Kahikayan sa Pagtuon sa Libro sa Kongregasyon
Bahin 2—Panginahanglan sa Pagpangandam ug Pakig-ambit
1 Ang ganti maoy dako alang sa tawong nakakaplag sa kaalam ug pag-ila. (Prov. 3:13, 14, 16-18) Ang espirituwal nga kaalam magpaarang sa Kristohanon sa paggamit sa kahibalo gikan sa Pulong sa Diyos diha sa aktibong pagsimba, sa pagsulbad sa matag adlaw nga mga problema, ug sa paghimog mga desisyon mahitungod sa iyang mga tumong sa kinabuhi.
2 Ang Pagtuon sa Libro sa Kongregasyon gidesinyo na aron sa pag-abag kanatong mouswag sa kaalam ug espirituwal nga pagpanabot. Ang regular nga pagtambong kinahanglang mahimong bahin gayod sa atong personal nga programa sa pagkab-ot sa kaalam.—Prov. 4:7-9.
PANGANDAM SA BUG-OS
3 Ang uban sa unang siglo wala manikaysikay sa ilang kaugalingon aron sa pagkat-on sa kamatuoran ug sa pagnunot sa mauswagong kahayag. Sila nagpabiling mga bata diha kang Kristo ug wala masinati sa pulong. (Heb. 5:11-13) Si Pablo miawhag sa kongregasyon sa “pag-uswag ngadto sa pagkahamtong.” (Heb. 6:1) Nagakinahanglan kini nga mas pa kay sa pagpaminaw lamang sa uban nga nagahisgot sa kamatuoran. Ang paghunahuna ug panukiduki gikinahanglan aron pukawon ang atong “matin-aw nga mga panghunahuna,” ug kinahanglang manikaysikay gayod kita sa atong kaugalingon.—2 Ped. 3:1, 2; Luc. 13:24.
4 Ang bug-os nga pagpangandam sa pagtuon sa libro magpalambo sa atong pagsabot ug pagpabili sa materyal. Pero nagakahulogan kini nga mas pa kay sa pagbasa lamang sa mga parapo ug dinalidaling paglinya sa mga tubag. Gikinahanglan tang palandongon ang kahulogan niana ug ang bili niana nganhi kanato sa personal nga paagi. Tan-awa ang gisitar nga mga teksto ug palandonga kon sa unsang paagi kana nalambigit ngadto sa mga parapo.
5 Ang personal nga pagtuon mahimong malisod nga trabaho, apan gipunting ni Pablo ang mga kaayohan sa maong dakong pagtuon, nga nag-ingon: “Ang gahing kalan-on iya sa mga hamtong, ngadto kanilang pinaagig sa paggamit ang ilang mga salabotan nabansay sa pag-ila sa matarong ug daotan.” (Heb. 5:14) Ang maong pagtuon makatabang kanato sa pag-uswag sa pagkahamtong, aron kita makahimog hustong mga desisyon sa kinabuhi.
PAKIG-AMBIT
6 Kita gayod manlimbasog nga moambit sa kada tigom. Ngano? Ang atong mga komento magpatugbaw sa atong pagtuo ug kini magpadasig ug magpalig-on sa atong mga igsoon. (Roma 10:10; Heb. 10:23-25) Ang aktibong pakig-ambit usab makabulig sa atong espirituwal nga kaugmaran. Kon ang mga eksperiyensiyado, mga bata, mga bag-ohang interesado nagakomento ang tanan, ang grupo magapahimulos sa dagayang pagkalainlain sa mga pagpatugbaw, nga kini matulon-anon ug makapahayahay sa tanan.
7 Kon makugihon kitang mangandam para sa Pagtuon sa Libro sa Kongregasyon, regular nga motambong, ug nagapakig-ambit, ang atong pagpangita sa kaalam mahimong malamposon ug kita “makakaplag sa kahibalo gayod sa Diyos.”—Prov. 2, 4, 5.