Pag-ani nga Nagakaangay sa Atong Personal nga Panikaysikay
1 Si Jehova nga Diyos nagpasundayag sa iyang gugma sa katawhan diha sa daghang paagi. Gipasiugda ni Jesus ang labaw nga gugma sa Diyos, nga nagapunting ngadto sa natigom nga panon sa katawhan nga ang Diyos “nagpasubang sa iyang adlaw ibabaw sa daotan ug maayong katawhan ug nagapaulan ibabaw sa matarong ug dili matarong katawhan.” (Mat. 5:43-48) Sa laing higayon, si Jesus nagpaila sa labing talagsaong kapahayagan sa gugma sa iyang Amahan—ang halad sa iyang bugtong Anak, kinsa gihatag sa Diyos alang sa atong kaluwasan. (Juan 3:16) Si Jesus nagmaymay sa iyang mamiminaw nga mapabilhong mosanong sa gugma ni Jehova. Naningkamot ba kitang mobuhat niana?
2 Aron kita makapahayag ug bug-os nga pagpabili ug makabaton ug malungtarong kaayohan gikan sa gugma ni Jehova, kinahanglang makaila kita kaniya. (Juan 17:3) Gikinahanglan nato ang tambag ug pagtultol kon unsaon nato pag-alagad kaniya nga dalawaton. Si Jehova mipasundayag sa iyang mahigugmaong pagtagad pinaagi sa paghatag kanato sa iyang dinasig nga Pulong, ang Bibliya, ug pinaagi sa pagbayaw sa iyang katingalahang organisasyon nga pinaagi niana madawat nato ang tambag ug instruksiyon. (Mat. 24:45-47; 2 Tim. 3:16, 17) Ingon nga dedikadong katawhan ni Jehova, kita natudloan diha sa iyang paagi. Apan gipakita ba nato diha sa atong personal nga panikaysikay nga kita mapasalamaton sa gugma ni Jehova? Gitagad ba nato ang iyang tambag aron makapahimuot kaniya ug sa ingon makapulos niana ang atong kaugalingon? (Isa. 48:17; Sant. 1:22) Si apostol Pablo misulat sa 1 Corinto 3:8: “Karon siya nga nagatanom ug siya nga nagapatubig usa ra, apan ang matag tawo magadawat sa iyang kaugalingong ganti sumala sa iyang kaugalingong pagpangabudlay.”
3 Oo, kinahanglang buhaton nato kon unsa ang buot sa Diyos natong buhaton. Dili ang tanan mouswag sa espirituwal sa samang paso. Adunay daghang butang nga mahimong malangkit sa atong pag-uswag, ug dili maalamon ang paghimog makapaluyang mga pagtandi. Hinuon, ang labawng hinungdanon mao ang indibiduwal nga panikaysikay nga atong mahimo. Unsa may atong mabuhat aron mas masuod pa sa organisasyon? Aduna bay mga bahin diin kita makapauswag sa pagdawat sa atong personal nga mga responsibilidad ingon nga mga Kristohanon? Unsa man nga paningkamot ang mahimo aron mas makasuportar sa mga kalihokan sa kongregasyon? Aduna bay mga puntos nga kinahanglan natong ipadapat kon bahin sa mga instruksiyon nga gihatag sa organisasyon kanato?—1 Tim. 4:16.
SUNDOGA ANG MGA MATINUMANON
4 Ang maayong balita sa Gingharian ginawali sa mga matinumanong igsoong lalaki ug babaye sulod sa mga dekada. Kini silang mga matinumanon, sama kang Pablo, takos nga sundogon. (1 Cor. 11:1) Sila misanong sa gugma sa Diyos ug nakaani ug daghang mga kaayohan tungod sa ilang pagpangabudlay ug sa ilang personal nga panikaysikay sa pagsunod sa tambag sa Bibliya. Sila maoy milangkob sa solidong sentro sa aktibong mga magbubuhat sa kongregasyon, wala mosibog sa ilang personal nga responsibilidad. Atong makita ang bunga sa ilang indibiduwal nga paghago.—Roma 1:13; 2 Cor. 3:1-3.
