Magmasiboton sa Pagmantala sa Balita sa Gingharian
1 Si Jehova maoy Diyos sa maayo kaayong mga buhat, ug siya masiboton sa pagpalampos niana. Ang tanang buhaton niya maoy sa ikaayo kanilang nagaalagad kaniya. Si Jesus nagpahimutag maayo kaayong panig-ingnan sa pagsundog sa kasibot sa iyang Amahan. Kita usab kinahanglang magpasundayag ug kasibot sa atong pag-alagad kang Jehova nga Diyos kon buot ta nga mailhan ingong usa ka katawhang “masiboton sa maayo kaayong mga buhat.”—Tito 2:14.
2 Ang maayong binuhatan sa mga Kristohanon makapaayo sa uban. Ang labing makapaayong butang nga atong mabuhat alang sa laing tawo mao ang pagtabang kaniya sa pagkaila ug pag-alagad kang Jehova. (Juan 17:3) Atong gipaabot ang maong tabang pinaagi sa atong masibotong pagsangyaw sa Gingharian ug buluhatong paghimog tinun-an.
3 Unsa may kasibot? Ang kasibot maoy mainit nga pagbati. Ang Kristohanong kasibot nagasumikad sa maikagong tinguha sa pagbuhat kon unsay matarong ug husto. Ang Gregong pulong sa “kasibot” maoy “pagbukal.” Ingong mga ministro sa Diyos, ato gayong ipasundayag kining hiyasa samtang imantala ta ang mensahe sa Gingharian. Kita ba masiboton diha sa ministeryo? Ato ba gayong gibuhat ang tanan tang maarangan sa pagbulig sa uban sa pagkakat-on sa mga katuyoan ni Jehova?
IPAKITANG KASIBOT SA PAGTANYAG SUSKRISYON
4 Sa bulan sa Oktubre, kita may pribilehiyo na usab sa pagtanyag sa suskrisyon sa Pagmata! sa usa ka tuig. Ang Pagmata! nagapaalinggat sa mga magbabasa niini sa hinungdanong mga hitabo sa kalibotan. Ang makapatagad nga mga ilustrasyon niini nagahulagway sa mga kahibulongan sa paglalang nga magpahaling sa interes sa bag-ong kalibotan ug magpalalom sa pagpabili alang sa mahigugmaong Maglalalang.
BUHATA ANG ATONG BAHIN
5 Sa dili pa kita sa husto modasig sa mga mabuot-kasingkasing sa pagbasa sa atong mga magasin, gikinahanglan ta nga masayod sa kaundan sa matag magasin. Ato gayong sination ang paagi sa pagsumpay sa Ulohan nga Mahisgotan sa gula nga atong gamiton sa pagtanyag. Unsang tinong mga puntos diha sa magasin ang atong mahisgotan? Kon gahinan tag panahon sa pagsinati sa mga magasin ug diha sa ato mismong hunahuna tukoron ang kadasig alang niini, kita masangkapan sa pagtanyag niini uban ang kasibot ngadto kanilang anaa sa atong teritoryo.
6 Dugang pa, pinaagig pagdala sa kinabag-ohang mga magasin samtang nagasuroy-palit, nagasakay sa publikong sakyanan, sa tunghaan, sa atong dapit trabahoan, o hain man kita moadto, kita makahimo sa pagpahimulos sa angayng mga kahigayonan sa pagpamatuod. Ang usa ka maayo-pagkapili nga pasiuna gikan sa librong Nangatarongan dinuyogan sa usa ka punto gikan sa usa sa mga artikulo mahimong mopukaw sa interes sa tawo sa pagbasa sa atong mga magasin.
7 Kon mouyon ang tawo sa pagbasa sa mga magasin, atong mahisgotan ang kahimtang sa atong buluhaton ug kon sa unsang paagi gipatik kining mga magasina sa makaduha sa bulan ingong bahin sa usa ka tibuok-kalibotang edukasyonal nga buluhaton sa Bibliya. Ang impormasyon diha sa panid 4 sa Pagmata! maayo gayong nagapatin-aw niini. Sanglit kay ang mga kaundan sa sunod nga gula gitala man kanunay, makasukna kitag malangkitong mga pangutana o ikapatagad ang mosunod nga mga artikulo. Kini magpagana sa maong tawo ug magpalihok kaniya sa pagsulti sa tinguhang mosuskriber sa mga magasin.
8 Tungod kay kini maoy makuyaw nga mga panahon, ang mensahe nga atong dala maoy dinalian. Aduna ing panginahanglan alang kanato nga magmasiboton sa pagmantala sa balita sa Gingharian, nga nagadasig sa uban nga makaila sa Diyos ug sa iyang Pulong. Pinaagig masibotong pagmantala niining nagahatag-kinabuhi nga kahibalo, atong gipamatud-an ang atong diyosnong debosyon ug atong gugma kang Jehova. Sa dugang ta nga pakig-ambit sa pagmantala sa mensahe sa Gingharian, mas dako man ang kasibot ta ug nagapamatuod nga kita gayod maoy katawhan nga masiboton alang sa maayo kaayong mga buhat.