Nagasunod Ka ba sa mga Lakang sa Manluluwas?
USA sa pinakamaayong mga komplimentong imong ikahatag sa usa ka tawo mao ang pagsundog kaniya. Ang mga anak kadaghanan mosundog sa ilang mga ginikanan. Ang mga tin-edyer tingali mokopya sa bantogang mga maglilingaw, ang dagkong mga tawo mokopya sa iladong mga lider sa mga natad sa negosyo ug sa politika. Apan pila ang nagasulay sa pagkopya sa kinadakoang lider sa kasaysayan sa tawo—si Jesu-Kristo?
Ang usa ka bag-ong surbing gihimo sa organisasyong Gallup nagpadayag: “Walo sa 10 ka Amerikano miingong sila labing menos naningkamot sa pagsunod sa panig-ingnan ni Jesus.” “Dose lamang ka porsiento ang miingong gihimo nila ang pinakadakong posibleng paningkamot.”
Apan, unsay nakapahimo ni Jesus nga labi pang takos sundogon kay sa ubang makaimpluwensiyang mga tawo? Sa usa ka butang, sumala sa giingon sa The World Book Encyclopedia, si Jesu-Kristo “lagmit nakaimpluwensiyag daghan kay ni bisan kinsang sukad nagkinabuhi.” Apan lahi sa ubang makaimpluwensiyang tawo, si Kristo wala mangulo sa mga kasundalohan ngadto sa kanataran sa paghimog pinugos nga mga pagpangabig. Wala siya mosalig sa gastosong mga propaganda sama sa ginabuhat sa iladong mga ebanghelista karong adlawa. Ni mipaluyo siya sa bisan unsang politikanhong partido. Ang iyang impluwensiya maoy tungod sa bug-os nga gahom sa iyang mensahe ug sa iyang paagi sa pagpahayag niana.—Mateo 7:28, 29; Juan 7:46.
Gidasig niya ang mga tawo sa paghimog dagko kaayong kausaban sa ilang mga kinabuhi, sa espirituwal ug sa moral nga paagi. Kinsa ang laing makaimpluwensiyang tawo ang nakatandog sa maayong paagi sa daghan kaayong tawo? Gawas pa, kinsang laing tawhanong lider ang mabatbat ingong “maunongon, walay-sala, walay-hugaw, nga nabulag sa mga makasasala”? (Hebreohanon 7:26) Busa ang panig-ingnan ni Jesus maoy hingpit nga panig-ingnan—lahi sa iya sa ubang tawo nga sukad nagkinabuhi sa yuta!
‘Apan, sa unsang paagi ang mahuyang ug dili-hingpit nga tawo makasunod nianang panig-ingnana?’ mangatarongan ang pipila. Ang historyanong si H. G. Wells diha sa iyang librong The Outline of History miingong sukad sa sinugdan ang mga tawo mosinta sa pagsunod kang Kristo. “Kay ang pag-isip nga ugdang kang [Kristo],” matud ni Wells, “maoy pagsulod sa katingalahan ug makahahadlok nga kinabuhi, pagbiya sa mga bisyo, pagpugong sa mga kinaiyahan ug mga impulso, ang pagtinguha sa dili-katuohang kalipay.” Mitapos si Wells: “Katingad-an ba nga hangtod niining adlawa kining Galileanhon [Kristo] dako ra kaayo alang sa atong gagmayng mga kasingkasing.”
Apan tinuod ba kana? Itugot nato, ang pagsunod kang Kristo sa hingpit maoy imposible. Bisan pa niana, si apostol Pedro miingong si Kristo ‘nagbilin sa usa ka sulundan aron atong masunod nga duol ang iyang mga lakang.’ (1 Pedro 2:21) Matikdi, siya wala moingong “sa hingpit,” kondili “nga duol.” Nan, unsang matanga sa sulundan ang gibilin kanato ni Jesus? Sa unsang paagi kita makasundog niana?