5 Karon, tinagpulo ka libo sa mga bag-ohan nanagpanon ngadto sa organisasyon sa matag tuig. (Isa. 60:8) Sila usab seryoso maylabot sa paghago nga mahimong bug-os-hamtong espirituwal nga mga tawo, ug ang ilang kasibot diha sa pagsangyawng buluhaton takos pagadayegon. Sila nakabenepisyo pinaagi sa paglantaw kon sa unsang paagi si Jehova nagapanalangin niadtong nagapangabudlay sa iyang pag-alagad. Ang ehemplo sa hamtong nga mga igsoong lalaki ug babaye makatabang sa mga bag-ohan nga moapresyar nga dili karon panahon nga magtapol o mohunong sa atong pag-alagad sa Diyos. Mga bag-ohan man o hanas nga magmamantala, nagapadayon ba kita sa pagtubo sa espirituwal, nagadawat sa atong personal Kristohanong mga responsibilidad ug nagpahimulos sa tanang teokratikanhong mga tagana?
PAGPADAPAT SA ATONG NAKAT-ONAN
6 Dugay na kanhi una pa si Santiago misulat nga kita kinahanglang ‘magtutuman sa buluhaton,’ si Moises miingon ngadto sa mga Hudiyo: “Kinahanglang inyong ipadapat kining mga pulonga.” (Sant. 1:25; Deut. 11:18) Busa ang kahibalo mismo dili pa igo. Ang mga Hudiyo kinahanglang mopadapat sa mga pulong sa Kasugoan sa pagsugot kang Jehova. Kining pasukaranang prinsipyo nagpabiling mao gihapon. Si Jesus, ang Anak sa Diyos, tinong nahibalo sa kahinungdanon sa pagsugot. (Juan 8:28) Siya miingon sa Mateo 7:24: “Ang tanan nga nagapatalinghog sa akong mga pulong ug nagabuhat niana mahisama sa usa ka maalamong tawo.”
7 Gipadapat ba nato ang atong nakat-onan sa mga sirkitong asembliya? Ginapabilhan ba nato ngano nga mahinungdanon kaayo niining panahona nga magtukaw ug magmaigmat sa hunahuna? Kita ba alisto sa malinglahong mga atake ug lit-ag nga gipahimutang sa Yawa? Gipabilhan ba nato ang tambag ug mga pasidaan nga subsob nga gihatag kanato sa organisasyon maylabot sa panginahanglan sa moral ug espirituwal nga kahinlo diha sa kongregasyon? Ngadto sa unsang gidak-on kita sa tinagsatagsa nagapadapat sa atong mapatalinghogan?—Sant. 1:23-25.
8 Ang karon nga programa sa espesyal nga adlawng asembliya nagapasiugda sa atong panginahanglan nga mahimong balaan, ingon nga si Jehova balaan. (1 Ped. 1:14-16) Ang pagkabalaan nagkahulogan sa relihiyosong pagkahinlo o kaputli, pagkasagrado. Kini nagpaila sa pagkalinain ngadto sa pag-alagad sa Diyos. Kita gikapiyalan sa ministeryo sa maayong balita. Busa, kinahanglang kita hinlo sa espirituwal, moral, ug pisikal aron mahimong takos sa pagdala sa balaang Pulong sa kamatuoran. Kini nagkinahanglan nga atong ihatag ang labaw sa kasagarang pagtagad sa atong kaugalingon. (Heb. 2:1) Samtang buhaton nato kana, kita makaanig mga panalangin nga nagakaangay sa atong personal nga panikaysikay.
