagpahayag usab: “Ang bahandi wala magkahulogan ug kalipay. Ang mga tawo wala mahimong mas malipayon sa panahong ang ilang mga kultura nahimong mas adunahan. . . . Sa kadaghanang nasod gamay ra ang kalambigitan tali sa kinitaan ug kalipay.”

Ang mga pagtuon nagpadayag sa upat ka kinaiya nga magpaila sa malipayong mga tawo: Gusto nila ang ilang kaugalingon ug duna silay taas nga pagtahod-sa-kaugalingon, gibati nilang duna silay kontrol sa ilang personal nga mga kinabuhi, malaomon sila, ug mahigalaon. Dugang pa, ang maayong mga kaminyoon ug suod nga personal nga mga relasyon makaamot sa malipayong mga kinabuhi, ug dunay purohan nga mapauswag niini ang kahimsog ug taas nga kinabuhi.

Makapainteres nga ang Scientific American nagtaho: “Ang mga tawo nga aktibo sa relihiyosong paagi nagtaho usab ug mas dakong kalipay. Ang usa ka surbi sa Gallup nakakaplag nga ang relihiyoso kaayo nga mga tawo dunay dobleng purohan nga mopahayag nga sila malipayon kaayo kay sa niadtong halos walay relihiyosong pagpakiglabot. Ang ubang mga surbi, lakip ang 16-nasod nga tambayayong nga pagtuon sa 166,000 ka tawo sa 14 ka nasod, nakakaplag nga ang gikatahong kalipay ug katagbawan sa kinabuhi nagauswag kon dunay relihiyosong pagpakig-uban ug regular nga pagtambong sa mga serbisyo sa pagsimba.”

Dugay na kanhi ang salmistang si David nagpadayag nga ang personal nga kalipay suod nga nalambigit sa nahiusang pagsimba kang Jehova nga Diyos, nga nagsulat: “Nalipay ako sa pag-ingon nila kanako: ‘Mangadto kita sa balay ni Jehova.’”​—Salmo 122:1.

Dili ikatingala nga si apostol Pablo nag-awhag sa mga isigka-Kristohanon: “Tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom”! (Hebreohanon 10:​24, 25) Sa pagkatinuod, ang pagtigom alang sa pagsimba sa Diyos uban kanilang dunay samang bililhon nga pagtuo maoy usa ka mangayaon nga okasyon alang sa mga mahigugmaon sa kamatuoran sa Bibliya. Minilyon sa mga Saksi ni Jehova ang nakakaplag nga kini tinuod ug nagdapit kaninyo nga maeksperyensiyahan kini ninyo mismo pinaagi sa pagduyog kanila sa pagsimba sa Kingdom Hall nga duol kaninyo.