Kon Nganong Matapos ang Kalibotanong Relihiyon
“Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak.”—PINADAYAG 18:4.
1. (a) Sa unsang paagi napukan ang Dakong Babilonya? (b) Sa unsang paagi kining panghitaboa nakaapekto sa mga Saksi ni Jehova?
“ANG Dakong Babilonya napukan!” Oo, gikan sa panglantaw ni Jehova ang tibuok-kalibotang empiryo sa bakak nga relihiyon napukan. Tinuod kini sukad pa niadtong 1919, sa dihang ang nahibilin sa mga igsoon ni Kristo nakalingkawas gikan sa impluwensiya sa Kakristiyanohan, ang pangunang bahin sa mistikong Babilonya. Ingong resulta, may kagawasan sila sa pagyagyag sa bakak nga relihiyon ug sa pagpahibalo sa matarong nga pagmando sa Diyos pinaagi sa Mesiyanikong Gingharian. Sulod niining sigloha giyagyag sa maunongong mga Saksi ni Jehova ang kapunongan sa kontroladong mga relihiyon ni Satanas, nga maoy iyang gigamit sa pagpahisalaag “sa tibuok gipuy-ang yuta.”—Pinadayag 12:9; 14:8; 18:2.
Sa Unsang Paagi Napukan ang Dakong Babilonya?
2. Unsay presenteng kahimtang sa mga relihiyon sa kalibotan?
2 Hinunoa, mahimong may mangutana, ‘Nganong makaingon ka nga napukan ang Babilonya, sa dihang daw milambo ang relihiyon sa daghang nasod?’ Ang Katolisismo ug Islam nangangkon nga ang matag usa kanila adunay kapin sa usa ka bilyong magtutuo. Ang Protestantismo nagauswag gihapon sa kayutaan sa Amerika, diin padayong nanungha ang mga simbahan ug mga kapilya. Gatosan ka milyon ang nagatuman sa mga rituwal sa Budhismo ug Hinduismo. Apan, sa unsang sukod kining tanang relihiyon nahimong positibong impluwensiya sa panggawi niining binilyong membro? Nakapugong ba kini sa mga Katoliko ug mga Protestante sa pagpinatyanay sa usag usa sa Amihanang Irlandia? Nakadala ba kinig tinuod nga kalinaw sa mga Hudiyo ug mga Muslim sa Tungang Sidlakan? Nakatultol ba kini sa panaghiusa tali sa mga Hindu ug mga Muslim sa India? Ug, niining mas ulahi, nakapugong ba kini sa mga Ortodoksong Serbiano, mga Katolikong Croatiano, ug mga Muslim nga taga-Bosnia sa pagbuhat ug “etnikong pagpuo,” pagpanulis, pagpanglugos, ug pagpinatyanay sa usag usa? Subsob ang relihiyon usa lamang ka ngalan, usa ka nipis nga alukabhang nga mabuak ubos sa gamay kaayong pagpit-os.—Galacia 5:19-21; itandi ang Santiago 2:10, 11.
3. Nganong ang relihiyon ginahukman sa atubangan sa Diyos?
3 Gikan sa panglantaw sa Diyos, ang pagpaluyo sa daghang tawo sa relihiyon dili makapausab sa usa ka dili-kalikayang kamatuoran—ang tanang relihiyon ginahukman atubangan sa Diyos. Ang Dakong Babilonya, sumala sa gipamatud-an sa kasaysayan niini, takos sa daotang paghukom tungod kay “ang iyang mga sala nagtipun-og sangko sa langit, ug nahinumdoman sa Diyos ang iyang inhustisya nga mga buhat.” (Pinadayag 18:5) Sa matagnaong pinulongan si Oseas nagsulat: “Kay gipugas nila ang hangin, ug maani nila ang alimpulos.” Ang tanang bakak nga relihiyon ni Satanas sa tibuok kalibotan pagalaglagon tungod sa ilang pagpanghimakak sa Diyos, sa iyang gugma, sa iyang ngalan, ug sa iyang Anak.—Oseas 8:7; Galacia 6:7; 1 Juan 2:22, 23.
