“Pagbaton ug Gugma Alang sa Tibuok Kapunongan sa mga Igsoon”
Ang inspiradong mga pulong niini nga ulohan gisulat halos duha ka libong katuigan kanhi. (1 Ped. 2:17) Apan labaw nga kinahanglan nato kining ipadapat karon! Sa unsang paagi mahimo natong higugmaon ang daghan kaayong igsoon sa tibuok kalibotan? Niining walay-gugma nga kalibotan, sa unsang paagi makaseguro kita nga ang atong gugma dili gayod molubad? (Mat. 24:12) Tan-awa kon makatubag ka ba sa mosunod nga mga pangutana samtang imong tan-awon ang video nga Our Whole Association of Brothers.
(1) Kanus-a kita nahimong bahin gayod sa atong Kristohanong panag-igsoonay? (2) Unsang tulo ka kalihokan diin kita ug ang mga igsoon sa tibuok kalibotan nagkahiusa sa pagbuhat? (3) Sa unsang paagi ang atong mga igsoon nagpakita sa ilang determinasyon sa pagsangyaw (a) sa kamingawan sa Alaska, (b) sa dagko kaayong mga pantalan sa Europe, ug (c) sa bagang kalasangan sa Peru? (4) Nganong talagsaon kaayo ang atong buluhatong pagsangyaw? (5) Paghatag ug mga pananglitan kon giunsa paghupay ug pagtinabangay sa mga Saksi ni Jehova sa usag usa (a) human sa usa ka linog, (b) human sa usa ka kusog kaayong bagyo, ug (c) panahon sa gubat sibil? (6) Unsang praktikal nga mga paagi nga kitang tanan makapasundayag sa dakong ilhanan sa atong Kristohanong panag-igsoonay? (Juan 13:35) (7) Unsa ang mga benepisyo sa pagtinabangay sa pagtukod sa atong kaugalingong mga Kingdom Hall? (8) Sa unsang paagi ang mga igsoon sa Eastern Europe ug Russia nakapabiling aktibo sa espirituwal panahon sa pagbando? (9) Unsang talagsaong mga paningkamot ang gihimo sa daghang Saksi aron makatambong ug mga kombensiyon, ug ngano? (10) Sa unsang paagi kini nga video nakahimo nimong mas determinado (a) sa pagtambong sa Kristohanong mga tigom duyog sa mga igsoon aron sa pagsimba kang Jehova, (b) sa pagtabang sa uban panahon sa panginahanglan, ug (c) sa pagsangyaw sa bisan unsang panahon ug paagi nga ikaw makahimo niana? (11) Sa unsang paagi ug kanus-a nato magamit kini nga video sa ministeryo?
Ang pangunang rason nga kita nahimong bahin sa atong Kristohanong panag-igsoonay mao ang atong gugma kang Jehova. Busa buot natong makakat-on bahin kaniya ug makatudlo sa uban bahin kaniya. Ug kita nahigugma sa mga tawong gihigugma ni Jehova. Dihang motabang kita kanila panahon sa panginahanglan, dili kita magdahom nga ang Diyos magpasalamat kanato. Hinunoa, kita magpasalamat sa Diyos tungod kay atong giisip ang atong Kristohanong panag-igsoonay ingong bililhong gasa gikan kaniya. Samtang nagsingabot na ang kataposan niining walay-gugma nga kalibotan, hinaot kita magpadayon sa pagpakitag gugma alang sa tibuok kapunongan sa mga igsoon!