Padayong Malig-on sa Espirituwal, Pabiling Mahinlo sa Buluhaton ni Jehova
1 Sa Isaias 60:22, si Jehova mihimog saad nga nagakatuman atubangan sa ato mismong mga mata: “Ang usa ka diyutay mismo mahimong usa ka libo, ug ang usa ka gamay mahimong gamhanang nasod. Ako mismo, si Jehova, nagapadali niini sa iyang tinudlong panahon.” Kon mamalandong kita ug usa ka nasod, atong mahulagway ang usa ka mabagang grupo sa katawhan nga natigom pinaagig kumon nga mga intereses ug kinsa nagalihok ubos sa pagbulot-an sa usa ka natukod nga kagamhanan.
2 Ang taho sa pag-alagad sa kanataran sa 1991 nagpakitag kinatas-ang ihap sa mga magmamantala sa maayong balita nga 4,278,820 sa tibuok kalibotan, usa ka 6.5-porsiyentong pag-uswag kay sa miaging tuig. Si Jehova sa pagkamatuod nagatigom sa mabagang panon sa sinserong katawhan kinsa nagtinguhang mobulag sa ilang kaugalingon gikan niining malupigong sistema ug nahimong maunongong mga sakop sa Mesiyanikong Gingharian nga kagamhanan pinaagi sa iyang Anak, si Kristo Jesus. Sa matag tuig ang gidaghanon sa mga natigom nagpadayon sa pag-uswag. Kita malipayon nga nahimong bahin niining nasora nga sa literal mahubit ingong usa ka bag-ong kalibotang Sosyedad. Sa pagsaulog sa Memoryal sa 1991, ang total nga nanambong maoy 10,650,158, usa ka 7-porsiyentong pag-uswag kay sa 1990. Kini nagapasabot sa usa ka dakong purohan sa mas daghan pa nga moduyog kanato ingon nga mga sakop sa Gingharian.
3 Kita nakaamgo, siyempre, nga dili tanang indibiduwal nga nalakip sa gidaghanon sa ibabaw nga nanambong sa Memoryal nakabulag sa ilang kaugalingon niining kalibotana sa gikinahanglang gilapdon nga bug-os nang madawat ingon nga katawhan ni Jehova. Ang katawhan gikan sa tanang mga nasod ‘nagaganayan sa balay ni Jehova,’ apan sila kinahanglang bug-os ‘matudloan sa iyang mga dalan’ aron nga sila “makalakaw sa iyang alagianan.” (Isa. 2:2-4) Kapin sa upat ka milyon nga mitambong sa Memoryal midawat na sa pagtudlo sa Diyos, nakabatog espirituwal nga kusog nga nakapalihok nila sa pagpabiling hinlo sa panggawi ug pagkatakos sa pagpakig-ambit sa pagwali-Ginghariang buluhaton nga karon ginatuman na. (Mat. 24:14) Kana sila may maayong pagbarog sa mga mata ni Jehova ug nagapahimulos sa mga kaayohan sa tanang katingalahang mga tagana nga gihimo niyang mabatonan nila. Unsa may kinahanglang buhaton sa nahibiling kapin sa unom ka milyon kon sila usab mahimong malig-on sa espirituwal ug hinlo sa buluhaton ni Jehova?
4 Gikinahanglan nilang “makigbisog sa pagpanalipod sa pagtuo.” (Jud. 3) Sa dihang sila mopili sa paglakaw sa dalan ni Jehova, sila mailalom sa mga kapit-os gikan sa Yawa pinaagig mga pagsulay, tentasyon, ug daotang mga impluwensiya. Sama kang Pablo, sila kinahanglang molantaw kang Jehova sa kusog nga makalahutay. (Filip. 4:13) Si Jehova nagahatag kusog kanila pinaagi niadtong kinsa lig-on na sa ilang pagtuo. Si Pablo mitambag nga “kita. . . nga mga malig-on angayng mopas-an sa kahuyangon niadtong mga maluyahon.” (Roma 15:1, 2) Sa dihang ang lig-on ug ang huyang magkahiusa, adunay kusog nga makabarog nga lig-on. “Ang duha labing maayo kay sa usa. . . . kon ang usa ka tawo modaog sa usa nga nag-inusara, ang duha makasukol kaniya.”—Eccl. 4:9, 12.
