Mga Milagro ug mga Aparisyon—Mga Ilhanan Gikan sa Diyos?

ANG mga milagro karong adlawa sa gihapon isipon nga . . . usa ka matang sa sulat sa rekomendasyon, usa ka garantiya sa tinuod nga mensahe sa Diyos, iyang gamhanang patik sa usa ka misyon o pulong nga gikan kaniya.” Ang mga milagro nga gipunting dinhi ni Joseph Vandrisse, ang koresponsal sa Batikano alang sa Pranses nga inadlawng mantalaang Le Figaro, kinaiyanhon nga mao kadtong ginadawat sa Iglesya Katolika. Apan unsa ang mga batakan sa simbahan sa pagtino kon kaha ang usa ka milagro o aparisyon maoy tinuod nga gikan sa Diyos?

Ang Iglesya ba ang Mohukom sa Iyang Kaugalingong Kaso?

Sumala sa Katolikong mga awtoridad, kinahanglang tagbawon sa mga aparisyon ang duha ka kondisyon. Una, kinahanglang sila mahiuyon sa mga pagtulon-an sa iglesya. Ang usa ka iladong pananglitan mao ang aparisyon sa Lourdes, diin ang “Birhen” nagpaila sa iyang kaugalingon ingong “Ang Imaculada Concepcion.” Makaiikag, pipila ka tuig una pa niini, si Papa Pio IX milagda nga sa pagkasamkon si Maria gitipigan nga nahigawas sa orihinal nga sala. Sa 1933 ang umaabot nga Pio XII nagpadayag sa iyang hunahuna nga ang duha ka panghitabo nagkalambiggit, nga nagpahayag: “Ang Imaculadang Birhen, ang Inahan sa Diyos ug binulahan taliwala sa kababayen-an, buot molig-on sa iyang kaugalingong mga ngabil sa butang gibatbat sa iyang dili-masayop Supremong Papa didto sa Roma. Iyang gihimo kini pagkatapos gayod sa usa ka inilang aparisyon sa Massabielle Grotto [Lourdes].”

Ikaduha, ang batasan sa usa niadtong nakakita sa aparisyon pagatagdon. Ingon sa gipahayag sa obispo sa Tours: “Ang simbahan . . . mituo sa mga aparisyon [sa Lourdes] tungod sa pagkabalaan ni Bernadette.” Ang eklesiastikal nga mga awtoridad nagaisip nga si Bernadette ug si Lucie, kinsa miangkon nga nakakita kang Maria sa Lourdes ug Fátima sa matag usa, nakakab-ot niining kondisyona pinaagi sa pagkahimong mga madre sa ulahi.

Ang mga mensahe nga gipasa maoy uyon sa Katolikong pagtulon-an. Ang mga kinabuhi sa mga nakakita sa panan-awon maoy uyon sa sulundan nga tinukod sa simbahan. Niining mga kasoha, dili gayod ikahibulong nga ang mga aparisyon nga giila sa Katolikong Simbahan nagapamatuod sa bug-os sa iyang kaugalingong mga tradisyon ug mga doktrina, bisan ang mga labing bag-o, sama sa Imaculada Concepcion.

Apan ang mga milagro ug mga aparisyon tinuod bang mga ilhanan nga gikan sa langit nga nagapamatuod sa kamatuoran sa mga pagtulon-an sa simbahan? Si J. Bricout, ang editor sa Dictionnaire pratique des connaissances religieuses (Diksiyonaryo sa Relihiyosong Kahibalo) mikutlo ug laing Katolikong manunulat, si P. Buysse, kinsa misulat: “Ingong ang mga milagro sa Lourdes dunay ispisipikong koneksiyon sa ‘mga pagtulon-an nga iya lamang sa Katolikong Simbahan’ (ang Imaculada Concepcion, ang kahubitan niining pagtulon-ana pinaagi sa papanhong awtoridad, ang pagbalaan sa Balaang Sakramento, ang pagbalaan kang Birhen Maria, ug uban pa), ang usa mahimong moila, hinunoa, kinahanglan nga moila nga ‘ang mga doktrina sa simbahan nagdala sa timaan sa pag-uyon sa Diyos.’”

Bisan pa niana, ang Katolikong simbahan dili angayng moangkon nianang balaanong panghimatuod. Sa pag-angkon sa iyang kaugalingon sa awtoridad sa paghukom kon kana ang mga aparisyon (ug ang nalangkit nga mga milagro) nagagikan sa Diyos o dili, kini naghimo sa iyang kaugalingon nga maghuhukom sa iyang kaugalingong kaso.

Daghang ubang relihiyon nagpatuo nga may ebidensiya sa mga milagro ug nangangkon nga kana gipaluyohan sa Diyos. Ang Diyos anaa ba sa likod sa mga milagro nga gihimo sa karismatikong kalihokan (lakip nianang mga dili-Katoliko) o bisan sa dili-Kristohanong mga relihiyon? Malisod tuohan nga siya nagapaluyo, kay ang Bibliya nagaingon nga ang Diyos maoy “Diyos, dili sa kasamok, kondili sa kalinaw.”—1 Corinto 14:33.

