KAPITULO 5
Unsang Matanga sa mga Higala ang Imong Pilion?
1, 2. (a) Unsa nga mga hagit ang giatubang sa mga Kristohanon maylabot sa mga kaubanan? (b) Nganong kita angayng interesado sa pagpili ni Jeremias ug mga higala?
UNSAY imong buhaton kon ang pipila sa imong mga kaubanan, silingan, o isigkaestudyante magdapit kanimo sa pagtambong sa usa ka Christmas party? Kon sugoon ka sa imong amo sa pagpamakak o pagbuhat ug butang nga ilegal, unsay imong buhaton? Komosta na man kon ang mga awtoridad sa kagamhanan magsugo kanimo nga makigbahin sa mga kalihokan nga supak sa imong baroganan sa neyutralidad? Ang imong tanlag lagmit dili gayod motugot nga buhaton nimo ang bisan hain niining mga butanga, bisan pag ikaw tingali biaybiayon o buhatag daotan tungod sa imong pagdumili niini.
2 Ingon sa atong makita, naatubang ni Jeremias sa daghang higayon ang samang mga hagit. Matabangan ka gayod kon imong palandongon kon kinsa ang pipila ka tawo ug mga grupo nga gipakiglabotan ni Jeremias sa daghang tuig sa iyang pag-alagad. Ang uban kanila misulay sa pagpaluya kaniya sa pagtuman sa iyang asaynment. Bisan tuod si Jeremias kinahanglang makiglabot kanila, dili gayod sila ang iyang pinili nga mga higala. Apan, ikaw makabenepisyo sa pagtagad kon kinsa ang gipili ni Jeremias nga mga higala, silang nagpaluyo ug nagpalig-on sa iyang determinasyon nga magmatinumanon. Oo, aduna kitay makat-onang leksiyon kon kinsa nga mga kaubanan ang gipili ni Jeremias.
KINSAY IMONG GIHIMONG MGA HIGALA?
3. Unsa ang gihangyo ni Zedekias kang Jeremias, ug unsay sanong ni Jeremias?
3 Sa wala pa malaglag ang Jerusalem, gikonsulta ni Haring Zedekias si Jeremias sa daghang higayon. Ngano? Gilaoman sa hari nga siya makadungog ug maayong mga pasalig bahin sa kon unsay mahitabo sa iyang gingharian. Buot niyang madunggan nga imantala ni Jeremias nga mangilabot ang Diyos aron luwason ang Juda gikan sa mga kaaway niini. Pinaagi sa iyang mga emisaryo, si Zedekias mihangyo kang Jeremias: “Palihog, pagpakisayod alang kanamo kang Jehova, tungod kay si Nabucodonosor nga hari sa Babilonya nakiggubat kanamo. Tingali buhaton ni Jehova kanamo ang sumala sa tanan niyang katingalahang mga buhat, aron [si Nabucodonosor] mosibog gikan kanamo.” (Jer. 21:2) Dili gustong sundon sa hari ang sugo sa Diyos nga mosurender sa Babilonya. Gipakasama sa usa ka eskolar si Zedekias sa “usa ka pasyente nga nagbalikbalik sa doktor aron siya pasaligan nga mamaayo, apan wala motomar sa tambal nga gireseta kaniya.” Komosta si Jeremias? Mabatonan unta niya ang pag-uyon ni Zedekias kon iya kining sultihan sa gustong madungog niini. Nan, nganong wala na man lang bag-oha ni Jeremias ang iyang mensahe ug magpahayahay? Wala niya kana buhata tungod kay gisugo siya ni Jehova sa pagmantala nga laglagon ang Jerusalem.—Basaha ang Jeremias 32:1-5.
