Pagdumalag Epektibong Pagtuon sa Bibliya
1. Unsay responsabilidad sa mga magmamantala nga nagdumalag pagtuon sa Bibliya?
1 Walay makaalagad sa Diyos gawas kon si Jehova “magkabig kaniya.” (Juan 6:44) Bisan pa niana, angayng himoon sa mga magmamantala ang ilang bahin aron matabangan ang ilang ginatun-an nga masuod sa ilang langitnong Amahan. (Sant. 4:8) Nagkinahanglan kinig pagpangandam. Dili igo ang pagbasa lang sa matag parapo ug pagsukna sa mga pangutana aron matabangan ang estudyante nga makasabot sa mensahe ug mouswag.
2. Unsay malampos kon epektibo ang pagdumalag pagtuon sa Bibliya?
2 Aron makadumalag epektibong pagtuon, angayng tabangan sa mga magmamantala ang ilang estudyante nga (1) masabtan ang gitudlo sa Bibliya, (2) dawaton ang gitudlo sa Bibliya, ug (3) ipadapat ang gitudlo sa Bibliya. (Juan 3:16; 17:3; Sant. 2:26) Dangtan tingalig mga bulan ang pagtabang sa estudyante pinaagi niini. Apan ang matag lakang hinungdanon aron anam-anam nga maugmad ang iyang relasyon kang Jehova ug magpahinungod kaniya.
3. Nganong ang epektibong mga magtutudlo mogamit ug punto de bistang mga pangutana?
3 Unsa Kahay Gihunahuna sa Estudyante?: Aron masayran kon nasabtan ug gidawat ba sa estudyante ang iyang nakat-onan, ayawg pakyawa ang estorya kondili dasiga siya nga mopahayag sa iyang pagbati. (Sant. 1:19) Iya bang nasabtan kon unsay gitudlo sa Bibliya bahin sa ulohan nga gihisgotan? Mapatin-aw ba niya kini sa iyang kaugalingong mga pulong? Unsay iyang pagbati bahin sa iyang nakat-onan? Nagtuo ba siya nga makataronganon ang gitudlo sa Bibliya? (1 Tes. 2:13) Iya bang nasabtan nga angay siyang magbag-o base sa iyang nakat-onan? (Col. 3:10) Aron matubag kini, kinahanglang mataktikanhon tang mosuknag punto de bistang mga pangutana, ug maminaw.—Mat. 16:13-16.
4. Unsay angayng himoon kon malisdan ang estudyante sa pagdawat ug pagpadapat sa gitudlo kaniya gikan sa Bibliya?
4 Nagkinahanglag panahon aron maluka ang nakagamot pag-ayo nga mga batasan ug pangatarongan. (2 Cor. 10:5) Komosta kon dili dawaton o dili ipadapat sa estudyante ang atong gitudlo kaniya? Magpailob ta ug hatagag igong panahon ang Pulong sa Diyos ug balaang espiritu nga molihok sa kasingkasing sa estudyante. (1 Cor. 3:6, 7; Heb. 4:12) Imbes pugson siya, sagad mas maayong mopadayon sa laing topiko kon nalisdan ang estudyante sa pagdawat o pagpadapat sa usa ka pagtulon-an sa Bibliya. Samtang padayon tang magmapailobon ug mahigugmaong magtudlo kaniya sa Bibliya, basin mapalihok ra siya sa paghimog nahiangayng kausaban.