Unsa ang hustong pasukaranan sa paghukom? Ang librong Les signes de crédibilité de la révélation chrétienne (Mga Ilhanan sa Pagkakatuohan sa Kristohanong Pinadayag) nagpatin-aw nga ang mga sukdanan aron isipon ang mga milagro ingong tinuod sa panguna maoy moral ug relihiyoso.

Nahiuyon sa Pinadayag?

Sumala sa nagkalainlaing Katolikong mga manunulat, “ang Unang kinahanglanon mao nga ang mensahe nga gipasa maoy nahiuyon sa pinadayag sa Ebanghelyo ug doktrinal nga tradisyon sa simbahan.” “Walay bag-ong pinadayag ang magausab sa unang gipadayag.” Usab, si Papa Juan Paulo II mipatin-aw nga “ang mensahe nga gihatag sa Fátima niadtong 1917 nasudlan sa bug-os nga kamatuoran sa Ebanghelyo.” Kining tanan nagpasabot nga labaw sa tanan, ang mensahe nga gihatag sa maong mga aparisyon kinahanglan nga nahiuyon sa “gipadayag” sa Balaang Kasulatan. Kini mao ba ang kahimtang?

Unsay ikahinapos gikan sa mga panan-awon sa nagdilaab nga impiyerno nga gihatag ngadto sa mga magbalantay sa Fátima? Ang Kasulatan sa tin-aw nagapakita nga ang mga makasasala dili silotan niining paagiha kon sila mamatay. Si Jesus mismo miingon nga kinahanglan kita mahadlok sa Usa nga makalaglag sa lawas ug kalag, sa ingon nagpakita nga ang kalag mamatay. Ang ubang teksto sa Bibliya sa tin-aw nagatudlo usab nga walay kahibalo sa kamatayon ug nga ang paglaom nga mabuhi pag-usab gipasukad sa saad sa Bibliya nga mao ang umalabot nga pagkabanhaw.—Mateo 10:28; Ecclesiastes 9:5, 10; Juan 5:28, 29.

Apan unsay ikaingon sa “Imaculada Concepcion” nga gisulti ni Bernadette? Kini usab maoy dayag nga supak sa pagtulon-an sa Bibliya. Ang Kasulatan nagapakita nga si Maria, sama sa tanang mga kaliwat ni Adan, ‘gipanamkon sa kasal-anan’ ug nakapanunod sa kamatayon. (Salmo 51:5; Roma 3:23) Kon si Maria gisamkon nga walay sala, nganong siya nagtanyag ug halad sa sala pagkatapos nga ipanganak si Jesus? (Levitico 12:6; Lucas 2:22-24) Dugang pa, walay usa ka teksto sa Bibliya nga mosuportar sa Katolikong doktrina nga nagaingon nga siya nahigawas sa orihinal nga sala pinaagig linain nga grasya. Sanglit ang pagsimba kang Maria walay Kasulatanhong pasukaranan, makataronganon kaayo ang pagpatunghag mga pangutana kon kaha ang iyang mga aparisyon gikan ba sa Diyos.

Posible ba nga Kana Gikan sa Laing Tinubdan?

Siyempre, ang mga eskolar sa Bibliya nahibalo nga dili tanang mga milagro nagagikan sa Diyos. Pagkatapos sa paghisgot sa mga milagro nga nahimo sa mga salamangkero sa Ehipto sa atubangan ni Paraon ug Moises, ang Dictionnaire de la Bible, nga giedit ni F. Vigouroux, mihisgot nga “sa kataposang mga adlaw, ang bakak nga mga propeta ug bakak nga mga Kristo, ngatanan mga ahente sa Yawa, magahimog daghang milagro nga linglahon bisan gani ang matinumanong mga tinun-an ni Jesu-Kristo mismo, kon kini posible.”—Mateo 24:24; Exodo 7:8-13.

Apan unsa na man kon, sama sa kaso sa Fátima, ang aparisyon miagda sa katawhan nga maghinulsol ug mihangyo sa mga magtutuo nga mag-ampo aron makabig ang mga makasasala? Makaiikag, ang usa ka librong pabor sa mga aparisyon, nga nag-ulohan, Fàtima—Merveille du XX^e siècle (Fátima—Kahibulongan sa Ika-20ng Siglo), mikutlo sa pari, nga nianang panahona didto sa Fátima, nga mipahayag sa iyang mga pagduhaduha mahitungod sa sinugdanan niining mga mensahea bisan pa sa unod niana. Siya miingon: “Kini mahimong demonyohanong panglansis.” Oo, ang Bibliya nagapakita nga si Satanas “nagpakaaron-ingnong manulonda sa kahayag” ug ang “iyang mga ulipon, usab, nagpakaaron-ingnong mga ulipon sa pagkamatarong.” (2 Corinto 11:14, 15, The Jerusalem Bible) Ang daw-katuohan nga mensahe dili gayod pamatuod nga ang aparisyon tinuod nga nagagikan sa Diyos.

