“Dugang Kadasig ug Gugma kay Sukad Masukad”

NAG-ANAM ka init ang panahon nianang Biyernes sa buntag sa Septiyembre 1922 samtang ang 8,000 ka tawo nanulod sa awditoryum. Gipahibalo sa tsirman nianang importanteng sesyon nga si bisan kinsa puwedeng mogawas, pero dili na puwedeng mosulod ug balik.

May mga awit nga gikanta panahon sa pangbukas nga “Praise Service,” ug human niana si Joseph F. Rutherford miadto sa plataporma. Kadaghanan sa mamiminaw naghinamhinam sa sunod nga mahitabo. Ang pipila nagpasopaso, nga dili mahimutang tungod sa kainit. Gihangyo sila sa mamumulong sa paglingkod ug pagpaminaw. Pagsugod sa pakigpulong, diha kahay nakamatikod sa dakong panapton nga gilukot ug gihigot sa ibabaw?

Si Brader Rutherford naghisgot sa tema nga “Haduol na ang gingharian sa langit.” Sulod sa mga usa ka oras ug tunga, ang iyang puwersadong tingog naglanoglanog sa awditoryum samtang gihisgotan niya kon sa unsang paagi ang mga propeta kaniadto maisogong nagpahibalo sa pag-abot sa Gingharian. Dayon, siya nangutana, “Motuo ba mo nga ang Hari sa kahimayaan nagsugod na paghari?” Ang mamiminaw mitubag ug makusog nga “Oo!”

“Nan, balik kamo sa kanataran, Oh kamong mga anak sa labing hataas nga Diyos!” Dayon, milanog ang tingog ni Brader Rutherford: “Tan-awa, ang Hari nagmando! Kamo ang iyang mga magwawali. Busa, imantala, imantala, imantala.”

Nianang tungora, ang gilukot nga panapton nga gihigot sa ibabaw gibukhad, ug nakita ang eslogan: “Imantala ang Hari ug ang Gingharian.”

“Nalipay kaayo ang mamiminaw,” nahinumdom si Ray Bopp. Si Anna Gardner miingon nga “daw nauyog ang mga salagunting tungod sa kasipa sa palakpak.” “Ang tanan nanindog,” matod ni Fred Twarosh. Si Evangelos Scouffas miingon, “Daw gibutad mi gikan sa among mga lingkoranan, ug nanindog mi nga nanglugmaw ang among mga luha.”

Daghan sa nanambong niana nga kombensiyon ang nagsangyaw na sa maayong balita sa Gingharian. Apan niining tungora, sila mas nadasig pa. Si Ethel Bennecoff nag-ingon nga ang mga Estudyante sa Bibliya namauli nga may “dugang kadasig ug gugma kay sukad masukad.” Si Odessa Tuck, nga 18 anyos niadtong panahona, determinadong mosunod sa awhag nga “Kinsay moadto?” Siya miingon: “Wala ko mahibalo kon asa o kon sa unsang paagi o kon unsay iyang gipasabot. Ang ako lang nahibaloan mao nga gusto nakong sundogon si Isaias, kinsa miingon: ‘Ania ako! Ipadala ako.’” (Isa. 6:8) “Kanang halandomong adlaw,” matod ni Ralph Leffler, “mao gyoy sinugdanan sa pagmantala sa Gingharian nga milukop na karon sa tibuok yuta.”

Mao diay nga kining 1922 Cedar Point, Ohio, nga kombensiyon nahimong importante nga bahin sa atong teokratikanhong kasaysayan! Si George Gangas miingon, “Ang maong kombensiyon nakadasig nako nga dili gyod mopalta sa pagtambong.” Sa iyang mahinumdoman, wala gyod siyay napaltahang kombensiyon. Si Julia Wilcox misulat: “Dili nako mahubit ang kalipay nga akong bation sa matag higayon nga hisgotan sa atong mga publikasyon ang Cedar Point 1922. Matukmod gyod ko sa pag-ingon, ‘Salamat Jehova, nga nakatambong ko ana.’”

Lagmit, daghan kanato ang may susamang halandomong mga kasinatian sa usa ka kombensiyon nga ilabinang nakapalipay ug nakapadasig kanato, ug mas nakapalalom sa atong gugma sa atong gamhanang Diyos ug sa iyang gientronong Hari. Samtang handomon nato kana, kita usab matukmod sa pag-ingon, “Salamat Jehova, nga nakatambong ko ana.”