Kinahanglang Mopili Ka
4, 5. (a) Sa unsang mga kahimtang kita nagkinabuhi karon? (b) Unsang mga pangutana ang kinahanglang atong tubagon?
4 Kita nagkinabuhi sa ulahing bahin sa “kataposang mga adlaw,” ug ingong tinuod nga mga Kristohanon kita nanlimbasog aron makalabang buhi niining “makuyaw nga mga panahon nga lisod sagubangon.” (2 Timoteo 3:1-5) Ang tinuod nga mga Kristohanon maoy temporaryong molupyo sa kalibotan ni Satanas, nga sa pagkatinuod nagbanaag sa iyang dunot nga personalidad ingong usa ka mamumuno, bakakon, ug tigpasipala. (Juan 8:44; 1 Pedro 2:11, 12; Pinadayag 12:10) Kita gilibotan sa kapintasan, panglimbong, panikas, kadunotan, ug dayag nga imoralidad. Wala na tagda ang mga prinsipyo. Ang paghunahuna lamang sa kaugalingon ug sa kaugalingong kaayohan ug pagpatuyang maoy mga pulong nga nagpaila sa kahimtang. Ug sa daghang kaso gikonsente sa klero ang moral nga kadunotan pinaagi sa pagdaot sa tin-aw nga pagsaway sa Bibliya labot sa homoseksuwalidad, pakighilawas, ug panapaw. Busa ang pangutana mao, Imo bang gipaluyohan ug gikonsente ang bakak nga pagsimba, o ikaw ba aktibong nakig-ambit sa matuod nga pagsimba?—Levitico 18:22; 20:13; Roma 1:26, 27; 1 Corinto 6:9-11.
5 Karon maoy panahon na sa pag-ayag. Busa, mas daghan ang katarongan sa pag-ila tali sa bakak ug matuod nga pagsimba. Unsa pay laing nahimo sa mga relihiyon sa Kakristiyanohan nga naghimo kanilang salawayon kaayo?—Malakias 3:18; Juan 4:23, 24.
Bakak nga Relihiyon Gihukman
6. Sa unsang paagi gipanghimakak sa Kakristiyanohan ang Gingharian sa Diyos?
6 Bisan pag minilyong membro sa Kakristiyanohan ang regular nga nagbungat sa Pag-ampo sa Ginoo, diin sila nagaampo alang sa pag-abot sa Gingharian sa Diyos, sila masingkamoton nga nagpaluyo sa tanang matang sa politikanhong kapahayagan, nga sa ingon nakalimtan ang maong teokratikanhong pagmando. Mga siglo sa nangagi ang “mga prinsipe” sa Katolikong Simbahan, sama nila Kardinal Richelieu, Mazarin, ug Wolsey, milihok usab ingong sekular nga mga estadista, mga ministro sa kagamhanan.
7. Sa unsang paagi giyagyag sa mga Saksi ni Jehova ang klero sa Kakristiyanohan kapin sa 50 ka tuig kanhi?
7 Kapin sa 50 ka tuig kanhi, sa pulyetong nag-ulohang Religion Reaps the Whirlwind, giyagyag sa mga Saksi ni Jehova ang pagkalangkit sa Kakristiyanohan sa politika.a Ang gisulti kaniadto mapadapat sa samang gibug-aton karon: “Ang matinud-anong pagsusi sa panggawi sa relihiyosong klero sa tanang denominasyon magpadayag nga ang relihiyosong mga pangulo sa tibuok ‘Kakristiyanohan’ maikagon kaayong nag-apil-apil sa politika ‘niining presenteng daotang kalibotan’ ug nalinga sa kalibotanong mga kalihokan niini.” Balik niadtong panahona gisaway pag-ayo sa mga Saksi si Papa Pio XII tungod sa iyang mga pagpakigsabot uban sa Nazing si Hitler (1933) ug sa Pasistang si Franco (1941), ingon man tungod sa pagbayloay ug diplomatikong mga hawas sa papa uban sa manunulong nga nasod sa Hapon niadtong Marso 1942, pipila lamang ka bulan human sa gidungog nga pag-atake sa Pearl Harbor. Napakyas ang papa sa pagpadapat sa pasidaan ni Santiago: “Mga mananapaw, wala ba kamo mahibalo nga ang pakighigala sa kalibotan maoy pakigdumot sa Diyos? Busa, ang bisan kinsa nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.”—Santiago 4:4.
