Atong Gikauyonan—Sa Padayong Pagsunod sa Dalan ni Jehova sa Kinabuhi
1 Ang haylayt sa “Iya sa Diyos nga Dalan sa Kinabuhi” nga mga Kombensiyon mao ang resolusyon nga gisagop sa kataposang pakigpulong. Gisugdan kini sa deklarasyon: “Kami . . . sa bug-os nga kasingkasing nagkauyon nga ang dalan sa Diyos mao ang labing maayong dalan sa kinabuhi.” Hinumdomi ang pipila ka hinungdanong mga puntos nianang resolusyona nga niana kita miingon, “OO!”
2 Atong gikauyonan nga magpabiling hinlo sa atubangan ni Jehova, nga walay buling sa kalibotan. Atong ipadayon ang pag-una sa kabubut-on sa Diyos diha sa atong mga kinabuhi. Ginamit ang iyang Pulong, ang Bibliya, ingong atong giya, kita dili motipas sa tuo o sa wala, busa nagpamatuod nga ang dalan sa Diyos mas labaw sa dalan sa kalibotan.
3 Ang kalibotan sa katibuk-an nagsalikway sa iya sa Diyos nga dalan sa kinabuhi ug nag-ani sa mga resulta. (Jer. 10:23) Busa kita kinahanglang padayon nga matudloan sa atong Dakong Instruktor, si Jehova, kinsa miingon: “Kini ang dalan. Lakaw niana, kamong katawhan.” (Isa. 30:21) Ang dalan ni Jehova sa kinabuhi, ingon sa gilatid sa Kasulatan, maoy labaw sa tanang bahin. Aron sa pagpadayon nianang dalana, gikinahanglang bug-os natong pahimuslan ang tanang gitudlo ni Jehova kanato.
4 Labawng Programa sa Pagpanudlo ni Jehova: Si Jehova nagtudlo kanato sa tinuod nga katuyoan sa kinabuhi ug kon unsaon paggamit sa atong mga kinabuhi sa labing ikaayo. Nagtudlo siya kanato kon unsaon pagpauswag ang kalidad sa atong mga kinabuhi sa mental, moral, ug espirituwal nga paagi. Nagtudlo siya kanato kon unsaon pagkinabuhi diha sa pakigdait uban sa atong mga igsoon, atong pamilya, ug atong isigkatawo. Gihimo niya kini pinaagi sa iyang teksbok, ang Bibliya, ug pinaagi sa iyang organisasyon.
5 Ang atong mga tigom sa kongregasyon dakog bili niining bahina. Samtang kita regular nga motambong ug mopakig-ambit sa tanang lima ka tigom, atong madawat ang malangkobong pagbansay ingong mga ministro sa maayong balita ug usa ka timbang-kaayong edukasyon sa Kristohanong pagkinabuhi. (2 Tim. 3:16, 17) Ang atong Dakong Instruktor nagtaganag dugang teokratikanhong edukasyon pinaagi sa mga asembliya ug mga kombensiyon. Ang atong tumong kinahanglang mao ang dili gayod pagsipyat sa usa ka tigom o usa ka sesyon kon ang atong panglawas ug mga kahimtang magtugot kanato sa pagtambong.
6 Hinaot nga makugihong mopadayon kita sa pagsunod sa iya sa Diyos nga dalan sa kinabuhi sa mga adlaw sa unahan, ang tanan alang sa pagdayeg kang Jehova ug sa atong walay kataposang kaayohan!—Isa. 48:17.