Kini mao usab ang konklusyon sa [Katolikong] Dictionnaire historique de la Bible ni Calmet, nga mipahayag: “Ang mga milagro ug mga kahibulongan dili kanunayng tino nga ilhanan nga ang mihimo kanila maoy balaan ug ang iyang doktrina maoy tinuod, ni sila tinong mga pamatuod nga nadawat sa mga nakakita sa panan-awon ang usa ka misyon.”

Sa kasukwahi, si Kristo mihimog daghang milagro samtang dinhi pa sa yuta. Unsa ang iyang katuyoan, ug unsang kahayag ang gihatag niana bahin sa mga milagro ug mga kahibulongan karong adlawa? Kining mga pangutanaha pagatubagon sa sunod nga artikulo.

[Kahon/Hulagway sa panid 6]

Disyembre 9, 1531.

Ang usa ka Mexicanong Indian, nga ginganlag Juan Diego, nagdalidali sa pag-adto sa Misa sa Siyudad sa Mexico. Sa pagpaingon ngadto siya nakasugat ug babaye kinsa nagsugo niya sa paghangyo sa obispo sa Siyudad sa Mexico sa pagtukod ug simbahan sa mismong yuta nga iyang gitindogan. Ang obispo nagduhaduha sa mensahe sa Indian.

Sa sunod nga aparisyon, iyang gipailaila ang iyang kaugalingon nga mao ang inahan sa matuod nga Diyos ug sa ulahi ingong “Santa Maria sa Guadalupe.” Aron hatagan siyag ilhanan, iyang gisultihan si Juan Diego sa pagkuhag mga rosas, bisag dili pa panahon ug dili kini dapit sa maong mga bulak. Hinoon, siya nakakita ug bulak ug giputos kini diha sa iyang kupo. Samtang iyang gipresentar kini sa obispo, usa ka tawo-gidak-ong larawan sa “Birhen” mipakita diha sa iyang kupo.

Ang dibuho sa maong esena gidispley karon diha sa Guadalupe Basilica, duol sa Siyudad sa Mexico.

[Letrato]

Guadalupe

[Kahon/Hulagway sa panid 7]

Pebrero 11, 1858.

Usa ka 14-anyos nga dalagitang Pranses nga ginganlag Bernadette Soubirous, iyang igsoong babaye, ug higala nangahoy duol sa Lourdes, usa ka lungsod sa habagatang-kasadpan sa Pransiya duol sa utlanan sa Espanya. Sa dihang motabok na unta si Bernadette sa sapa, usa ka “babaye” mipakita niya sa groto. Sa laing mga okasyon, ang mao gihapong “babaye” nagsugo sa pagtukod ug kapilya diha sa mismong luna ug mihangyo sa tanang katawhan sa paghinulsol.

Sa pagkakitag laing aparisyon, si Bernadette nakadungog sa “babaye” nga misulti sa lokal nga pinulongan: “Ako ang Imaculada Concepcion.” Nga nag-inusara batok sa sibil ug relihiyosong mga awtoridad, si Bernadette Soubirous nangangkon nga tinuod ang iyang mga deklarasyon. Sa kataposan, ang Katolikong Iglesya opisyal nga miila sa mga aparisyon sa “Birhen.” Ang sangtuwaryo sa Lourdes mao ang resulta.

[Letrato]

Lourdes

[Kahon/Hulagway sa panid 8]

Mayo 13, 1917.

Usa ka batan-ong lalaking magbalantay sa mga hayop ug duha ka magbalantayng mga babaye nagbantay sa ilang mga hayop sa Fátima, diha sa sentro sa Portugal, diin sila nakakita sa ilang unang aparisyon sa “Birhen.” Sa ulahi nga aparisyon, ang mga tawo nagdalidali sa pag-adto sa lugar nga naglaom nga makadawat ug ilhanan. Sila nangangkon nga nakakita sa adlaw nga misayaw sa kalangitan ug unya nahulog sa yuta.

Ang mga bata nakadawat usab ug “mga sekreto.” Sila nakakitag panan-awon sa impiyerno, diin didto ilang nakita ang mga makasasala nga nag-antos sa hilabihan diha sa makalilisang nga mga kalayo. Ang “Birhen” nangayo usab nga ang Russia ihalad alang sa iyang “imaculadang kasingkasing.” Sa ulahi gituman sa mga papa ang iyang tinguha. Ang kataposang “sekreto” gibantayan sa kinalabwang mga awtoridad sa Katolikong Iglesya, kinsa midumili sa pagpadayag niini diha sa publiko sa pagkakaron.

[Hulagway]

Fátima