Kita Nakakuhag Kaayohan Gikan sa “Iya sa Diyos nga Dalan sa Kinabuhi” nga mga Kombensiyon
1 Pipila lamang ka bulan nga miagi, nagplano kita sa pagtambong sa 1998-99 nga “Iya sa Diyos nga Dalan sa Kinabuhi” Distritong mga Kombensiyon. Karon nahimo kining halandomon dakong mga hitabo diha sa teokratikanhong kasaysayan sa organisasyon. Bug-os natong gipahimuslan ang dagayang espirituwal nga pagkaon nga atong nadawat sa maong hinungdanong mga panagkatigom.
2 Ang internasyonal nga bahin sa mga kombensiyon makapahinam gayod. Ang mga misyonaryo ug ubang mga delegado gikan sa langyawng kayutaan presente man o wala sa atong gitambongan, kitang tanan nakadungog sa maayong mga kasinatian sa bahin sa Biyernes sa hapon nga nag-ulohang “Pag-alagad Diha sa Misyonaryong Kanataran.” Ang adlaw-adlaw nga “Mga Taho sa Pag-uswag sa Buluhatong Pagpangani” gikan sa palibot sa kalibotan ilabinang makapadasig.
3 Talagsaong Bag-ong mga Basahon nga Giluwatan: Ang paniklop nga pakigpulong sa Biyernes nagtubag sa pangutana nga gisukna sa daghang tawong wala mahibalo sa kamatuoran: “Aduna bay Kinabuhi Luyo sa Kamatayon?” Kanang makaiikag kaayong diskurso gitapos uban ang pagluwat sa bag-ong brosyur nga, Unsay Mahitabo Kanato sa Dihang Mamatay Kita? Samtang atong tun-an kana sa mga Pagtuon sa Libro sa Kongregasyon niining bulana ug sa Marso atong makita kon unsa unya ka hinungdanon kini nga brosyur sa pagtabang sa mga tawo sa pagsabot sa kamatuoran bahin sa kahimtang sa mga patay. Maghupay usab kini sa mga namatyan pinaagig paglaom sa pagkabanhaw.
4 Ang programa sa Sabado sa hapon natapos pinaagig pakigpulong nga “Ang Maglalalang—Iyang Personalidad ug Iyang mga Dalan.” Kini sa kataposan makataronganong nagtultol kanato nga aduna gayoy usa ka Maglalalang. Aron kita mabuligan sa pagtabang sa uban sa pagpabili niining kamatuorana, giluwatan ang librong Is There a Creator Who Cares About You? Samtang kini magpalambo sa ato mismong pagtuo kang Jehova ug sa atong pagpabili sa iyang personalidad ug mga dalan, ang libro gidisenyo ilabina alang niadtong kinsa, bisag edukado kaayo sa sekular nga mga butang, tingali dili motuo sa Diyos.
5 Kinasingkasing nga Resolusyon: Ang kataposang pakigpulong sa kombensiyon nagpasiugda sa panginahanglan alang kanatong tanan nga “Padayon sa Paglakaw Diha sa Dalan ni Jehova.” Pagkahaom niadto nga nakapahayag sa publiko sa resolusyon bahin sa atong indibiduwal nga determinasyon kanunay sa pagtapot, pagsunod, ug pagpalambo sa pagkalabaw sa iya sa Diyos nga dalan sa kinabuhi! (Isa. 30:21) Karon kita kinahanglang determinado sa pagtuman niini nga mga gimbut-an. Pagkamaayong espirituwal nga pagpalig-on nga atong nadawat sa pagtambong sa “Iya sa Diyos nga Dalan sa Kinabuhi” nga Kombensiyon!