Ikaw ba ug ang imong kapikas morag iring ug iro? Mora ka bag naglakaw sa yuta nga gitamnag bomba nga magsige kag bantay kay basig duna kay masulti o mahimo nga moresultag away?
Kon mao, makasalig ka nga mahimong mapauswag ang inyong kahimtang. Apan sayra una kon nganong magsige mog lalis.
MGA HINUNGDAN
Dili-pagsinabtanay.
Ang asawa nga ginganlag Jilliana miadmitir: “Usahay may masulti ko sa akong bana nga sabton niyag lahi. O kaha abi nakog may gisulti ko niya pero wala diay!”
Lainlain ug opinyon.
Bisag bagay mo ug personalidad sa imong kapikas, usahay dili mo parehas ug panglantaw. Ngano? Kay walay tawo nga siyento porsiyentong parehas—usa ka kamatuoran nga mahimong lamas o hinungdan sa tensiyon sa kaminyoon. Apan para sa kadaghanang magtiayon, kini makahatag ug tensiyon.
Dili maayog sulondan.
“Ang akong ginikanan pirmeng maglalis ug walay tahod manulti,” miingon si Rachel, “mao nga sa naminyo ko, ang akong sinultihan sa akong bana parehas sa sinultihan ni Mama kang Papa. Wala ko makakat-on sa pagpakitag pagtahod.”
Mas lawom nga rason.
Sagad ang init nga gilalisan dili gayod mao ang isyu. Pananglitan, ang lalis tingali nagsugod sa pagsultig “Pirme kang late!” pero ang isyu dili ang pagka-late, kondili ang pagbati sa kapikas nga wala siya pakitai ug konsiderasyon.
Bisag unsa pay hinungdan, ang kanunayng panaglalis makadaot sa panglawas ug basin moresulta pag panagbulag. Nan, unsay imong mahimo aron malikayan ang panaglalis?
ANG IMONG MAHIMO
Ang maayong paagi sa paglikay sa panaglalis mao ang pagkahibalo kon unsa gayoy hinungdan niana. Dihang kalmado na mo, sulayi kining mosunod.
1. Sa tagsa-tagsa ka papel, isulat kon unsay inyong gilalisan dili pa dugay. Pananglitan, tingali ang bana mosulat, “Tibuok adlaw kang nakig-uban sa imong mga amiga ug wala ka manawag nako kon diin ka.” Ang asawa tingali mosulat pod, “Nasuko ka kay nakig-uban ko sa akong mga amiga.”
2. Uban sa bukas nga hunahuna, hisgoti ninyo kini: Dako ba gayong butang ang inyong gilalisan? Puwede ra ba unta kining mapalabay? Usahay, aron walay away, dawata nga lainlain gyod ug opinyon ang tawo, ug taboni na lang kinig gugma.—Prinsipyo sa Bibliya:Proverbio 17:9.
Kon makita ninyo nga gamay ra kadto nga butang, pangayog pasaylo sa usag usa ug ayaw na kini hisgoti pag-usab.—Prinsipyo sa Bibliya:Colosas 3:13, 14.
Pero kon sa inyong tan-aw ang problema dili angayng palabyon, himoa kining sunod nga lakang.
3. Isulat ang imong gibati sa naglalis mo, ug ipasulat pod sa imong kapikas ang iyang gibati. Pananglitan, ang bana tingali mosulat, “Morag mas gusto kang makig-uban sa imong mga amiga kay kanako.” Ang asawa tingali mosulat, “Gitratar ko nimo nga morag bata nga kinahanglang mananghid pa sa amahan.”
4. Pagbayloay mo ug papel, ug dayon basaha ang komento sa imong kapikas. Unsa man gayoy iyang gibati dihang naglalis mo? Hisgoti kon unsa untay angayng buhaton sa matag usa kaninyo sa pagsulbad sa isyu nga dili kinahanglang maglalis.—Prinsipyo sa Bibliya:Proverbio 29:11.
5. Pag-estorya mo kon unsay inyong nakat-onan gikan niini. Unsaon ninyo pagpadapat ang inyong nakat-onan sa pagsulbad ug sa pagsanta sa mga panaglalis?