4. Unsa nga mga desisyon ang atong himoon bahin sa pagpakighigala, sama kanilang anaa sa atong trabahoan?
4 Tingali ang imong kahimtang susama usab kang Jeremias. Sa walay duhaduha ikaw nakiglabot sa imong mga silingan, kauban sa trabaho, o isigkaestudyante nga ikaingong mga kaila o kaubanan. Apan buot ba nimong mas masuod pa kanila pinaagi sa pagpakighigala kanila bisan pag sila dili interesadong maminaw o mosunod sa sugo sa Diyos? Bisan pag si Zedekias nagdumili sa pagsunod sa sugo sa Diyos, si Jeremias dili bug-os makalikay kaniya tungod kay siya pa gihapon ang hari. Apan si Jeremias dili obligado sa pagpahiuyon sa sayop nga panghunahuna sa hari ni siya nagtinguha nga mabatonan ang pag-uyon niini. Kon nagpasignunot pa si Jeremias sa kagustohan sa hari, si Zedekias makahatag unta kaniya ug daghang gasa ug mga benepisyo. Apan si Jeremias wala magpadaog sa mga pagpit-os o panental aron mahimong suod kang Zedekias. Ngano? Tungod kay dili gayod buot ni Jeremias nga ikompromiso ang baroganan nga giingon ni Jehova nga angay niyang huptan. Ang iyang panig-ingnan angayng magpalihok kanato sa pagsusi kon ang atong gipili nga mga higala makatabang ba kanato nga magmaunongon sa Diyos. Dili nimo malikayan ang pagpakiglabot sa mga tawo nga wala mag-alagad sa Diyos—silang anaa sa trabahoan, eskuylahan, o sa imong kasilinganan. (1 Cor. 5:9, 10) Apan, nahibalo ka nga kon sila ang imong pilion ingong mga higala, mahimong madaot gayod ang imong pagpakighigala sa Diyos.
MAKIGHIGALA KA BA SA MGA DILI-MATINUOHON?
5, 6. Unsay gihimo sa pipila aron pahilomon si Jeremias?
5 Dili kay si Zedekias lamang ang nakahatag ug makadaot nga impluwensiya kang Jeremias. Usa ka saserdote nga ginganlag Pasur ‘nagdapat’ kang Jeremias, tingali nagbunal kaniya sa 39 ka beses. (Jer. 20:2; Deut. 25:3) Ang pipila ka prinsipe sa Juda nagbunal usab kang Jeremias ug unya nagbilanggo kaniya didto sa “talikalaanan.” Ang manalagna gibutang sa usa ka atob diin pait kaayo ang kahimtang, mao nga human sa daghang adlaw siya nahadlok nga basin didto ra siya mamatay. (Basaha ang Jeremias 37:3, 15, 16.) Unya, human buhii si Jeremias sa kadiyot nga panahon, gihulhogan si Zedekias sa ubang mga prinsipe nga patyon si Jeremias. Alang kanila, iyang gipaluya ang mga kasundalohan sa Juda. Tungod niana ang manalagna gitambog sa lapokon nga atabay aron mamatay. (Jer. 38:1-4) Imong nabasa nga si Jeremias naluwas gikan sa maong makalilisang nga kamatayon. Apan, kini nga mga panghitabo nagpakita kon sa unsang paagi kadtong mga tawo nga mas daghan untag kahibalo nahimong dili-matinuohon sa gipamulong sa manalagna sa Diyos, hinuon sila mibalitok kaniya.
6 Dili lamang kay sibil nga mga awtoridad ang mga kaaway ni Jeremias. Sa laing higayon, ang pipila ka tawo, tingali ang mga silingan ni Jeremias gikan sa Anatot, nga maoy siyudad nga iyang natawhan, nagbahad sa pagpatay kaniya kon dili siya moundang sa pagpanagna. (Jer. 11:21) Wala sila makauyon sa iyang gisulti ug ila siyang gibaharan. Apan, gipili ni Jeremias si Jehova ingong iyang higala inay ang iyang mga silingan. Ang uban niyang mga kontemporaryo misulay pa gani sa pagdagmal kaniya. Sa dihang gigamit ni Jeremias ang usa ka yugo aron ilarawan sa mga Hudiyo nga kinahanglan silang magpailalom sa pagmando sa hari sa Babilonya aron sila magpabiling buhi, gikuha ni Hananias ang yugo nga kahoy gikan sa liog ni Jeremias ug gibali kini. Matod pa sa maong mini nga manalagna, si Jehova kono miingon: “Akong pagabalion ang yugo sa hari sa Babilonya.” Si Hananias namatay nianang tuiga mismo, ug imong makita kon kinsa ang tinuod nga manalagna. (Jer. 28:1-11, 17) Human laglaga ang Jerusalem ingon sa gipasidaan ni Jeremias, wala tumana ni Johanan ug sa ubang mga pangulo sa kasundalohan ang sugo sa Diyos nga kinahanglan silang magpabilin sa yuta sa Juda. “Kabakakan ang imong gisulti,” sila miingon kang Jeremias. Ang “among Diyos wala magpadala kanimo, nga nag-ingon, ‘Ayaw pagsulod sa Ehipto aron mopuyo didto.’” Dugang pa, sila mapangahasong nagsalikway kang Jehova pinaagi sa pagdala kang Jeremias ug Baruk uban kanila didto sa Ehipto.—Jer. 42:1–43:7.
