Nakakuhag Kaayohan ba ang Imong Kaugalingon?

¹ Milyonmilyong tawo karon buot nga mahibalo kon sa unsang paagi sagubangon ang mga suliran ug tagamtamon ang malipayong mga kinabuhi. Sila interesado kaayo mobasag mga libro nga makatabang sa kaugalingon o modangop sa mga grupo ug mga organisasyon alang sa tambag kon unsaon pagpaarang-arang sa ilang mga kinabuhi. Hayan ang pipila makapunting sa limitadong mga kaayohan nga ilang naangkon. Apan, sa paghukom sa kalidad sa kinabuhi karon, ang mga tawo ba sa kinatibuk-an nakakat-on sa pagtagamtam sa malinawon, makapatagbaw gayod nga mga kinabuhi pinaagi sa tawhanong mga programang instruksiyon? Dili gayod kana tinuod!​—1 Cor. 3:​18-​20.

² Sa laing bahin, ang atong Maglalalang nagtaganag walay bayad nga makatabang kaayong instruksiyon alang sa tanan nga magpatalinghog. Buot ni Jehova nga ang tanan makakuhag kaayohan gikan sa iyang pagtudlo. Siya madagayaong nagtagana sa iyang dinasig nga Pulong sa paggiya sa katawhan diha sa katul-id, ug iyang gipahinabo ang maayong balita bahin sa iyang Gingharian nga mamantala sa tibuok nga yuta. (Sal. 19:​7, 8; Mat. 24:​14; 2 Tim. 3:16) Ang tinuod nga malipayong kinabuhi deretsong nalangkit sa paghatag ug pagtagad sa mga sugo ni Jehova.​—Isa. 48:​17, 18.

³ Ang giya ni Jehova maoy labaw kaayo kay nianang gitagana sa bisan unsang mga libro nga makatabang sa kaugalingon o mga laraw nga makapauswag sa kaugalingon nga gitanyag sa kalibotan. Kita makabaton ug tinuod nga tabang ug malungtarong mga kaayohan kon atong pahimuslan sa bug-os ang mga tagana ni Jehova sumala sa gilaraw sa iyang Pulong ug gitudlo sa iyang organisasyon.​—1 Ped. 3:​10-12.

⁴ Pagkuhag Kaayohan sa Imong Kaugalingon sa mga Tigom sa Kongregasyon: Karong adlawa, si Jehova nagpakitag tiunay nga interes sa pagtudlo kanato sa iyang mga dalan, ug kita makakuhag kaayohan pinaagi sa paghatag ug pagtagad sa iyang instruksiyon. Ang atong lima ka senemanang mga tigom naghatag ug pamatuod sa mahigugmaong kahangawa ni Jehova. Sa dihang kita motambong sa mga tigom sa kongregasyon, ang atong kahibalo sa Diyos mouswag. Atong makat-onan kon unsaon sa pagpanalipod sa atong kaugalingon gikan sa daotan pinaagi sa pagpakigsuod kang Jehova. Niining paagiha ang atong mga panghunahuna madasig.

⁵ Aduna pay lain. Diha sa mga tigom sa kongregasyon kita mahimong “magpasangkad.” (2 Cor. 6:13) Kini naglakip sa pagsinati sa uban diha sa kongregasyon. Kita makakuhag kaayohan gikan sa pagdinasigay, sama sa gisulat ni apostol Pablo diha sa iyang sulat ngadto sa mga taga-Roma. (Roma 1:​11, 12) Sa dihang nagsulat ngadto sa mga Hebreohanon, siya kusganong nagtambag kanilang kinsa hayan nag-ugmad sa batasan sa pagsalikway sa Kristohanong panag-ubanay.​—Heb. 10:​24, 25.

⁶ Ang malipayong katagbawan sa pagkinabuhi deretsong nalangkit sa pagkahimong interesado sa kaayohan sa uban. Kita gidasig sa pagpangita ug mga paagi nga makaamot sa kalipay sa uban. Busa, ang atong Kristohanong mga tigom tinong maoy alang sa atong personal nga kaayohan ug sa kaayohan kanilang atong ginaugmad ang maayong panag-ubanay. Ang gikinahanglan kanato mao ang atong kinasingkasing nga pagpakig-ambit.

⁷ Si apostol Pablo mihimog susamang punto diha sa iyang tambag ngadto kang Timoteo sa dihang siya misulat: “Pagabansaya ang imong kaugalingon nga maoy tumong ang diyosnong pagkamahinalaron.”(1 Tim. 4:7) Kita makapangutana sa atong kaugalingon: ‘Ako bang ginabansay ang akong kaugalingon? Ako ba nagakat-on aron makakuhag kaayohan gikan sa akong napatalinghogan diha sa mga tigom sa kongregasyon?’ Ang atong mga tubag maoy oo kon kita naghatag ug pagtagad sa atong napatalinghogan sa mga tigom ug manlimbasog sa pagpadapat sa atong nakat-onan. Pinaagi sa mga mata sa pagtuo, ato gayong makita ang labaw pa sa mga igsoong lalaki nga nagahimo sa pagpanudlo ug makita nga si Jehova ang Dakong Instruktor sa iyang katawhan.​—Isa. 30:20.