5 Kini nagapasabot nga ang mga bag-ohan sa tukma nagadepende nato ingon nga paagi diin sila makadawat ug kusog kang Jehova. Kita nga dedikadong mga Kristohanon kinahanglang padayong maglig-on sa atong kaugalingon sa espirituwal kon kita motabang man ugaling sa mga bag-ohan. Ang mga Kristohanon nga malig-on ‘makahatag ug espirituwal nga mga gasa,’ nga mosangpot sa ‘pagdinasigay.’ (Roma 1:11, 12) Kini maoy usa sa pangunang mga paagi nga gigamit ni Jehova sa paghiusa nato ug paghimo natong tanan nga ‘malig-on ug kusgan.’—1 Ped. 5:9-11.
6 Kinahanglan tang himoong tumong ang pagbulig niining mga bag-ohan samtang sa samang panahon pabiling matinagdanon sa atong kaugalingong espirituwal nga panginahanglan. (Mat. 5:3) Ang espirituwalidad mao ang yawi sa atong kusog. Kini maoy hiyas nga kinahanglang amomahon ug palig-onon pinaagi sa regular nga pagkaon sa espirituwal nga kalan-on. Pinaagi sa iyang organisasyon, si Jehova nagataganag timbang nga programa sa pagtuon sa iyang Pulong. Ang lima ka senemanang tigom sa kongregasyon nagadulag hinungdanong bahin sa paglig-on nato, ‘nga nagadasig kanato sa gugma ug mga maayong binuhatan.’—Heb. 10:24.
7 Ang mga kaayohan niining mga tigoma mapilopilo kon kini ilambigit sa maayong pamatasan sa personal ug sa pamilyahanong pagtuon. Ingon nga minimo nga tumong, kitang tanan kinahanglang mobasa ug mamalandong sa inadlaw nga teksto, mosunod sa programa sa pagbasa sa Bibliya nga gihan-ay sa Theocratic Ministry School Schedule, ug mangandam sa Pagtuon sa Libro sa Kongregasyon ug Pagtuon sa Bantayanang Torre. Ang matag pamilya maoy motino kon unsaon kana sa pag-organisar, nga nagapaneguro nga kana ginahimo sa regular nga paagi. Usab, ang ulo sa pamilya kinahanglang magalantaw nga ang programa sa pagtuon gipahiuyon aron mahiangay sa espisipikong espirituwal nga panginahanglan sa pamilya. Niining paagiha ang “panimalay mapalig-on. . . . Kini gayod magmatunhayon.” (Prov. 24:3) Kon kita matanlagon sa atong mga batasan sa pagtuon ingon nga mga indibiduwal ug mga pamilya, kita makasalig nga si Jehova magapanalangin kanato ug ang iyang espiritu mobulig kanato sa paglahutay nga malamposon sa nagkadaiyang mga pagsulay.—Sant. 1:2, 3; 1 Ped. 4:11.
8 Padayong Hinlo ug Walay Ikasaway: Samtang si Jehova mainitong nagadapit kanato nga mosuod kaniya, sa samang panahon, iyang gipatin-aw nga kini himoon pinasukad sa atong pagtuo sa giulang dugo ni Jesus, nga “nagahinlo kanato gikan sa tanang sala.” (1 Juan 1:7; tan-awa usab ang Hebreohanon 9:14.) Kita makapadayon sa paglig-on sa atong pagtuo pinaagig personal nga pagtuon sa Pulong sa Diyos ug pagpadapat sa atong nakat-onan. Ang pipila sa ulahi nangapakyas kay sila miayad man sa pagkuhag espirituwal nga pagkaon o diyutay ra ang pagpaningkamot sa pagpadapat niana sa ilang mga kinabuhi. Kini nagabiya nilang mahuyang sa mga atake ni Satanas. Ang pipila nahimong maluya sa espirituwal, nga misangpot sa pagkadiaktibo. Makapasubo, ang uban nagtugot sa ilang kaugalingon nga mailalom sa seryosong kasaypanan, nga nagpahinabo sa pagpalagpot kanila. Si Pablo mipasidaan: “Pasagdi siyang nagahunahuna nga nagabarog magbantay nga siya dili mapukan.” (1 Cor. 10:12) Kon kita sa tinuyo nagapasagad sa atong pagtuon, pagtambong sa tigom, ug pag-alagad, kita daling malit-agan pinaagig daotang mga impluwensiya ug mga tentasyon.—Heb. 2:1; 2 Ped. 2:20-22.