Unsang matanga sa mga tawo ang kinahanglang pakiglabotan ni Jeremias? Unsay imong makat-onan sa panig-ingnan ni Jeremias?
7. Unsang hagit ang imong giatubang maylabot sa pagkamatinumanon kang Jehova?
7 Sulod sa daghang katuigan, si Jeremias gilibotan sa mga kaaway ug sa mga tawong dili matinuohon. Palandonga ang iyang gihimo. Dali ra unta siyang makapasignunot sa mga tawo nga kulang ug pagtahod sa Diyos ug sa iyang Pulong sanglit sila anaa ra sa iyang palibot. Komosta ang imong kahimtang? Lagmit ikaw nakiglabot sa mga tawo nga susama niadtong mga tawo sa palibot ni Jeremias. Sila kusganon man nga misupak kanimo ug sa imong Diyos o sila daw maayohon nga mga tawo, angay mo ba silang pilion ingong mga higala? Maalamon ba nga makighugoyhugoy sa mga tawo nga wala manumbaling sa mga tagna sa Diyos? Kon si Jeremias anaa sa imong kahimtang, siya ba makighigala niadtong nagkinabuhing sukwahi sa Pulong sa Diyos o nagbutang sa ilang pagsalig sa tawo? (2 Cron. 19:2) Tin-awng gipakita ni Jehova kang Jeremias kon unsa ang mga sangpotanan sa pagsalig sa tawo inay sa Diyos. (Basaha ang Jeremias 17:5, 6.) Unsay imong hunahuna bahin niana?
8. Hisgoti ang mga hagit nga lagmit giatubang sa mga Kristohanon sa inyong dapit.
8 Gibati sa pipila ka Kristohanon nga mahimo silang makapalambo sa ilang negosyo o karera pinaagi sa pag-abiabi ug pakighugoyhugoy sa mga kliyente nga dili-magtutuo. Apan, ang pagbuhat niana dili ba kaha magpahitumpawak sa mga Kristohanon nga malangkit sa daotang mga panagkauban ug kapeligrohan, sama sa pagpamulong ug law-ayng mga sinultihan o pagpatuyang ug inom? Kanay hinungdan kon nganong daghang Kristohanon nga nakaatubang sa maong kahimtang ang mipili sa paglikay sa daotang panagkauban bisan pag sila makaganansiya unta o mouswag sa kalibotan. Sa susama, ang usa ka amo o isigkaempleyado tingali dili magpanuko sa paglimbong sa mga kustomer. Apan, ang tinuod nga mga Kristohanon dili gayod angayng magpaimpluwensiya sa mga tawo nga anaa sa ilang palibot. Usahay, lisod tingali ang paghimog mga desisyon bahin niana. Mapasalamaton kita sa mga panig-ingnan nga gihatag ni Jeremias, kinsa misubay sa usa ka dalan nga naghatag kaniyag maayong tanlag ug, labing hinungdanon, usa ka maayong relasyon sa Diyos.
9. Unsa ang kapeligrohan kon imong gitinguha nga magpahiuyon sa kadaghanan?
9 Tungod sa baroganan ug pagtuo ni Jeremias siya nahimong sentro sa pagbiaybiay sa pipila niya ka isigka-molupyo sa Juda. (Jer. 18:18) Bisan pa niana, siya andam nga magpabiling lahi gikan sa iyang mga kontemporaryo nga misunod sa “dalan nga gidawat sa kadaghanan.” (Jer. 8:5, 6) Usahay mas gipalabi pa gani ni Jeremias nga siya walay kauban, nga ‘mag-inusara sa paglingkod.’ Mas gipili niya kana kay sa daotang panagkauban, sa pagpakighigala niadtong mga tawo nga makahatag kaniyag dili maayong impluwensiya. (Basaha ang Jeremias 9:4, 5; 15:17.) Komosta man pod sa imong bahin? Karon, sama sa adlaw ni Jeremias, ang dalan nga gidawat sa kadaghanan maoy supak sa kabubut-on sa Diyos. Sukad kaniadto ang katawhan sa Diyos mabinantayon gayod sa ilang pagpilig mga higala. Wala kana magpasabot nga si Jeremias walay mga higala. Dunay mga tawo nga nanalipod ug mitabang kaniya. Kinsa kini sila? Ang pagkaila kanila makatabang gayod kanimo.
UNSANG MATANG SA MGA HIGALA ANG GIPILI NI JEREMIAS?
