Usa ka Bag-ong Tuig sa Pag-alagad
1 Nagasugod sa Septiyembre ang 1992 nga tuig sa pag-alagad. Samtang lingion ta ang bag-o lang natapos nga 1991 nga tuig sa pag-alagad, kita makamaya sa mga panalangin ni Jehova. Mga linibo ang nabawtismohan, ug nakita ta ang maayo kaayong mga pag-uswag diha sa gidaghanon sa mga magmamantala ug mga pagtuon sa Bibliya. Kini ba usab tinuod diha sa inyong kongregasyon?
2 Apan karon panahon na sa paglantaw sa unahan ug ipahimutang ang mga tumong sa umaabot nga tuig. Human masubli ang report sa miaging tuig, kita nagatuo nga ang mosunod tulo ka tumong maoy angay alang kanatong tanan nga pagakab-oton: (1) Pauswagon ang pagkamakanunayon sa pag-alagad, nga nagakahulogan nga senemanang pagsangyaw. Nagalakip usab kini sa regular nga pagtaho sa atong binuhatan sa kanataran sa matag bulan. (2) Matag magmamantala magdumalag usa ka pagtuon sa Bibliya sa balay. Kubos sa 25% sa mga magmamantala sa kongregasyon ang nagadumalag mga pagtuon sa pagkakaron. Nganong di himoong imong personal nga tumong sa pagsugod ug usa ka pagtuon sulod sa maong tuig? (3) Dugangi ang panahon mo diha sa pag-alagad sa kanataran. Kon posible, manlimbasog nga mahimong oksilyare payunir labing menos makausa sa tuig.
3 Hinaot si Jehova magapanalangin kanimo samtang ginaplano mo karon ang pagbaton ug mas bug-os pang pakig-ambit diha sa iyang buluhaton sulod sa 1992 nga tuig sa pag-alagad.