Pagkamapasalamaton Tungod sa Kaluoy sa Diyos
1 Sa wala pa mahimong Kristohanon, si apostol Pablo mapintasong misupak sa pagpakaylap sa Kristiyanidad. Apan, tungod kay siya milihok nga walay kabangkaagan, gipakitaan siyag kaluoy. Gipasundayag ni Jehova ang dili-takos nga kalulot, ug gihatagan si Pablo ug asaynment sa pagwali. Gipabilhan niya ang maong asaynment. (Buh. 26:9-18; 1 Tim. 1:12-14) Ang pagkamapasalamaton tungod sa kaluoy ni Jehova nagtukmod kang Pablo sa pagpaningkamot sa pagtuman sa iyang ministeryo.—2 Cor. 12:15.
2 Ingong kapahayagan sa kaluoy sa Diyos, kita usab gihatagan ug ministeryo. (2 Cor. 4:1) Sama kang Pablo, atong ikapasundayag ang atong pagpabili sa kaluoy nga gipakita kanato pinaagi sa pagpaningkamot sa pagtabang sa uban nga mouswag sa espirituwal. Ang usa ka paagi sa paghimo niini mao ang pagsugod ug pagdumalag mga pagtuon sa Bibliya.
3 Pagsugod ug mga Pagtuon sa Bibliya: Ang usa ka paagi sa pagsugod ug mga pagtuon sa Bibliya mao ang paghimog ruta sa magasin. Samtang regular natong duawon kadtong anaa sa atong ruta, mahimong mas masinati kita sa ilang mga gikabalak-an. Sa ngadtongadto, ang usa ka artikulo sa usa sa mga magasin hayan maoy magsilbing sukaranan sa pagtanyag ug pagtuon sa Bibliya ginamit ang brosyur nga Gikinahanglan. Sa mosunod nga mga duaw, posible tingali nga ipadayon ang panaghisgot diha sa brosyur nga Gikinahanglan sa dihang magpahimutang ug mga magasin uban sa tagbalay.
4 Mainampoong Pagpaningkamot Gikinahanglan: Ang pag-ampo nga giduyogan ug makugihong paningkamot magpauswag sa atong kalihokan sa pagsangyaw. Usa ka payunir nga igsoong babaye kinsa may usa ka ginatun-an sa Bibliya miampo nga panalanginan unta siya ni Jehova ug dugang pang mga pagtuon sa Bibliya. Siya usab milihok uyon sa iyang mga pag-ampo. Gisusi niya pag-ayo ang iyang ministeryo ug namatikdan niya nga wala siya magtanyag ug mga pagtuon sa Bibliya sa dihang mohimog mga balikduaw. Gisugdan niya ang paghimo niana ug sa wala madugay nakabaton siyag duha pa ka pagtuon sa Bibliya.
5 Pagkadako sa atong pribilehiyo nga makig-ambit sa pagpahayag sa “maayong balita bahin sa dili-takos nga kalulot sa Diyos”! (Buh. 20:24) Hinaot ang pagkamapasalamaton sa kaluoy sa Diyos magtukmod kanato nga magmakugihon sa pagtabang sa uban nga makabenepisyo sa dili-takos nga kalulot ni Jehova.