Mahimong mga Magtutuman—Dili mga Tigpaminaw Lamang
1 Ang matuod nga mga Kristohanon karong adlawa nagabutang sa kasingkasing sa tambag sa Bibliya nga mahimong mga magtutuman sa pulong, dili mga tigpaminaw lamang. (Sant. 1:22) Kini nagapalahi gayod kanila niadtong kinsa, bisan tuod nagaangkong Kristohanon, nagaalagad sa Diyos sa ngabil lamang. (Isa. 29:13) Si Jesus matin-awng mibutyag nga kadto lamang nagabuhat sa kabubut-on sa Diyos ang maluwas.—Mat. 7:21.
2 Ang pagsimba nga wala ing diyosnong mga buhat maoy kawang. (Sant. 2:26) Busa kinahanglang suknaon ang atong kaugalingon, ‘Sa unsang paagi ang akong mga buhat nagapamatuod nga dalisay ang akong pagtuo? Unsa ang nagapakita nga ako gayod nagakinabuhi uyon sa akong gituohan? Unsaon ko man sa pagsundog kang Jesus nga mas bug-os pa?’ Ang binuotan nga mga tubag niining mga pangutanaha moabag kanato sa pagtino kon unsang progreso ang atong nahimo na o gikinahanglan pang himoon sa pagbuhat sa kabubut-on sa Diyos.
3 Ingong mga sumusunod sa tunob ni Jesus, ang atong unang tumong sa kinabuhi kinahanglang sama nianang gipatugbaw sa salmista: “Diha sa Diyos kami magatanyag sa pagdayeg sa tibuok nga adlaw, ug ngadto sa panahong walay tino ang imong ngalan among himayaon.” (Sal. 44:8) Pagkatagbaw ang atong matagamtam samtang kita nagapasundayag diha sa tanan tang kalihokan sa atong kinasingkasing nga tinguha sa pagdayeg kang Jehova!—Filip. 1:11.
4 Ang Pagdayeg Kang Jehova Nagalangkit ug Mas pa kay sa Pagkinabuhig Matarong nga Kinabuhi: Kon ang gikinahanglan sa Diyos mao lamang ang maayong kagawian, ang pagpino sa atong personalidad mao na lamang ang atong puntingon. Apan, ang atong pagsimba usab nagalambigit sa pagpahayag bisan asa sa mga pagkahamili ni Jehova ug paghimog katilingbanong pagpatugbaw sa iyang ngalan!—Heb. 13:15; 1 Ped. 2:9.
5 Ang katilingbanong pagsangyaw sa maayong balita nahiapil sa labing importanteng mga buluhaton nga atong ginahimo. Gideboto ni Jesus ang iyang kaugalingon ngadto niining buluhatona sanglit nahibalo siya nga nagkahulogan kini sa kinabuhing dayon ngadto kanila nga magpatalinghog. (Juan 17:3) Karong adlawa “ang ministeryo sa pulong” sama ra ka hinungdanon; kini ang bugtong paagi nga niana ang mga tawo mamaluwas. (Buh. 6:4; Roma 10:13) Sa pagkaamgo sa layog-abot nga mga benepisyo, atong mapabilhan kon nganong si Pablo mitambag kanato aron “iwali ang pulong,” ug “magmadalion diha niini.”—2 Tim. 4:2.
6 Ngadto sa unsang gilapdon nga ang pagdayeg kang Jehova angayng magpapuliki sa atong mga kinabuhi? Ang salmista miingon nga kana diha sa iyang hunahuna sa tibuok nga adlaw. Dili ba ingon nianang paagiha ang atong pagbati maylabot niana? Oo, ug atong tamdon ang kada kontak sa laing tawo ingong higayon sa paghisgot bahin sa ngalan ni Jehova. Kita mangitag tukmang mga higayon aron dad-on ang atong panaghisgot ngadto sa espirituwal nga mga butang. Silang adunay paborableng mga sirkumstansiya makahatag ug seryosong pagtagad sa payunir nga buluhaton, kay kini motabang kanato nga unahon ang buluhatong pagsangyaw diha sa atong kinabuhi sa matag adlaw. Ang Pulong sa Diyos nagapasalig kanato nga sa pagkahimong mapadayonong mga magtutuman sa kabubut-on sa Diyos, kita magmalipayon.—Sant. 1:25.