Memoryal—Ang Kristohanong Selebrasyon
1 Gihimo ni Jesus ang Memoryal sa Nisan 14, 33 K.P., ug siya misugo sa iyang mga apostol: “Padayong buhata kini sa paghinumdom kanako.” (Luc. 22:19) Gipatin-aw ni Pablo nga sa pagbuhat niana “padayon ninyong gimantala ang kamatayon sa Ginoo, hangtod sa iyang pag-abot.” (1 Cor. 11:26) Maoy tukma nga saulogon ang kamatayon ni Jesus tungod sa tanan nga nalampos niana sa katumanan sa mga katuyoan ni Jehova. Ang halad lukat nagatagana sa basihanan gayod alang sa atong pagtuo ug nagahatag kanatog paglaom sa umaabot nga kinabuhi.
2 Sukad sa sinugdanan sa Kristohanong kongregasyon, ang mga tinun-an ni Jesus matinumanong nagsaulog sa Memoryal. Sa modernong mga panahon gikataho sayo sa 1899 nga 2,501 didto sa Estados Unidos ang miambit sa selebrasyon sa Memoryal. Karon, 92 ka tuig sa ulahi, ang Nisan 14 matunong sa Sabado, Marso 30, human sa pagsalop sa adlaw, ug kapin sa napulo ka milyong mga tawo sa tibuok kalibotan ang gidahom nga motambong.
PANGANDAM GIKINAHANGLAN SA MGA ANSIYANO
3 Tungod sa kahinungdanon niini nga okasyon ug ang gidahom nga daghang motambong, ang mga kongregasyon mangandam nga abante. (1 Cor. 14:40) Ang rituwal ug mapig-ot nga pormalidad wala kinahanglana. Wala, kay sa Mateo 26:26-30 atong mamatikdan ang pagkayano nga kini nga selebrasyon gisugdan ni Jesus. (1 Cor. 11:23-26) Apan ang pipila hinungdanong mga detalye gikinahanglang sundon kon ang Memoryal saulogon man sa hustong paagi. Unsa man kini?
4 Una, paneguroon sa mga ansiyano nga igapakita ang pagtahod sa Panihapon sa Ginoo pinaagig pagbaton sa hustong mga emblema. Ang walay lebadurang tinapay, nga ginama lang sa trigong harina ug tubig mahimo mang gamiton. Usab, ang walay sagol lamang nga pulang bino sa ubas, sama sa Chianti, Burgundy, o Claret, ang kinahanglang gamiton. Magamit man usab ang ginama-balay nga pulang bino kon kini wala ing kamay o panagol.
5 Gusto usab sa mga ansiyano sa pagpili sa panig-ingnang mga igsoon, gipalabi ang mga ansiyano o ministeryal nga mga alagad, sa pagsilbe sa mga emblema. Kini sila kinahanglang organisado-kaayo ug nakasabot gayod kon unsa ang nalangkit sa ilang asaynment. Kinahanglang sination ang ‘attendants’ sa ilang mga kaakohan, sama sa pagtultol sa mga tawo ngadto sa hawanan ug pagkontrolar sa trapiko. Kini ilabinang importante kon pipila ka kongregasyon ang mogamit sa samang Kingdom Hall. Kinahanglan usab nga sa husto mapahibalo ang mamumulong sa panahon ug dapit sa selebrasyon.
PERSONAL NGA PANGANDAM
6 Ang tanan kanato kinahanglang manlimbasog nga bug-os nga makabenepisyo gikan niining labing balaan nga selebrasyon. Sa panghunahuna atong maandam ang atong kaugalingon pinaagig suod nga pagsunod sa pagbasa sa Bibliya para sa Marso 25-30, ingon sa gimatikdan sa atong kalendaryo ug sa panid 3 niini nga Atong Ministeryo sa Gingharian. Usab, ato gayong dapiton ug buligan ang daghang mga tawo nga maarangan sa pagtambong. Ug kinahanglang atong pabation nga giabiabi kadtong manambong.
7 Pinaagig bug-os abante nga pagpangandam, atong ikapakita nga kita nagaisip sa pagtambong sa Memoryal ingong pribilehiyo ug usa ka higayon sa pagpakitag apresasyon alang sa halad ni Kristo. Hinaot nga ang selebrasyon sa Memoryal niining tuiga mapamatud-an nga usa ka panahon sa makapalig-ong pagdinasigay alang sa tanang alagad ni Jehova. Hinaot nga kini magpatisok nganhi kanatong tanan sa espiritu sa pagsalig nga gipasundayag ni Jesus. Ang atong pagsalig kang Jehova motabang kanato sa pagbuntog sa kalibotan ug sa pagkab-ot sa atong tagsatagsa ka ganti.—Juan 16:33; 2 Ped. 1:10; Pin. 7:9, 10, 14.