Ikaw Gidapit sa Diyos nga Mahimong Iyang Higala

Buot sa Diyos nga ikaw mahimong iyang higala. Nahunahunaan mo na ba nga ikaw mahimong higala sa labing dakong Persona sa uniberso? Si Abraham, nga nagkinabuhi dugay na kanhi, gitawag ug higala sa Diyos. (Santiago 2:23) Ang ubang gihisgotan sa Bibliya nakatagamtam usab ug panaghigalaay uban sa Diyos ug dagayang gipanalanginan. Karong adlawa, ang mga tawo gikan sa tanang bahin sa yuta nahimong mga higala sa Diyos. Ikaw usab mahimong higala sa Diyos.

Ang pagkahimong higala sa Diyos mas maayo pa kay sa pagkahimong higala ni bisan kinsang tawo. Dili gayod pakyason sa Diyos ang iyang maunongong mga higala. (Salmo 18:25) Ang pagkahimong higala sa Diyos mas maayo pa kay sa pagkabaton ug mga bahandi. Inigkamatay sa tawong dato, ang iyang salapi mapanag-iya sa uban. Apan, kadtong makatagamtam ug panaghigalaay uban sa Diyos makabatog bahandi nga dili makuha ni bisan kinsa.​—Mateo 6:19.

Paningkamotan tingali sa pipila ka tawo nga pugngan ka nga mahibalo bahin sa Diyos. Bisan ang pipila sa imong mga higala ug pamilya tingali mohimo niini. (Mateo 10:36, 37) Kon ikaw kataw-an o hulgaon sa uban, suknaa ang imong kaugalingon, ‘Kinsay buot nakong pahimut-an​—ang mga tawo o ang Diyos?’ Hunahunaa kini: Kon adunay mosulti kanimo nga mohunong ka sa pagkaon, mosunod ka ba kaniya? Dili gayod! Ikaw nagkinahanglan ug pagkaon aron mabuhi. Apan makahimo ang Diyos nga ikaw mabuhi sa walay kataposan! Busa ayaw gayod tugoti si bisan kinsa nga mopugong kanimo nga mahibalo kon sa unsang paagi ikaw mahimong higala sa Diyos.​—Juan 17:3.