10, 11. (a) Sa unsang mga prinsipyo gipasukad ni Jeremias ang iyang pagpilig mga higala? (b) Kinsa ang mga higala ni Jeremias, ug unsa nga mga pangutana ang motungha bahin kanila?
10 Kinsa ang gihimong mga higala ni Jeremias? Ingong pagsunod sa sugo ni Jehova, sa makadaghan iyang gikondenar ang mga daotan, malimbongon, mapihigon, mabangis, mapinasagdanon, ug imoral—kadtong mga mitalikod sa putling pagsimba baylo sa pagsimba sa mga idolo, sa ingon nakahimog espirituwal nga pagpamampam. Iyang giawhag ang iyang kaubang mga taga-Juda: “Biya kamo, palihog, ang matag usa gikan sa iyang daotang dalan, ug himoang maayo ang inyong mga dalan ug ang inyong mga pakiglabot.” (Jer. 18:11) Bisan human sa kalaglagan sa Jerusalem, gituboy gihapon ni Jeremias ang “mga buhat sa mahigugmaong-kalulot” sa Diyos, ang iyang “mga kaluoy,” ug ang iyang “pagkamatinumanon.” (Lam. 3:22-24) Si Jeremias buot lamang makighigala niadtong matinumanong mga alagad ni Jehova.—Basaha ang Jeremias 17:7.
11 Wala ililong kanato kon kinsa kadtong gipili ni Jeremias ingong iyang mga higala o suod nga mga kauban. Ang pipila kanila maoy tinuod niya nga mga kadapig—si Ebed-melek, Baruk, Seraias, ug ang mga anak nga lalaki ni Sapan. Tingali kita mangutana: ‘Unsang matanga sila sa mga tawo? Sa unsang paagi sila nakiglabot kang Jeremias? Nganong ikaingon nga sila tinuod niyang mga higala? Ug giunsa nila pagtabang si Jeremias aron magpabilin sa iyang integridad?’ Susihon nato kini samtang tagdon nato ang atong kahimtang.
12. (a) Unsa ang mga kaamgiran ni Jeremias ug Baruk, ingon sa makita sa panid 58? (b) Kinsa si Seraias, ug unsay atong nahibaloan bahin kaniya?
12 Mopatim-aw nga ang labing suod nga higala sa manalagna mao si Baruk, ang anak nga lalaki ni Nerias. Gisalig ni Jeremias kaniya ang responsibilidad sa pagsulat sa mga kapahayagan ni Jehova samtang kini iyang gidiktar kaniya. Ug sa dihang nahimo na kining linukot nga basahon, si Baruk magabasa niini atubangan sa publiko ug dayon sa mga prinsipe sa Juda. (Jer. 36:4-8, 14, 15) Si Baruk ug Jeremias parehong mituo ug misalig nga matuman gayod ang mga gitagna sa Diyos. Susama ang ilang mga nasinatian panahon sa ulahing 18 ka magubtanong mga tuig sa Juda. Migugol silag dakong panahon samtang duyog nilang gibuhat ang buluhaton nga gihatag sa Diyos kanila. Silang duha nakasinatig mga kalisdanan ug kinahanglang motago gikan sa mga kaaway. Ug pareho silang nakadawat ug personal nga pagdasig gikan kang Jehova. Si Baruk lagmit naggikan sa usa ka prominenteng pamilya sa mga eskriba sa Juda. Ang Kasulatan nagtawag kaniya nga “ang sekretaryo,” ug ang iyang igsoong lalaki nga si Seraias naghupot ug hataas nga katungdanan sa palasyo. Sama kang Baruk, si Seraias sa ulahi miuban kang Jeremias sa pagmantala sa mga tagna ni Jehova. (Jer. 36:32; 51:59-64) Ang pagkaandam niining duha ka anak nga lalaki ni Nerias nga makigtambayayong kang Jeremias niadtong malisod nga mga panahon lagmit nakapalig-on ug nakapadasig gayod sa manalagna. Ikaw usab mapalig-on ug madasig sa mga igsoon nga duyog kanimong matinumanon nga nag-alagad kang Jehova.
Unsay imong makat-onan sa pagpili ni Jeremias ug mga higala?