9 Mahinungdanon nga huptan tang mahinlo ang atong kaugalingon sa tanang paagi: sa lawasnong paagi, sa panghunahuna, sa espirituwal, ug sa moral. (2 Cor. 7:1) Ang kalibotan nga nagalibot kanato dugang nga nagakangil-ad ug nagakadaotan sa kada adlaw. Ang Yawa padayong nagasangkap sa mas pang malimbongon nga mga paagi sa paglit-ag kanato. Ang pagpabilin sa atong kaugalingon nga malig-on sa espirituwal magpaseguro nga kita dili ‘ignorante sa iyang mga desinyo ug malupigan.’ (2 Cor. 2:11) Ang instruksiyon ug tambag nga atong madawat gikan sa kapunongan ni Jehova makapaarang kanato sa pag-ila ug pagsukol sa daotang mga impluwensiya.
10 Kadtong nagapanguna sa kongregasyon may responsabilidad sa pagpahilunag maayong panig-ingnan sa uban sa padayong malig-on ug pabiling mahinlo. Si Pablo nagpasiugda niini nga responsabilidad sa dihang siya miingon: “Hinumdomi kadtong nagapanguna kaninyo. . . . Samtang inyong napamalandong kon sa unsang paagi misangpot ang ilang panggawi sundoga ang ilang pagtuo.” (Heb. 13:7) Mahinungdanon nga ang tinudlong mga ansiyano ug ministeryal nga mga alagad maayog panig-ingnan sa ilang personal nga panggawi ingon man sa pag-atiman sa ilang mga kaakohan ingon nga ulo sa pamilya. Sila kinahanglang manlimbasog nga mahisama sa batan-ong Timoteo, kinsa giawhag nga “mahimong panig-ingnan . . . sa sinultihan, sa panggawi, sa gugma, sa pagtuo, sa kaputli.” (1 Tim. 4:12; 1 Ped. 5:3) Ang tanan kanato may bahin niining kaakohana nga mahimong maayong mga panig-ingnan pinaagig paghupot ug dungganong panggawi. Ang mga bag-ohan sagad mohukom sa kamatuoran, ingon man sa organisasyon ni Jehova, kon unsay ilang makita kanato. Buot natong maseguro nga ang ilang makita makadasig kanila sa paghupot sa ilang dapit diha sa mahinlong organisasyon ni Jehova.
11 Ang pagpanigom alang sa paglabang-buhi latas sa “dakong kasakitan” padayong nagakakusog. (Pin. 7:14) Kadto lamang malig-on sa espirituwal ug nagahupot sa ilang kaugalingong mahinlo ang sa ultima mamaluwas. Dako ang nahasalig niining mga butanga: (1) paghupot kanunay ug maayong batasan sa personal nga pagtuon ug pamalandong sa Pulong sa Diyos; (2) pagpakitag tiunay personal nga interes sa usag usa sa tinguhang makapaambit ug pagdasig; ug (3) magabuhat nga hiniusa sa paghupot kanunay sa mahinlong panggawi nga makapasidungog sa ngalan ni Jehova. Ang pagbuhat niining mga butanga magpaseguro kanato sa panalangin ug panalipod ni Jehova sa dihang kining kalibotana modangat sa iyang kataposan. Kita makasalig nga maapil taliwala niadtong “mga matinumanon nga panalipdan ni Jehova.”—Sal. 31:23.