Komosta ang Imong mga Paryente?
1 Kadaghanan kanato adunay mga paryente nga wala sa kamatuoran. Atong gipangandoy gayod nga sila moduyog kanato sa dalan sa kinabuhi! Ilabinang tinuod kini kon sila mga membro sa atong kaugalingong panimalay. Bisan tuod atong gisulayan na ang pagtabang kanila sa mga katuigan, kinahanglang dili kita maghinapos nga wala na ing paglaom.
2 Sa gihimo ni Jesus ang iyang pagsangyaw, “sa pagkatinuod, ang iyang mga igsoon wala magapasundayag ug pagtuo kaniya.” (Juan 7:5) Sa usa ka higayon, ang iyang mga paryente naghunahuna nga siya buang. (Mar. 3:21) Apan, wala sila lung-i ni Jesus. Miabot ang panahon, ang iyang mga igsoon midawat sa kamatuoran. (Buh. 1:14) Ang iyang igsoon sa inahan nga si Santiago nahimong haligi sa Kristohanong kongregasyon. (Gal. 1:18, 19; 2:9) Busa ayaw paghunong sa pagsulay nga aboton ang imong mga paryente sa maayong balita sa Gingharian.
3 Himoang Makapalunhaw, Dili Mapiiton: Sa dihang si Jesus nagsangyaw sa uban, ang iyang mga mamiminaw mibatig kalunhaw, wala malupigi. (Mat. 11:28, 29) Wala niya piita sila pinaagig mga pagtulon-an nga dili nila masabtan. Aron marepreskohan ang imong mga paryente pinaagig mga tubig sa kamatuoran, hatagi silag diyutay sa matag higayon, dili sobra! Usa ka nagapanawng magtatan-aw nakamatikod: “Ang labing maayong mga resulta makab-ot niadtong kinsa nagpukaw sa kaikag sa ilang mga paryente pinaagig pagpamatuod sa hustong mga takos.”—1 Cor. 3:1, 2.
4 Daghang Kristohanon ang epektibong nakapamatuod sa ilang di-magtutuong mga kapikas pinaagig pagbiyag literatura nga bukas sa mga ulohan nga hayan makapainteres kanila. Usa ka sister nga naghimo niini nagdumala usab ug pagtuon uban sa iyang mga anak nga madunggan sa iyang bana, nga naghimog mga saysay nga makabenepisyo kaniya. Usahay siya mangutana kaniya: “Nakakat-on ako niini ug niana sa akong pagtuon karong adlawa. Unsay imong hunahuna bahin niana?” Ang iyang bana sa kataposan midawat sa kamatuoran.
5 Magmatinahoron, Dili Mapul-anon: Usa ka magmamantala mikomento nga “bisan ang mga paryente adunay katungod sa ilang kaugalingong mga panglantaw ug mga opinyon.” Busa atong ipakita ang atong pagtahod sa dihang sila mohatag sa ilang opinyon o sa dihang tino silang mohangyo kanatong dili sila sultian bahin sa kamatuoran. (Eccl. 3:7; 1 Ped. 3:15) Pinaagig pagkamapailobon ug pinaagig pagkamaayong mga tigpaminaw, kita makapangitag tukmang mga kahigayonan sa paghatag ug mahanasong pamatuod. Ang maong pailob mahimong magantihon, ingon sa nahitabo sa kahimtang sa usa ka Kristohanong bana kinsa mapailobong nag-antos sa pagmaltratar sa iyang di-magtutuong asawa sulod sa 20 anyos. Sa dihang siya misugod sa pagbag-o, ang bana miingon: “Pagkamapasalamaton nako kang Jehova nga siya nagtabang kanako sa pag-ugmad sa bunga sa espiritu sa pagkamainantoson, tungod kay makita na nako karon ang resulta: Ang akong asawa nagsugod na sa paglakaw diha sa dalan sa kinabuhi!”
6 Komosta man ang imong mga paryente? Mahimong pinaagi sa imong maayong Kristohanong pamatasan ug sa imong mga pag-ampo alang kanila, “imong makabig sila ngadto kang Jehova.”—1 Ped. 3:1, 2, potnot.