13. Ingon sa makita sa panid 63, giunsa pagpamatuod ni Ebed-melek nga siya usa ka maayong higala ni Jeremias?
13 Ang laing talagsaong kadapig ni Jeremias mao si Ebed-melek. Sa dihang ang nasuko pag-ayo nga mga prinsipe nagtambog kang Jeremias sa usa ka walay sulod nga atabay aron siya mamatay, ang tawo nga maisogong nanalipod kaniya maoy usa ka langyaw, si Ebed-melek nga Etiopianhon. Usa siya ka eunuko o opisyal sa balay sa hari. Atubangan sa daghan iyang giduol si Zedekias nga naglingkod diha sa Ganghaan ni Benjamin. Uban ang kaisog, nananghid si Ebed-melek kang Zedekias nga iyang luwason si Jeremias gikan sa lapokon nga atabay. Iyang giuban ang 30 ka tawo sa pagbuhat niana, nga nagpakitang lagmit gidahom ni Ebed-melek nga mosukol kanila ang mga kaaway ni Jeremias. (Jer. 38:7-13) Wala kita masayod kon unsa ka suod si Ebed-melek ug si Jeremias. Apan pinasukad sa ilang pagpakighigala kang Jehova, kita makaingon nga silang duha suod gayod nga managhigala. Nahibalo si Ebed-melek nga si Jeremias manalagna ni Jehova. Alang kaniya “daotan” ang gibuhat sa mga prinsipe ug andam niyang isakripisyo ang iyang katungdanan aron buhaton ang butang nga matarong. Oo, usa ka maayong tawo si Ebed-melek. Tungod niana si Jehova nagpasalig kaniya: “Luwason ko ikaw [sa adlaw sa katalagman sa Jerusalem] . . . tungod kay ikaw misalig kanako.” (Basaha ang Jeremias 39:15-18.) Pagkamaayong pasalig! Dili ba kana ang matang sa higala nga imong gipangita?
14. Unsay atong nahibaloan bahin sa pamilya ni Sapan ug sa ilang pagpakiglabot kang Jeremias?
14 Lakip sa ubang mga higala ni Jeremias mao ang tulo ka anak nga lalaki ug usa ka apo ni Sapan. Sila sakop sa usa ka pamilya nga hatag-as ug katungdanan, diin si Sapan nag-alagad kanhi isip sekretaryo ni Haring Josias. Sa dihang ang mga kaaway ni Jeremias nagtinguha sa pagpatay kaniya, “ang kamot ni Ahikam nga anak nga lalaki ni Sapan nag-uban kang Jeremias, aron dili siya itugyan ngadto sa kamot sa katawhan.” (Jer. 26:24) Adunay igsoong lalaki si Ahikam nga ginganlag Gemarias. Sa dihang gibasa ni Baruk sa publiko ang mga paghukom sa Diyos, nadunggan siya ni Micaias nga anak nga lalaki ni Gemarias ug iya kanang gipahibalo dayon sa iyang amahan ug sa uban pang mga prinsipe. Kay nabalaka sila sa reaksiyon ni Jehoiakim, ilang gitambagan si Jeremias ug Baruk sa pagtago. Ug sa dihang gisalikway sa hari ang mensahe sa Diyos, usa si Gemarias niadtong mga nagpakiluoy sa hari nga dili sunogon ang linukot nga basahon. (Jer. 36:9-25) Si Elasa, nga lain pang anak nga lalaki ni Sapan, gisaligan ni Jeremias sa pagdala ug usa ka sulat nga naundan sa mga tagna ngadto sa mga Hudiyo nga nadestiyero sa Babilonya. (Jer. 29:1-3) Busa sa pamilya ni Sapan adunay tulo ka anak ug usa ka apo nga misuportar sa manalagna sa Diyos. Hunahunaa kon unsa gayod ka dako ang pagpabili ni Jeremias niining mga tawhana! Sila nahimong managhigala dili tungod kay pareho silag gustong pagkaon, ilimnon, kalingawan o hilig. Mas labaw pa niana ang pasukaranan sa ilang panaghigala.
PILIA NGA MAALAMON ANG IMONG MGA HIGALA
15. Unsang maayong panig-ingnan ang gihatag ni Jeremias sa pagpilig mga higala?
15 Aduna kay makat-onan sa mga pagpakiglabot ni Jeremias sa iyang mga kontemporaryo, daotan man sila o maayo. Ang hari, daghang prinsipe, mini nga mga manalagna, ug mga pangulo sa kasundalohan nagpit-os kaniya nga bag-ohon ang iyang mensahe. Apan, si Jeremias wala mokompromiso. Tungod sa iyang baroganan wala sila makauyon kaniya, apan wala magtinguha si Jeremias nga makighigala kanila. Sukad pa sa sinugdan, si Jehova lamang ang iyang labing suod nga higala. Si Jeremias andam nga moantos sa pagkamabatokon sa ubang mga tawo bugti sa iyang pagkamatinumanon sa Diyos. (Basaha ang Lamentaciones 3:52-59.) Bisan pa niana, ingon sa atong nakita, si Jeremias wala mag-inusara sa iyang determinasyon nga mag-alagad kang Jehova.