⁸ Tunghaan sa Teokratikanhong Ministeryo ug Tigom sa Pag-alagad: Kining duha ka tigom gidisenyo sa pagtabang kanato nga mahimong epektibo diha sa Kristohanong ministeryo. Ang Tunghaan sa Teokratikanhong Ministeryo maoy alang gayod sa maong katuyoan​—usa ka tunghaan nga may mga estudyante nga makadawat ug instruksiyon ug tambag sa regular nga paagi. Ikaw aduna ing kahigayonan sa pagpasundayag sa imong pag-uswag ingong mamumulong sa publiko ug ingong magtutudlo sa Pulong sa Diyos. Apan aron makapahimulos sa labing maayo gikan sa tunghaan, ikaw kinahanglang magpalista, motambong, makig-ambit nga regular, ug sa kinasingkasing tagda ang imong mga asaynment. Ang pagdawat ug pagpadapat sa tambag nga gihatag makatabang kanimo sa pag-uswag.

⁹ Ang Tigom sa Pag-alagad nagtudlo kanato sa kahinungdanon sa Kristohanong ministeryo ug nagpakita kanato kon sa unsang paagi kita makapakig-ambit diha sa buluhaton sa paghimog mga tinun-an. Ikaw ba ug ang imong pamilya bug-os nga nakakuhag kaayohan gikan sa gipresentar niining duha ka tigom? Usa ka Kristohanong magtiayon miingon: “Sa usa ka Tigom sa Pag-alagad, among napatalinghogan nga kinahanglan namong tagdon ang adlaw-adlawng teksto ingong pamilya. Wala kami magbuhat niini, apan karon amo nang gitagad kini.” Sa unsang paagi sila nakakuhag kaayohan? Sila miangkon: “Among nakaplagan nga ang among mga panaghisgot palibot sa talad kan-anan maoy mas makalingaw. Wala nay panaglalis panahon sa pagpangaon.” Bisan ang mga kabataan nakakuhag kaayohan ba gikan sa mga tigom? Oo. Ang inahan miingon: “Dayag ang among kabataan dulot nga natandog sa mga tigom. Usa ka partikular nga semana among nasakpan ang among sayis-anyos nga anak nga lalaki nga nagsultig pipila ka bakak. Apan nianang semanaha diha sa tigom, ang nagatudlong pakigpulong maoy bahin sa pagpamakak. Nga adunay sad-an kaayong ekspresyon sa iyang nawong, ang among anak mitan-aw sa iyang amahan ug nanghuyhoy diha sa iyang lingkoranan. Nakakat-on siya sa iyang leksiyon, ug wala na kami ing mga problema human niadto.”

¹⁰ Usa ka payunir nga sister nag-ingon nga siya nalipay nga ang mga sugyot sa pagpauswag sa atong ministeryo ginahatag diha sa Tigom sa Pag-alagad. Ngano? Siya misaysay: “Gipul-an na ako. Usahay ako naghunahuna nga ang gisugyot diha sa Atong Ministeryo sa Gingharian dili mosaler. Apan diha sa Tigom sa Pag-alagad, sa dihang akong mapatalinghogan nga kinahanglang sulayan nato kini, ako mapasibot sa pagpadapat sa mga sugyot. Kini nagahimo sa ministeryo nga makapadasig!” Human sa pipila ka semana sa pagpadapat sa sugyot nga manlimbasog sa pagsugod ug pagtuon sa Bibliya diha sa unang pagduaw, siya nakasugod ug pagtuon sa unang pagduaw uban sa usa ka dalagita nga nag-ampo ug tabang.

¹¹ Sa dihang imong mapatalinghogan ang usa ka pakigpulong nga maglakip ug tambag sa Bibliya maylabot sa personal nga mga pagpili nga imong himoon, imo bang bation nga si Jehova ang deretso nga nagasulti kanimo? Usa ka igsoong lalaki ang mibati nianang paagiha. Siya miingon: “Di pa dugay sa usa ka tigom, dihay pakigpulong nga gihisgotan sa igsoong lalaki kon unsang mga matanga sa kalingawan ang angay alang sa mga Kristohanon ug unsang mga matanga ang di-angay. Nagustohan ko na ang pagtan-awg boksing diha sa telebisyon. Apan human nianang tigoma, ako nakahukom nga kini nga esport maoy matang sa kalingawan nga dili angay sa mga Kristohanon. Busa dili na ako motan-aw niana.” Oo, bisan kon kining igsoona nakaugmad na ug kahimuot sa usa ka butang nga mapintason, siya mapainubsanong misanong sa pagtultol ni Jehova.​—Sal. 11:5.