8. Sa unsang paagi ang Iglesya Romano Katoliko nalangkit sa politika karong adlawa?
8 Unsa ang kahimtang karon? Ang papado nalangkit gihapon sa politika, pinaagi sa iyang klero ug pinaagi sa mga hawas niini nga layko. Ang di pa dugayng mga papa nagpakita sa ilang pag-uyon sa Hiniusang Kanasoran pinaagi sa pagpakigpulong nianang mini nga hinimog-tawo alang sa kalinaw sa kalibotan. Usa ka bag-ong isyu sa L’Osservatore Romano, ang opisyal nga mantalaan sa Baticano, nagpahibalo nga pito ka bag-ong mga diplomata, “mga embahador sa Santa Sede,” mipresentar sa ilang mga kredensiyal sa “Santo Papa.” Mahanduraw ba nato si Jesus ug si Pedro nga nalangkit sa maong diplomatikong panagbayloay? Si Jesus wala mosugot nga himoong hari sa mga Hudiyo ug miingon nga ang iyang Gingharian dili bahin niining kalibotana.—Juan 6:15; 18:36.
9. Nganong makaingon kita nga ang Protestanteng mga relihiyon dili mas maarang-arang kay sa ilang Katolikong mga katugbang?
9 Mas maarang-arang ba ang Protestanteng mga pangulo kay sa ilang katugbang nga mga Katoliko? Sa Tinipong Bansa, daghang konserbatibong Protestanteng mga relihiyon, ug ingon man mga Mormon, maoy iladong kaabin sa usa ka politikanhong partido. Ang Christian Coalition nalangkit pag-ayo sa mga politika sa T.B. Ang ubang Protestanteng klero dayag nga kauban sa lahing politikal nga baroganan. Usahay nakalimtan nga sa Tinipong Bansa, ang politikanhong mga tigpamaba sama kang Pat Robertson ug Jesse Jackson gitawag usab ug “mga Reverendo,” ingon man ang Britanikong membro sa Parliamento nga si Ian Paisley sa Amihanang Irlandia. Giunsa nila pagpakamatarong ang ilang mga baroganan?—Buhat 10:34, 35; Galacia 2:6.
10. Unsang tin-aw nga pahayag ang gihimo niadtong 1944?
10 Ingon sa gisukna sa Religion Reaps the Whirlwind niadtong 1944, mangutana usab kita karon: “Ang bisan unsa bang organisasyon nga mosulod ug mga kasabotan uban sa kalibotanong mga gahom ug aktibong naningkamot nga makaapil sa politikanhong mga kalihokan niining kalibotana, nga mangitag bentaha ug panalipod gikan niining kalibotana . . . mahimong simbahan sa Diyos o naghawas kang Kristo Jesus sa yuta? . . . Dayag, ang tanang relihiyonista nga adunay samang mga tumong uban sa mga gingharian niining kalibotana dili mahimong maghawas sa gingharian sa Diyos pinaagi ni Kristo Jesus.”
