Padayon sa Pagsangyaw
1 Ang makuyaw nga mga panahon ania na. Ang sibil nga kagubot, etnikong mga gubat, kinaiyanhong mga katalagman, ug ang uban pang makalilisang mga hitabo maoy kasagaran na. Karon labaw kay sukad masukad, ang tawhanong pamilya nanginahanglan ug maayong balita. Apan, kaylap ang kawalay-pagtagad bahin sa espirituwal nga mga butang. Diha sa pipila ka dapit, lisod tingaling makaplagan ang mga tawo diha sa balay ug mas lisod pa gani ang pagkakaplag ug mga tawo nga mamati kanato o gustong magtuon sa Bibliya. Bisan pa niana, hinungdanon nga kita magpadayon sa pagsangyaw sa maayong balita sa natukod nang Gingharian sa Diyos.—Mat. 24:14.
2 Gugma Alang sa mga Tawo: Ang atong pagsangyaw nagpasiugda sa gugma ni Jehova alang sa mga tawo. “Siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Ped. 3:9; Ezeq. 33:11) Busa, siya nagsugo nga, sumala sa giingon ni Jesus, “sa tanang kanasoran ang maayong balita kinahanglang igawali una.” (Mar. 13:10) Ang Diyos naghangyo sa mga tawo sa pagliso ngadto kaniya ug sa pag-ikyas sa taliabot nga paghukom sa kalibotan ni Satanas. (Joel 2:28, 29, 32; Sof. 2:2, 3) Dili ba kita mapasalamaton nga si Jehova naghatag sa maong kahigayonan kanato?—1 Tim. 1:12, 13.
3 Gipakita sa tibuok-kalibotang taho nga sulod sa 2004 nga tuig sa pag-alagad, dunay aberids nga 6,085,387 ka pagtuon sa Bibliya nga gidumala kada bulan, ug dunay aberids nga mga 5,000 ka bag-ong tinun-an nga nabawtismohan kada semana! Ang uban niining mga bag-ong nagpahinungod nakaplagan tungod sa panalangin ni Jehova sa mapinadayonong mga paningkamot sa mga magmamantala sa pagpakigsulti sa tanan diha sa mga teritoryo nga giasayn kanila. Pagkadakong kalipay ang miresulta diha sa mga kongregasyon, ug pagkadakong pribilehiyo nga mahimong isigkamagbubuhat sa Diyos niining nagaluwas-ug-kinabuhing buluhaton!—1 Cor. 3:5, 6, 9.
4 Pagdayeg sa Ngalan sa Diyos: Kita magpadayon sa pagsangyaw aron madayeg si Jehova sa dayag ug mabalaan ang iyang ngalan atubangan sa tanang katawhan. (Heb. 13:15) Si Satanas nagpahisalaag sa “tibuok gipuy-ang yuta” sa pagpatuo nga ang Diyos walay gahom sa pagsulbad sa mga problema sa katawhan, nga siya walay pagtagad sa pag-antos sa tawo, o siya wala gayod maglungtad. (Pin. 12:9) Pinaagi sa atong pagsangyaw, atong gilabanan ang kamatuoran bahin sa atong kahibulongang langitnong Amahan. Hinaot magpadayon kita sa pagdayeg sa iyang ngalan—karon ug sa walay kataposan.—Sal. 145:1, 2.