¹² Ang Pakigpulong Publiko, ang Pagtuon sa Bantayanang Torre, ug ang Pagtuon sa Libro sa Kongregasyon: Ang mga pakigpulong publiko nga atong mapatalinghogan matag semana nagkobre ug lainlaing mga ulohan sa Bibliya. Unsa may imong makuha gikan niining mga pakigpulonga? Usa ka Kristohanong bana mikomento bahin sa mga kaayohan nga iyang nadawat: “Usa ka pakigpulong publiko nagpasiugda sa tanang bunga sa espiritu. Ang mamumulong nag-ingon, bahin sa iyang kaugalingon, nga aron makaugmad niini nga mga bunga, siya mopili ug usa ka partikular nga hiyas ug ugmaron kana sulod sa usa ka semana. Sa kataposan sa maong semana, iyang gipamalandong kon giunsa niya pagpasundayag niana nga bunga diha sa iyang adlaw-adlaw nga mga kalihokan. Dayon iyang ugmaron ang laing hiyas alang sa sunod nga semana. Nagustohan ko ang maong ideya ug gisugdan ko ang pagbuhat niana.” Pagkamaayong pagpadapat bahin sa nakat-onan!

¹³ Ang Pagtuon sa Bantayanang Torre nagtudlo kanato sa pagpadapat sa mga prinsipyo sa Bibliya sa lainlaing mga kahimtang sa kinabuhi. Kini makatabang kanato sa pagmentinar sa kalmadong mga hunahuna ug mga kasingkasing bisan pa sa mga kabalaka sa kinabuhi. Ang Pagtuon sa Bantayanang Torre padayong nagapanunot usab kanato sa nagauswag nga kamatuoran. Pananglitan, dili ba kita nakakuhag kaayohan gikan sa pagtuon sa Mayo 1, 1999, nga mga artikulo sa Bantayanang Torre nga nag-ulohan: “Kining mga Butanga Kinahanglang Mahitabo,” “Pagamitag Salabotan ang Magbabasa,” ug “Magmabinantayon ug Magmakugihon!” Sa unsang paagi kini nga mga pagtuon nag-apektar kanimo sa personal? Imo bang gipakita pinaagi sa imong mga lihok nga imong gitisok sa kasingkasing ang pasidaan ni Jesus bahin sa umaabot? Ikaw ba nangandam sa imong kaugaligon sa mga pagsulay sa unahan sa dihang atong makita “ang dulumtanang butang nga magpahinabog pagkaawaaw . . . nga magabarog diha sa balaang dapit”? (Mat. 24:​15-22) Ang imo bang mga tumong ug dalan sa kinabuhi nagpadayag nga, dili ang pagtigom ug materyal nga mga butang, kondili ang pagbalaan sa ngalan ni Jehova mao ang labing hinungdanong butang kanimo? Diha sa Pagtuon sa Bantayanang Torre, dili ba kita nagakat-on aron makakuhag kaayohan ang atong kaugalingon karon?

¹⁴ Hunahunaa kon unsa ka daghan ang atong makat-onan diha sa Pagtuon sa Libro sa Kongregasyon matag semana. Sa pagkakaron kita nagatuon sa basahon sa Bibliya ni Daniel. Sa upat ka bulan nga kita nagatuon nianang basahona sa Bibliya, wala ba nato makita nga sa matag semana ang atong pagtuo nagalambo? Sama sa hinigugmang manalagna ni Jehova nga si Daniel, atong ginapalig-on ang atong pagtuo aron kita makalahutay.

¹⁵ Si Jehova Nagtudlo Kanato nga Magkinabuhing Malipayon: Atong malikayan ang daghang kasakit kon atong hatagag pagtagad ang mga sugo sa Diyos. Dugang pa, atong masinati kon unsa gayod ang malipayong pagkinabuhi. Kay nagasunod sa pagtultol ni Jehova, kita mahimong mga mag-aambit sa iyang buluhaton, dili lamang mga tigpaniid. Ug sila nga nagabuhat sa buluhaton sa Diyos maoy malipayong katawhan.​—1 Cor. 3:​9; Sant. 1:25.

¹⁶ Hunahunaag maayo kon sa unsang paagi imong ipadapat ang mga butang nga imong napatalinghogan diha sa mga tigom sa kongregasyon. (Juan 13:17) Alagara ang Diyos nga madasigon, uban ang bug-os mong kasingkasing. Ang kalipay mo moawas. Ang kinabuhi mo mahimong mas buhong, mas makahuloganon. Oo, ikaw makakuhag kaayohan sa imong kaugalingon.