Ang Espiritu ni Cain sa Bakak nga Relihiyon
11. Sa unsang paagi ang bakak nga relihiyon nagsunod sa panig-ingnan ni Cain?
11 Sa tibuok kasaysayan, ang bakak nga relihiyon nagpakitag espiritu sa mamumunog-igsoon nga si Cain, nga mibuno sa iyang igsoong si Abel. “Ang mga anak sa Diyos ug ang mga anak sa Yawa tataw pinaagi niining butanga: Ang matag usa nga wala magapadayon sa pagbuhat sa pagkamatarong wala magagikan sa Diyos, ni siya nga wala maghigugma sa iyang igsoon. Kay mao kini ang mensahe nga inyong nadungog sukad pa sa sinugdan, nga kita kinahanglang magbaton ug gugma sa usag usa; dili sama kang Cain, kinsa naggikan sa tuman-kadaotang usa ug mipatay sa iyang igsoon. Ug tungod sa unsa nga siya mipatay kaniya? Tungod kay ang iyang kaugalingong mga buhat maoy tuman-kadaotan, apan ang sa iyang igsoon maoy matarong.” Kay wala mouyon sa putli ug dalawatong pagsimba sa iyang igsoon ngadto sa Diyos, si Cain miliso sa kapintasan—ang kataposang himoon niadtong dili makapatin-aw sa ilang mga lihok.—1 Juan 3:10-12.
12. Unsay ebidensiya nga nalangkit ang relihiyon sa mga gubat ug mga panag-away?
12 Gipaluyohan ba sa mga kamatuoran kining paghukom sa bakak nga relihiyon? Sa librong Preachers Present Arms, ang awtor nag-ingon: “Sa kasaysayan sa mga buhilaman, . . . duha ka gahom ang kanunay nga magkauban sa panagkomboya. Kini mao ang gubat ug ang relihiyon. Ug, sa tanang dagkong mga relihiyon sa kalibotan, . . . wala nay molabaw pa ka debotado sa [gubat] kay sa [Kakristiyanohan].” Pila ka tuig sa miagi, ang mantalaang The Sun sa Vancouver, Canada, nagpahayag: “Tingali kahuyangan sa tanang organisadong relihiyon nga ang simbahan nasyonalistiko . . . Unsang gubata ang gisangka sukad diin ang Diyos wala angkona nga anaa sa matag kiliran?” Malagmit nakita nimo ang pamatuod niini diha sa pila ka lokal nga simbahan. Kasagaran, ang nasodnong mga bandera nagdayandayan sa altar. Sa imong hunahuna ubos sa unsang bandera si Jesus momartsa? Ang iyang mga pulong milanog latas sa daghang siglo: “Ang akong gingharian dili bahin niining kalibotana”!—Juan 18:36.
13. (a) Sa unsang paagi napakyas ang bakak nga relihiyon sa Aprika? (b) Unsang ilhanan sa Kristiyanidad ang gihatag ni Jesus?
13 Wala tudloi sa mga relihiyon sa Kakristiyanohan ang ilang mga panon sa kamatuoran sa tinuod inigsoong gugma. Hinunoa, ang nasodnon, tribonhon, ug etnikong mga kasungian gitugotang mahimong hinungdan sa pagkabahinbahin sa ilang mga membro. Ang mga taho nagpakita nga ang Katoliko ug Anglikanong klero nagdula ug dako sa mga pagkabahinbahin nga misangpot sa tribonhong pagpuo sa rasa sa Rwanda. Ang The New York Times nagtaho: “Ang mga pagmasaker sa Rwanda nakapahinabo sa daghang Romano Katoliko didto nga mobating gilimbongan sa pamunoan sa simbahan. Sagad nabahin ang simbahan bahin sa etnikong mga kagikan, tali sa Hutu ug Tutsi.” Ang mao gihapong mantalaan mikutlo sa usa ka Maryknoll nga pari nga nag-ingon: “Ang simbahan napakyas gayod sa Rwanda niadtong 1994. Daghang taga-Rwanda sa diwa nagsalikway sa simbahan. Nawad-an na kinig kredibilidad.” Sa kasukwahi gayod sa mga pulong ni Jesus: “Pinaagi niini ang tanan mahibalo nga kamo maoy akong mga tinun-an, kon kamo adunay gugma sa inyong taliwala.”—Juan 13:35.
