‘Ipaambit ang Inyong Kalag’ sa Inyong mga Ginatun-an
1. Unsay gikinahanglan aron matabangan ang usa ka ginatun-an sa Bibliya?
1 Aron matabangan nato ang estudyante sa Bibliya nga modangat sa punto sa pagpahinungod, labaw pa ang gikinahanglan kay sa pagdumala lang ug regular nga pagtuon sa Bibliya uban kaniya. Gipakasama ni apostol Pablo ang iyang relasyon sa iyang mga gitudloan ngadto sa nagpasusong inahan nga nagpangga sa iyang mga anak. Kita usab malipay sa pagpaambit sa ‘atong mga kalag’ aron atong matabangan ang atong mga ginatun-an nga mouswag sa espirituwal.—1 Tes. 2:7-9.
2. Nganong angay kitang magpakitag personal nga interes, ug sa unsang paagi mahimo kana?
2 Pagpakitag Personal nga Interes: Sa dihang ipadapat na sa ginatun-an sa Bibliya ang iyang nakat-onan, ang iyang tanlag motukmod kaniya nga dili na makigsuod sa mga tawong wala magsunod sa mga prinsipyo sa Bibliya. (1 Ped. 4:4) Mahimong isalikway siya sa iyang pamilya. (Mat. 10:34-36) Kita makahupay kaniya pinaagi sa pagpakitag personal nga interes. Misugyot ang usa ka eksperyensiyadong misyonaryo: “Ayaw dayon ug lakaw human sa inyong pagtuon. Kon mahimo, pabilin ug pakigsulti kadiyot.” Magmaigmat sa pagtabang sa imong ginatun-an. Pananglitan, mateleponohan o maduaw ba nimo siya kon siya nagsakit? Mahimo ba nimo siyang tuparan sa paglingkod panahon sa mga tigom ug tabangan sa iyang mga anak, kon haom?
3. Sa unsang paagi atong matabangan ang atong ginatun-an nga makadawat ug pagdasig gikan sa kongregasyon?
3 Tabang Gikan sa Kongregasyon: Kon nagsangyaw ka duol sa balay sa imong ginatun-an, mahimong hapiton nimo siya kadiyot ug ipailaila ang imong mga kauban sa pagsangyaw. Kon nahiangay, matag karon ug unya dapita ang ubang mga magmamantala, lakip ang mga ansiyano, sa pagkuyog kanimo sa imong ginatun-an. Dugang pa, human maestablisar ang usa ka pagtuon, dasiga siya sa pagtambong sa mga tigom sa Kingdom Hall. Pinaagi niini iyang mapahimuslan ang makapadasig nga panag-ubanay sa mga membro sa kongregasyon nga mahimong iyang mga igsoon sa pagtuo sa umaabot.—Mar. 10:29, 30; Heb. 10:24, 25.
4. Unsay ganti sa atong pagkamakugihon?
4 Ang usa ka ginikanan nga nagkugi sa pagtabang sa espirituwalidad sa ilang mga anak malipay pag-ayo sa dihang modesisyon ang ilang mga anak sa pag-alagad kang Jehova ug molakaw diha sa kamatuoran. (3 Juan 4) Susama niana ang atong kalipay sa dihang ipaambit nato ang atong mga kalag sa pagtabang sa atong mga ginatun-an sa Bibliya.