Ang Bigaon ug “Ang mga Hari sa Yuta”

ANG kasaysayan sa Kakristiyanohan punog mga panig-ingnan sa pag-impluwensiya ug paghilabot diha sa mga dominyo sa panggamhanan. Hisgotan nato ang pila niini. Si Karlomagno (742-814 K.P.) maoy magmamando nga nakakita sa mga kaayohan sa pakighugoy sa relihiyon ug pagbaton sa bendisyon sa klero sa Iglesya Katolika.

Gisaysay sa The New Encyclopædia Britannica nga ang papa nagdihog kang Karlomagno, sa iyang amahan, ug iyang igsoong lalaki, aron matukod ang usa ka bag-ong dinastisya human nga ‘gipadaplin’ ang kanhing harianong pamilya. Dayon midugang kini: “Ang politikanhong alyansa tali sa Franks [katawhan ni Karlomagno] ug sa Papa batok sa Lombards gilig-on sa samang okasyon. . . . Si Charles [kinsa nahimong Karlomagno] sayo nga nag-ila sa suod nga koneksiyon tali sa yutan-ong gahom ug sa simbahan.”

Sa tuig 800 K.P., si Papa Leo III, “mihukom nga himoon si Charles nga emperador” sa Kasadpang Romanhong Imperyo, nga nagpurongpurong niya sa Misa sa Pasko sa St. Peter’s, Roma.

Usa ka Hakogan nga Bigaon

Apan ang bigaon magpabayad. Unsay ikabayad ni Karlomagno sa hawas sa Babilonya, ang Roma? “Si Charles . . . nagsubli, sa St. Peter’s Basilica, sa saad sa iyang amahan nga balhinon ang dagkong mga seksiyon sa Italya nganha sa pagmando sa papa.” Ang samang basahon midugang: “Tungod sa iyang pagkarelihiyoso nga nakondisyon sa politika, ang imperyo ug ang simbahan mitubo nga nahimong institusyonal ug espirituwal nga yunit.”

Ang laing panig-ingnan sa nangaging gamhanang impluwensiya sa relihiyon diha sa pagmando mao si Kardinal Wolsey sa Inglaterra (1475-1530). Ang Britannica nag-ingon nga siya usa ka “kardinal ug estadista nga migahom sa kagamhanan ni Haring Henry VIII sa Inglaterra. . . . Sa Disyembre 1515 si Wolsey nahimong lord chancellor sa Inglaterra. . . . Gigamit ni Wolsey ang iyang dako kaayong gahom sekular ug eklesiastikal sa pagtigom ug bahandi nga ikaduha ra sa iya sa Hari.” Sa pagpadapat sa simbolikong pinulongan sa Pinadayag, ang de-kalidad nga prostitusyon mangayog de-kalidad nga bayad.

Ang laing daotag-dungog nga panig-ingnan sa relihiyosong impluwensiya diha sa mga kahikayan sa Gobyerno mao ang kardinal ug duke sa Richelieu (1585-1642), nga migamit ug dakong gahom sa Pransiya ug nakatigom usab ug bahandi nga “daghan kaayo bisan sa mga sukdanan sa maong panahon,” nagpahayag ang Britannica.

Si Richelieu gipulihan sa lain pang kardinal, si Jules Mazarin (1602-61), nga nag-alagad nga unang ministro sa Pransiya panahon sa paghari ni Haring Louis XIV. Bisan tuod dili ordinadong pari, siya gihimong kardinal sa 1641 ni Papa Urbano VIII. Si Kardinal Mazarin usab ambisyoso alang sa bahandi. Ang ensiklopedia miingon: “Ang mga kaaway ni Mazarin misaway kaniya tungod sa iyang kahakog. Nakatigom siyag mga katungdanan ug mga kinitaan ug may panahong gikasaypan ang harianong kinitaan nga iyang kaugalingong kinitaan.”

Sa modernong panahon ang bakak nga relihiyon nagatigom gihapon ug bahandi ug nagasulay sa pag-impluwensiya ug, kon mahimo pagkontrolar sa politikanhong mga elemento. Ang usa ka talagsaong panig-ingnan mao ang sekretong Katolikong organisasyon nga Opus Dei (Latin, Buhat sa Diyos), nga pagkakaron nagapahimulos sa pag-uyon sa papa ug, sumala sa magsusulat si Lawrence Lader, maoy “bug-os komitido sa kontra-komunismo ug konserbatibong politika.” Kini dunay polisa sa pagkuha sa labing maayog utok Katolikong mga batan-on pinaagi sa mga hayskul ug mga unibersidad niini ug dayon pagbutang sa iyang mga tawo diha sa tag-as nga mga katungdanan nga may impluwensiya ug gahom diha sa gobyerno, panalapi, ug palaumagian sa balita. Sa Espanya nakabaton silag kabulahanan ubos sa Katolikong Pasistang diktador si Franco sa dihang, sa usa ka yugto, 10 sa iyang 19 ka membro sa gabinete maoy mga kaanib sa iya sa hamiling tawo nga Opus Dei.a

Sa Tinipong Bansa, ang mga ebanghelista sa TV ilado tungod sa ilang pagkamapagawalon sa bahandi ug maluhong mga pagkinabuhi. Ang pila ka Protestanteng klero magarbohong mientra sa politikanhong natad ug nagtinguha pa sa katungdanan sa presidente. Walay duhaduha niini, bisan tuod napukan na, ang karaang bigaon, nga nagtakoban sa usa o laing paagi, nagapahimulos gihapon sa mga dayandayan ug kaluhoan sa gahom ug nagasulay sa pagdominar.​—Pinadayag 17:4.

Apan komosta ang ngalan sa bigaon, ang Dakong Babilonya? Sa unsang paagi kana motabang sa paglig-on sa ilhanan sa babayeng gisimbolohan sa Pinadayag?

[Mga Footnote]

[Mga hulagway sa panid 6]

Ang mga kardinal nga si Wolsey, Mazarin, ug Richelieu nakatigom ug dagkong mga bahandi samtang nag-alagad sa Estado

[Kapsiyon]

Mga Hulagway: Culver nga mga Hulagway