Aduna Kitay Ikahatag Kang Jehova
1 Nahibalo ka ba nga ang mga tawo adunay ikahatag sa Diyos? Si Abel naghalad sa iyang bililhong mga hayop kang Jehova. Si Noe ug Job nagtanyag usab ug susamang mga halad. (Gen. 4:4; 8:20; Job 1:5) Siyempre, ang maong mga halad wala magpadato sa Maglalalang sa bisan unsa mang paagi, sanglit siya ang tag-iya sa tanang butang. Apan ang mga halad niadtong matinumanong mga lalaki nagpakita sa ilang dakong gugma sa Diyos. Karon, mahimo natong gamiton ang atong panahon, kusog, ug kahinguhaan sa pagtanyag kang Jehova ug “halad sa pagdayeg.”—Heb. 13:15.
2 Panahon: Angay gayod natong ‘paliton’ ang panahon gikan sa dili kaayo bililhong mga butang aron bug-os kitang makaambit sa pagsangyaw! (Efe. 5:15, 16) Mahimo natong ipasibo ang atong eskedyul aron makaoksilyare payunir sa usa ka bulan o kapin pa kada tuig. Tingali makagugol kitag dugang oras sa pagsangyaw. Ang paggahin ug ekstrang 30 minutos matag semana makadugang ug labing menos duha ka oras kada bulan sa atong ministeryo!
3 Kusog: Aron aduna kitay igong kusog sa pagsangyaw, angay natong likayan ang matang sa lingawlingaw ug trabaho nga makapahago kanato mao nga dili na nato mahatag kang Jehova ang atong kinamaayohan. Angay usab natong likayan ang sobrang kabalaka nga “magpatikuko” sa atong kasingkasing ug magwala sa atong kusog nga magamit sa pag-alagad sa Diyos. (Prov. 12:25) Bisan pag may katarongan kita sa pagkabalaka, labing maayo nga atong ‘itugyan ang atong palas-anon kang Jehova’!—Sal. 55:22; Filip. 4:6, 7.
4 Kahinguhaan: Mahimo usab kitang mohatag sa atong materyal nga kahinguhaan aron sa pagsuportar sa pagsangyaw. Giawhag ni Pablo ang mga isigka-Kristohanon nga ‘mogahin’ kanunay ug ikahatag sa mga nanginahanglan. (1 Cor. 16:1, 2) Sa samang paagi, makagahin usab kitag salapi aron iamot sa lokal nga mga panginahanglan sa kongregasyon ug sa tibuok kalibotang buluhaton. Gipabilhan gayod ni Jehova ang atong kinasingkasing nga paghatag, bisan pag ginagmay ra kana.—Luc. 21:1-4.
5 Daghan nag gihatag kanato si Jehova. (Sant. 1:17) Ikapakita nato ang atong apresasyon pinaagi sa madagayaong paghatag sa atong panahon, kusog, ug ubang mga kahinguhaan aron alagaran siya. Sa pagbuhat niana atong mapahimut-an si Jehova, “kay gihigugma sa Diyos ang malipayong maghahatag.”—2 Cor. 9:7.