Mga Mag-uuna sa Pagpanambal

SA EDAD 61, si José, usa ka Belgiano sa gamayng lungsod sa Oupeye, gisultihan nga gikinahanglan niya ang usa ka transplant sa atay. “Labing makapakurat kadto nga butang sa akong kinabuhi,” matod niya. Kap-atan lang ka tuig kanhi, imposible ang mga transplant sa atay. Bisan sa katuigang 1970, ang proporsiyon sa makalabang-buhi mga 30 porsiyento lamang. Hinunoa, karong adlawa ang mga transplant sa atay naandang ginahimo, nga mas daghan ang malamposon.

Apan may usa ka dakong kakulian gihapon. Sanglit ang mga transplant sa atay sagad naglangkit sa sobrang pagdugo, ang mga doktor kasagarang moabono ug dugo panahon sa operasyon. Tungod sa relihiyoso niyang mga pagtuo, dili gustog dugo si José. Apan gusto gayod niya ang transplant sa atay. Imposible ba? Tingali kana ang hunahuna sa pipila. Apan gibati sa pangulong siruhano nga siya ug iyang mga kauban dakog purohan nga molampos sa pag-opera nga dili mogamit ug dugo. Ug kana gayod ang ilang gibuhat! Kawhaag-lima ka adlaw lang human sa iyang operasyon, si José nakapauli na sa balay uban sa iyang asawa ug anak babaye.a

Tungod sa mga kahanas niadtong ginganlan sa magasing Time nga “mga bayani sa pagpanambal,” ang walay-dugo nga pagpanambal ug operasyon sa pagkakaron maoy mas komon kay sukad masukad. Apan nganong adunay dakong panginahanglan alang niini? Aron matubag kanang pangutanaha, tukion nato ang gubot nga kasaysayan sa abono sa dugo.

[Footnote]

[Hulagway sa panid 3]

Sa tibuok kalibotan, sa pagkakaron adunay kapin sa 90,000 ka doktor nga nagpaila nga andam sila nga motambal sa mga Saksi ni Jehova nga dili moabono ug dugo