Pakig-ambit sa Buluhaton nga Dili na Gayod Himoon Pag-usab
1 Sa nagkalainlaing mga panahon latas sa tawhanong kasaysayan, kinahanglanon alang kang Jehova nga mopahamtang ug paghukom sa iyang mga kaaway. Apan, tungod sa iyang kaluoy, iyang gitagana sa mga tul-id ug kasingkasing ang kahigayonan sa kaluwasan. (Sal. 103:13) Ang ilang sanong nagtino sa ilang kaugmaon.
2 Pananglitan, una pa ang Lunop, niadtong 2370 W.K.P., si Noe maoy “usa ka magwawali sa pagkamatarong.” Ang mga nangalaglag mao kadtong kinsa wala magtagad sa balaang pasidaan. (2 Ped. 2:5; Heb. 11:7) Una pa ang kalaglagan sa Jerusalem niadtong 70 K.P., tin-aw nga gilaraw ni Jesus ang lihok nga gikinahanglan sa matag usa aron makalingkawas sa kalaglagan nga maagoman sa siyudad. Ang tanang misalikway sa iyang mensahe sa pasidaan nag-antos sa makalilisang nga mga resulta.—Luc. 21:20-24.
3 Usa ka Mobernong-Ablaw nga Buluhaton sa Pagpasibaan: Dugay na kanhi nga gipahayag ni Jehova ang iyang kapungot nga idakdak batok sa karong daotang sistema ug ang mga maaghop lamang ang makalabang-buhi. (Sof. 2:2, 3; 3:8) Ang panahon sa pagsangyaw niining mensahea hapit nang matapos! Ang “dakong kasakitan” anaa ra sa unahan, ug ang mga maaghop karon ginatipon na. Sa pagkatinuod, ang “kaumahan” “puti na aron anihon.” Busa, walay laing buluhaton ang ikatandi niini sa pagkaimportante ug pagkadinalian.—Mat. 24:14, 21, 22; Juan 4:35.
4 Kinahanglang makig-ambit kita sa pagpalanog sa modernong-adlaw nga pasidaan ngadto sa uban, “maminaw man sila o dili maminaw.” Kini maoy hinatag-sa-Diyos nga asaynment nga kinahanglang dili nato isalikway. (Ezeq. 2:4, 5; 3:17, 18) Ang atong bug-os nga pagpakig-ambit niining buluhatona nagapakita sa atong halalom nga gugma sa Diyos, atong lunsay nga kabalaka sa atong mga silingan, ug sa atong di-matarog nga pagtuo sa atong Manluluwas, si Jesu-Kristo.
5 Karon na ang Panahon sa Paglihok: Human sa miaging mga paghukom ni Jehova, ang pagkadaotan kanunayng motungha pag-usab sanglit si Satanas ug ang iyang mga demonyo aktibo pa gihapon. Apan, niining higayona kini lahi na. Ang satanasnong impluwensiya pagahanawon na. Ang globonhong pasidaan bahin sa umaabot nga “dakong kasakitan” dili na gayod kinahanglanon pa pag-usab. (Pin. 7:14; Roma 16:20) Kita adunay espesyal nga pribilehiyo ingong bahin sa buluhaton nga dili na gayod himoon pag-usab. Karon na ang panahon alang kanato aron pahimuslan gayod kini nga kahigayonan.
6 Bahin sa iyang buluhatong pagsangyaw, ang apostol nga si Pablo miingon: “Ako hinlo gikan sa dugo sa tanang tawo.” (Buh. 20:26) Wala siya mobating sad-an sa dugo gumikan sa bisan unsang kapakyasan sa pagpalanog sa pasidaan. Nganong wala? Tungod kay siya makaingon sa iyang ministeryo: “Alang niining katuyoana ako sa pagkatinuod nagahago, nga nanlimbasog sa akong kaugalingon.” (Col. 1:29) Tagamtamon ta ang samang katagbawan sa bug-os nga pagpakig-ambit sa buluhaton nga dili na gayod himoon pag-usab!—2 Tim. 2:15.