Pagpaila sa Librong Creation
1 Sanglit ang kadaghanang tawo sa atong mga teritoryo nagatuo sa usa ka maglalalang, maoy mahagiton ang pagpakigsulti sa atong mga silingan bahin niining ulohana. Unsa may atong isulti aron pagpukaw sa interes sa tagbalay? Unsa ang mga punto nga imong ipatugbaw? Ang mosunod nga mga sugyot mobulig nato nga magmaandam sa pagbaton ug makapaikag nga mga panaghisgot sa atong mga silingan sa dihang atong itanyag ang libro sa atong mga teritoryo. Ang mga sugyot ikapasibo sa lokal nga mga sirkumstansiya.
2 Nganong Gitugotan sa Diyos ang Pag-antos?: Bisan ang daghang nagaangkon nga mga Kristohanon nahibulong niining pangutanaha. Busa ikapatungha ta kini sa atong pasiuna aron pagpukaw sa interes sa tagbalay.
3 Human sa nahiangayng pangumosta, ikaw makaingon:
◼ “Sa pagpakigsulti sa among mga silingan, among nakaplagan nga daghang mga tawo ang nahibulong kon nganong gitugotan sa Diyos ang hilabihang pag-antos karon. Ang pipila mipasangil pa gani sa Diyos tungod sa ilang mga problema. Unsay imong pagbati bahin niini? [Tugoting mokomento.] Apan dili ba tinuod nga kadaghanan sa atong mga problema gipahinabo sa tawo, dili sa Diyos? Matikdi kon giunsa kini pagpakita dinhi sa Ecclesiastes 8:9. [Basaha.] Ang Bibliya nagapakita usab nga ang Diyos sa dili madugay magalaglag niadtong nagalaglag sa yuta, sa ingon magatapos sa pag-antos sa walay kataposan. [Basahang Pinadayag 11:18.]” Unya itultol ang pagtagad sa Kapitulo 16 sa librong Creation, nga nagapakita sa ilustrasyon sa panid 197.
4 Nakaplagan sa daghan ang pagpakli sa usa ka kapitulo sa libro nga nagahisgot sa usa ka makapainteres nga punto mapuslanon. Matikdi kon unsaon kini paghimo maylabot sa ulohan kon ang Bibliya dinasig ba o dili.
5 Human ikapaila ang kaugalingon, ikaw makaingon:
◼ “Daghang tawo karon ang adunay Bibliya, apan nagatuo ba gayod sila nga kini maoy Pulong sa Diyos? Sa 2 Timoteo 3:16 kini nagaingon nga ang Bibliya dinasig sa Diyos. [Basaha.] Kon adunay mangutana nimo, unsaon man nimo pagpamatuod nga kini tinuod? [Tugoting makatubag.] Dinhi sa Kapitulo 17 niining librong, Life—How Did It Get Here? By Evolution or by Creation?, aduna kitay pamatuod nga ang Bibliya nahiuyon sa siyensiya, medisina, ug kasaysayan, ug nga kini matinud-anon ug mausahon. [Basaha ang mga sub-ulohan.] Ang Kapitulo 18 nagapakita usab nga kini tukmang nagatagna sa umaabot, nga ang Diyos lamang ang makahimo. Tungod kay kini Pulong sa Diyos, gikinahanglan natong tun-an kini ug ipadapat ang iyang tambag. Aron mabuligan ka sa pagbuhat niini malipay ko nga ibilin kining libroha sa usa ka diyutay nga amot.”
6 Ubang Mapuslanong mga Bahin: Ang masangkaron nga reperensiya sa luyo niining libroha magamit usab sa pagpakita sa pagpangdukiduki nga nahimo. Alang niadtong interesado sa pagtandi sa ebolusyon ug paglalang, and tsart sa panid 112 nagahatag ug daling sumaryo. Ug alang niadtong interesado sa siyentipikanhong mga kamatuoran, ang Kapitulo 9 sa “Our Awesome Universe” ug Kapitulo 10 sa “Evidence From a Unique Planet” nagataganag ekselenteng impormasyon. Kon buot mong repasohon ang mga tagna nga nagapakita nga kita ania na sa kataposang mga adlaw, yano mong mapakli ang mga panid 224 ug 225 alang sa mubong listahan.
7 Pinaagig paggamit sa epektibong mga paagi sa pagpaila sa librong Creation, matabangan nato ang dugang pang katawhan nga mopasidungog sa maglalalang ug magtuon sa iyang Pulong.