14. Unsang rekord sa panggawi ang gipresentar sa dagkong dili-Kristohanong mga relihiyon?
14 Ang ubang dagkong mga relihiyon sa Dakong Babilonya wala makahatag ug maayong panig-ingnan. Ang ngilngig nga mga pagmasaker niadtong 1947, sa dihang gibahin ang India, nagpakita nga ang dagkong mga relihiyon didto wala makapatunghag pagkamatugoton. Ang nagpadayong kapintasan sa katilingban sa India nagpamatuod nga kadaghanan sa mga tawo wala mag-usab. Dili ikahibulong nga ang magasing India Today naghinapos: “Ang relihiyon maoy bandera diin ubos niana ang labing daotang mga krimen ginahimo. . . . Kini nakapatunghag hilabihang kapintasan ug maoy usa ka malaglagon kaayong puwersa.”
“Dayag nga Panagsumpaki”
15. Unsay kahimtang sa relihiyon sa kasadpang kalibotan?
15 Bisan ang sekular nga mga komentarista nakamatikod sa kapakyasan sa relihiyon sa pagkombinsir, sa pagsilsil sa matuod nga mga sukdanan, ug sa pagsukol sa pagpasulod sa sekularismo. Sa iyang librong Out of Control, ang kanhing nasodnong magtatambag sa seguridad sa T.B. nga si Zbigniew Brzezinski misulat: “Usa ka dayag nga panagsumpaki nga ang labing dakong kadaogan alang sa ideya nga ‘ang Diyos patay’ nahitabo dili diha sa gigamhan-sa-Marxista nga mga estado . . . kondili diha sa may kagawasang demokratikong mga katilingban sa Kasadpan, nga sa kultural nga paagi nakamatuto ug kawalay-pagtagad sa moral. Sa Kasadpang mga katilingban, ang kamatuoran mao nga ang relihiyon dili na usa ka dakong puwersa sa katilingban.” Siya mipadayon: “Ang impluwensiya sa relihiyon sa Uropanhong kultura mikunhod ug dako, ug ang Uropa karon—mas labaw pa kay sa Amerika—maoy usa gayod ka sekular nga katilingban.”
16, 17. (a) Unsang tambag ang gihatag ni Jesus bahin sa klero sa iyang adlaw? (b) Unsang maayong prinsipyo ang gipahayag ni Jesus mahitungod sa mga bunga?
16 Unsay giingon ni Jesus bahin sa Hudiyonhong klero sa iyang adlaw? “Ang mga eskriba ug ang mga Fariseo nagpalingkod sa ilang kaugalingon diha sa lingkoranan ni Moises [sa pagtudlo sa Torah, ang Kasugoan]. Busa ang tanang butang nga ilang isulti kaninyo, buhata ug sunda, apan ayaw pagbuhat sumala sa ilang mga buhat, kay sila nagapanulti apan dili mohimo.” Oo, ang relihiyosong pagkasalingkapaw dili bag-o.—Mateo 23:2, 3.
17 Ang bunga sa bakak nga relihiyon nagkondena niini. Ang lagda nga gihatag ni Jesus mapadapat kaayo: “Ang matag maayong kahoy nagapatunghag maayong bunga, apan ang matag daot nga kahoy nagapatunghag walay-pulos nga bunga; ang usa ka maayong kahoy dili makapamungag walay-pulos nga bunga, ni ang usa ka daot nga kahoy makapatunghag maayong bunga. Ang matag kahoy nga wala magapatunghag maayong bunga ginaputol ug ginasalibay ngadto sa kalayo. Nan, sa pagkatinuod, pinaagi sa ilang mga bunga inyong mailhan kanang mga tawhana.”—Mateo 7:17-20.
18. Sa unsang paagi angay huptan sa Kakristiyanohan nga hinlo ang mga membro niini?
18 Kon ang mga relihiyon sa Kakristiyanohan estrikto sa pagpadapat sa Kristohanong disiplina sa pagpalagpot, o pag-ekskomunikar, sa tanang malapasong mga buhat nga gihimo niadtong nag-angkon nga mga membro niini, unsay mahitabo? Unsay mahitabo niadtong tanang dili mahinulsolong mga bakakon, mga makihilawason, mga mananapaw, mga homoseksuwal, mga mangingilad, mga kriminal, mga tigbaligya ug droga ug mga giyanon sa droga, ug mga membro sa organisadong krimen? Sa walay duhaduha, ang dunot nga bunga sa Kakristiyanohan naghimo lamang niini nga takos nga laglagon sa Diyos.—1 Corinto 5:9-13; 2 Juan 10, 11.
