AHITOPEL

Usa ka lumad sa Gilo sa kabungtoran sa Juda (2Sa 15:12), amahan sa usa sa mga gamhanang tawo ni David nga ginganlag Eliam, ug lagmit nga apohan ni Bat-seba. (2Sa 11:3; 23:34) Ingong personal nga magtatambag ni David, ang maalamong tambag ni Ahitopel gitamod nga samag pulong mismo ni Jehova. (2Sa 16:23) Sa ulahi kining kanhi suod nga higala sa kamalipoton nahimong maluibon ug miduyog kang Absalom nga anak ni David sa pagpukan sa hari. Ingong pangulo sa pagrebelde, siya nagtambag kang Absalom nga among-amongan ang mga puyopuyo ni David, ug siya nangayog pagtugot sa pagtigom ug 12,000 ka sundalo ug dihadiha pangitaon ug patyon si David samtang si David wala pa maorganisar ug maluya pa. (2Sa 15:31; 16:​15, 21; 17:1-4) Sa dihang gisanta ni Jehova kining mapangahasong laraw, ug ang tambag ni Husai ang gisunod, dayag nga naamgohan ni Ahitopel nga ang pag-alsa ni Absalom mapakyas. (2Sa 15:32-34; 17:5-14) Naghikog siya ug gilubong uban sa iyang mga katigulangan. (2Sa 17:23) Kini lamang ang paghikog nga gihisgotan sa Hebreohanong Kasulatan nga dili panahon sa gubat. Ang iyang pagluib dayag nga gipahinumdom sa Salmo 55:12-14.