16, 17. (a) Unsang tabang ang mabatonan sa mga alagad ni Jehova gikan sa usa ka maayong higala? (b) Bisan diing nasora ka nagpuyo, asa nimo makaplagan ang labing maayong mga higala?
16 Si Ebed-melek maoy usa ka maayong higala tungod sa iyang pagtuo ug pagsalig kang Jehova. Kini nga tawo nagpakitag kaisog ug determinasyon sa pagluwas kang Jeremias. Si Baruk kinabubut-ong naggahin ug dakong panahon uban ni Jeremias ug nagtabang kaniya sa pagmantala sa mga mensahe ni Jehova. Karong adlawa makakaplag kita ug maayong mga higala diha sa Kristohanong kongregasyon nga sama usab ka bililhon niining mga tawhana. Si Cameron, usa ka 20-anyos nga regular payunir, mapasalamaton kaayo sa dakong nahimo ni Kara kaniya, kinsa usa usab ka payunir. Si Cameron miingon, “Pinaagi sa iyang mga panig-ingnan ug mga pulong, gidasig ako ni Kara sa pag-una kang Jehova diha sa akong kinabuhi.” Kining duha ka sister layo ra sa usag usa, apan si Kara kanunayng motawag o mosulat kang Cameron aron sa pagtino kon maayo ba ang kahimtang sa iyang higala ug aron sila magdinasigay. “Nasayod siya sa tanan kon unsa ang kahimtang sa among pamilya,” miingon si Cameron. “Nasayod siya sa nahitabo sa akong igsoong babaye ug kon unsa ka sakit ang akong gibati sa dihang kini mirebelde ug mibiya sa kamatuoran. Siya kanunayng nagpaluyo kanako sa maong mga panahon, ug wala ko masayod unsay akong buhaton kon wala pa ang iyang maayong impluwensiya ug tabang. Dako kaayo siyag gikatabang kanako.”
17 Makakaplag kag maayong mga higala diha sa Kristohanong kongregasyon, managsama man kamog pangedaron o dili. Ikaw ug ang imong mga igsoong lalaki ug babaye adunay samang pagtuo, mga prinsipyo, gugma kang Jehova, paglaom, ug tingali mga pagsulay nga nasinatian. Ikaw makahimo sa pagpakigtambayayong kanila diha sa Kristohanong ministeryo. Sila makadasig kanimo sa dihang ikaw makasagubang ug mga kalisdanan, ug ikaw usab makadasig kanila. Sila magmaya duyog kanimo kon malipayon ka sa imong pag-alagad kang Jehova. Dugang pa, ang maong pakighigalaay mahimong molungtad hangtod sa hangtod.—Prov. 17:17; 18:24; 27:9.
18. Unsay imong nakat-onan bahin sa pagpili ni Jeremias ug mga higala?
18 Kinahanglang tin-aw alang kanato ang leksiyon nga atong makuha sa pagpili ni Jeremias ug mga higala. Hinumdomi kining dili-malalis nga kamatuoran: Madaot gayod ang imong pagtuo kon makigsuod ka sa mga tawo kansang mga gituohan sukwahi sa mga pagtulon-an sa Bibliya. Hinungdanon ang pagpadapat niini nga kamatuoran karon sama sa panahon ni Jeremias. Aron siya molampos sa pagbuhat nga matinumanon sa iyang asaynment ug aron mabatonan ang panalangin ni Jehova, kinahanglang ipakita ni Jeremias nga siya lahi gikan sa kadaghanan sa iyang mga kontemporaryo. Dili ba mao man usab kana ang angay nimong buhaton? Gipili ni Jeremias ang mga kaubanan nga sama kaniyag pagtuo ug nagpaluyo kaniya sa pagtuman sa iyang buluhaton. Oo, ang tagsatagsa ka matinumanong Kristohanon karong adlawa aduna gayoy makat-onan bahin sa maalamong pagpili ni Jeremias ug mga kaubanan!—Prov. 13:20; 22:17.
Unsaon nimo pagpadapat ang panig-ingnan ni Jeremias kon kinsa ang imong pilion ug dili pilion ingong mga higala?