19. Unsang mga pangangkon ang gihimo mahitungod sa relihiyosong pagpangulo?
19 Ang asembliya heneral sa Presbiteryanong Simbahan sa Tinipong Bansa miangkon: “Kita nag-atubang ug usa ka krisis nga makalilisang sa gidak-on ug epekto niini. . . . Tali sa 10 ug 23 porsiento sa klero sa tibuok nasod nalangkit sa mahilay nga panggawi o seksuwal nga kontak sa mga membro sa parokya, mga kliyente, mga empliyado, ubp.” Usa ka negosyante sa T.B. ang nagpalutaw ug maayo sa punto: “Ang relihiyosong mga institusyon napakyas sa pagpasa sa ilang moral nga mga sukdanan, ug sa daghang kaso, nahimong bahin sa suliran.”
20, 21. (a) Sa unsang paagi gisaway ni Jesus ug ni Pablo ang pagkasalingkapaw? (b) Unsang mga pangutana ang nagpabiling pagatubagon?
20 Ang pagsaway ni Jesus sa relihiyosong pagkasalingkapaw tinuod karong adlawa sama niadto sa iyang panahon: “Kamong mga salingkapaw, si Isaias haom nga mipropesiya bahin kaninyo, sa dihang siya miingon, ‘Kini nga katawhan nagapasidungog kanako pinaagi sa ilang mga ngabil, apan ang ilang kasingkasing layo nga nahimulag kanako. Kawang nga sila nagsigig simba kanako, tungod kay nagatudlo sila ug mga sugo sa tawo ingong mga doktrina.’” (Mateo 15:7-9) Ang mga pulong ni Pablo kang Tito naghubit usab sa atong modernong kahimtang: “Sila nagpahayag sa dayag nga sila nakaila sa Diyos, apan sila wala-magaangkon kaniya pinaagi sa ilang mga buhat, tungod kay sila kasilaganan ug dili-masinugtanon ug dili inuyonan sa bisan unsang matang sa maayong buhat.”—Tito 1:16.
21 Si Jesus nag-ingon nga kon giyahan sa buta ang usa ka buta, silang duha mahulog sa gahong. (Mateo 15:14) Buot ba nimong malaglag uban sa Dakong Babilonya? O buot ba nimong molakaw diha sa tul-id nga mga dalan uban sa imong mga mata nga bukas ug motagamtam sa panalangin ni Jehova? Ang mga pangutana karon nga atubangon nato mao: Unsang relihiyona, kon aduna man, ang nagpatunghag diyosnong mga bunga? Sa unsang paagi nato mailhan ang matuod nga pagsimba nga dalawaton sa Diyos?—Salmo 119:105.
[Footnote]
a Gipatik sa Watchtower Bible and Tract Society of New York, Inc., niadtong 1944; dili na mabatonan karon.
Nahinumdom Ka Ba?
◻ Unsay presenteng baroganan sa Dakong Babilonya atubangan sa Diyos?
◻ Sa unsang pasikaran gihukman ang bakak nga relihiyon?
◻ Sa unsang paagi gipakita sa bakak nga relihiyon ang espiritu ni Cain?
◻ Unsang prinsipyo ang gipahayag ni Jesus alang sa paghukom sa bisan unsang relihiyon?
[Hulagway sa panid 13]
Sa tibuok kasaysayan ang relihiyosong mga pangulo nag-apil-apil sa politika
[Hulagway sa panid 15]
Kining mga klerigo mga gamhanan usab nga estadista
Kardinal Mazarin
Kardinal Richelieu
Kardinal Wolsey
[Picture Credit Line]
Kardinal Mazarin ug Kardinal Richelieu: Gikan sa librong Ridpath’s History of the World (Tomo VI ug Tomo V sa tinagsatagsa). Kardinal Wolsey: Gikan sa librong The History of Protestantism (Tomo I).