KAAYOHAN GIKAN SA PERSONAL NGA PAGTUON
9 Ang personal nga pagtuon makatabang kanato nga makatukod ug lig-ong pagtuo, ug kini magapalalom sa atong apresasyon sa kamatuoran. Kini magahatag kanatog pagsalig ug magasangkap nga mosulti uban ang pagbulot-an. Kini magahatag kanatog pagsabot ug pag-ila ug magaabag kanato sa pagsul-ob sa bag-ong personalidad. (Col. 1:9-11) Hinuon, ang mabungahong pagtuon mogugol ug panahon ug paningkamot, ug walay laktoranan sa pagbaton ug tukmang kahibalo ug kalalom sa espirituwal. Kon unsay atong gipasulod sa pagtuon mao man ang atong makuha gikan niana.—2 Cor. 9:6, 7; Gal. 6:7.
10 Naggahin ba kita ug igong panahon matag semana sa pag-andam sa mga tigom sa kongregasyon? Kini usa ka paagi nga makapakita kita ug pagpabili sa espirituwal nga pagkaon nga gitagana ni Jehova pinaagi sa matinumanon ug maalamong ulipon. Ang tukmang pagpangandam sa mga tigom makatabang kanatong motapot sa eskedyol sa pagbasa ug pagtuon sa Pulong sa Diyos. Gigahinan ba natog panahon matag semana ang atong pagbasa sa Bibliya ingon sa gipahiluna diha sa programa sa Teokratikanhong Tunghaan sa Ministeryo? Mogugol lamang kini ug pipila ka minuto matag adlaw sa pagbasa ug pagpamalandong sa materyal. Ang Tigom sa Pag-alagad makatabang kanato nga magpabiling igmat sa mga paagi diin mahimo natong epektibo ang atong publikong ministeryo. Kita ba mangandam, ilabinang magahunahuna kon sa unsang paagi magamit kining materyala sa ministeryo? Ug gihimo ba nato ang panikaysikay nga magamit dayon kini? Ang tinong mga kahikayan angayng himoon aron makapangandam sa Pagtuon sa Bantayanang Torre ug sa Pagtuon sa Libro sa Kongregasyon. Gihimo ba nato kana?
PAKIG-AMBIT SA MGA TIGOM
11 Kita makapulos pag dugang gikan sa mga tigom kon makig-ambit kita niini. Ang pagpangandam sa mga tigom ug unya manikaysikay nga makaambit makapabilin natong mapatalinghogon panahon sa tigom ug makapasayon nato sa pagpahimulos sa mga komento sa uban. Daghan ang makahinumdom pa sa paghago nga ilang gihimo sa ilang unang komento diha sa usa ka tigom o sa ilang unang estudyanteng pakigpulong sa Teokratikanhong Tunghaan sa Ministeryo. Bisan tuod nga ang dakong kakulba mikunhod na, nagpadayon ba kita sa paghago sa atong espirituwal nga pagtubo nga mapadayag sa tanan? (1 Tim. 4:15) Ang uban makapulos ug madasig sa atong mga komento. Kon andam kaayo kita, nga nakatuon sa materyal nga pagatagdon sa mga tigom, ang atong makahuloganon nga pakig-ambit kanila makaawhag sa uban sa gugma ug maayong binuhatan.—Heb. 10:23-25.
12 Ang atong mga komento angay nga dili taas ug komplikado. Kasagaran labing maayo ang paghimog mubong komento nga laktod motubag sa mga pangutana nga gisukna o makatabang pagpatin-aw sa kapadapatan sa usa ka kasulatan. Kon nakaandam kita pag-ayo, makahimo kita sa pagkomento sa atong kaugalingong mga pulong. Dihang mabuhat nato kana, mas dako ang kaayohan sa atong kaugalingon ug sa uban. Ngano? Tungod kay kini nagkinahanglan nato nga mohunahuna kon unsay atong gisulti ug makasaysay sa punto ingon sa atong pagsabot niana. Kini makapasayon sa uban sa pagsabot sa materyal. Usab, kini makatabang nato sa paghinumdom sa impormasyon nga magamit sa sunod nga higayon.
PAGPUGAS NGA MADAGAYAON SA KANATARAN
13 Ang atong Kristohanong ministeryo maoy bahandi sa pag-alagad. (2 Cor. 4:7) Gilantaw ba nimo kini nianang paagiha? Pinaagi sa ministeryo, aduna kitay pribilehiyo sa pagpahayag sa atong pagtuo ngadto sa uban. Si Jesus miingon nga gikan sa kadagaya sa kasingkasing, ang baba mosulti. (Luc. 6:45) Ang personal nga panlimbasog nga atong gihimo aron bug-os makapakig-ambit sa ministeryo magatugot kanato nga makaani ug daghang kaayohan. Mapahait ang atong pagsabot sa kamatuoran, ug maugmad nato ang mas labaw nga katakos sa paggamit sa Bibliya. Aduna kitay kalipay sa pagdala sa kamatuoran ngadto sa uban ug sa pagtabang kanila nga makakat-on sa ilang Dakong Maglalalang. Kita nagabarog ingon nga mga saksi sa pagkahusto sa pagmando sa Diyos ug sa iyang soberenidad. Kita malipayon kay nasayod nga kita nakapahimuot kang Jehova, nga gibuhat nga kasama niya ug nagabuhat sa iyang kabubut-on.—Mat. 5:48.
14 Kon kanunay natong gisukod ang atong personal nga paningkamot, ang atong pagsimba kang Jehova dili gayod mahimong basta lang nga pag-alagad. Unsay kahulogan niana? Kana nagpasabot nga kita dili mahimong taphaw sa pagtuman sa kabubut-on sa Diyos, nga maghimo lamang ug pasundayag sa pag-alagad kaniya o gamay ra ang mahimo nga walay lunsay kinasingkasing nga debosyon ug panikaysikay. Ang atong pag-alagad kang Jehova kinahanglang bug-os-kalag. Kita adunay Kasulatanhong obligasyon sa paghatag sa atong tanan diha sa iyang pag-alagad. (Col. 3:23, 24) Tinuod, magkalain ang mga kahimtang, ug wala magkinahanglan si Jehova ug labaw kay sa atong maarangan. Hinuon, unsay atong maarangan pagbuhat, siya nagdahom nga ato kanang pagabuhaton! (Mat. 22:37) Sanglit ang nahulog nga tawhanong kinaiya may kiling sa pagpahigawas sa kaugalingon, maayo nga atong susihon ang atong kaugalingon ngadtongadto ug tan-awon kon diin kita makahimog pag-uswag sa atong pag-alagad sa Diyos. Nabatasan ba nato ang pagbuhat niana?
15 Gikinahanglan nato ang pagkamabinantayon kon buot ugaling natong likayan ang pagtugot sa personal nga pangagpas ug mga tinguha nga mopugong kanato sa paghatag sa atong kinamaayohan diha sa pag-alagad kang Jehova. Ang kalipayan, kalingawan (hobby), ug lulinghayawng kalihokan kinahanglang ibutang sa ilang dapit. Usab, kinahanglan kitang magbantay batok sa kahiligan nga sobrang malangkit sa sekular nga kalihokan. Ang pagtuman sa tambag ni Jesus sa Mateo 6:22, 23, sa walay duhaduha makapahimo natong dugang pang manikaysikay sa pagpangagpas sa espirituwal nga intereses ug makaanig nahiangay niana.
16 Samtang kita magapadayon sa paghago sa pagsul-ob sa bag-ong personalidad, kita modawat sa atong kaugalingong responsibilidad sa pagpadapat sa tambag ug mga sugyot nga atong madawat sa mga tigom sa kongregasyon, mga asembliya, mga kombensiyon, ug pinaagig mga publikasyon. Hinaot nga ang matag usa kanato masingkamotong magtuon, aktibong makig-ambit sa mga tigom, ug makigbahin niining dakong paghimog tinun-an nga buluhaton sa gilapdon nga itugot sa atong personal nga mga kahimtang. Pinaagi nianang mapabilhong pagsanong sa gugma sa Diyos, kita makaseguro nga makaani ug dagayang espirituwal nga mga ganti karon ug mahuptan ang solidong paglaom sa kinabuhing walay kataposan sa bag-ong kalibotan ni Jehova.