Usa ka Kolektor Kinsa Buot Magpasidungog sa Maglalalang
SA DIHANG ang Amerikanong magkukulit ug kolektor ug kabakaba nga si Herman Strecker namatay usa ka siglo kanhi, iyang gibilin ang kinadak-an ug labing hinungdanong koleksiyon sa mga kabakaba ug anunugba sa kayutaan sa Amerika niadtong panahona. Ang iyang koleksiyon, nga mga 50,000 ka espesimen, sa pagkakaron gipanag-iya ang kadaghanan niini sa Field Museum sa Chicago, Illinois, T.B.A. Usa ka espisye sa higanteng silk moth gikan sa Amerika del Sur nangibabaw diha sa koleksiyon tungod sa ngalan niini. Sa iyang libro nga Lepidoptera, gisaysay ni G. Strecker nga wala niya nganli kini nga espisye sa ngalan sa usa ka indibiduwal nga tingali maghiphip kaniya pinaagi sa pagpakaon o pagpahulam ug salapi.a Hinunoa, iyang ginganlan kana sa ngalan sa Maglalalang. Nianang paagiha, kining “labing katingalahan” nga espisye magtultol sa mga hunahuna niadtong makakita niana ngadto sa Diyos. Busa, ingong resulta sa gusto ni G. Strecker nga pasidunggan ang Maglalalang, karong adlawa kanang silk moth ginganlan sa siyentipikanhong ngalan nga Copiopteryx jehovah.
Apan, ang ubang mga katalirongan ni G. Strecker mitutol sa iyang paggamit sa ngalan sa Diyos tungod kay, sumala sa gisulat sa usa ka kritiko, “ang ngalan nagpatagad sa seryoso ug mapamalandongong mga hunahuna sa tanang butang nga sagrado.” Gitubag kana ni G. Strecker: “Kon mao kana, nan malipayon gayod ako sa akong gipiling ngalan, kay alang kanako ang bisan unsa nga motultol kanato sa paghunahuna sa Maglalalang . . . mapuslanon gayod; ug unsay mas maayo pa kay sa pagpamalandong bahin sa sagradong mga butang,—sa mga ebidensiya sa kahalangdon ug gahom sa Supremong Persona?” Busa, ang kolektor nga si Strecker mihinapos: “Dili gayod ako makatuo nga adunay bisan unsang makataronganong pagtutol sa paghatag sa ngalan sa Maglalalang diha sa usa sa labing makaiikag sa Iyang mga buhat.”
Ang debosyon ni Strecker ug ang iyang pagtahod sa Maglalalang takos tagdon. Ang mga Kristohanon karon mainampingon nga mogamit sa halangdong ngalang Jehova sa mga paagi nga magpasidungog niini.
[Footnote]
a Ang kompletong ulohan sa libro ni G. Strecker maoy Lepidoptera, Rhopaloceres and Heteroceres, Indigenous and Exotic; With Descriptions and Colored Illustrations (1872).
[Hulagway sa panid 31]
Herman Strecker
[Credit Line]
Herman Strecker: Gikan sa librong The Passing Scene, Vol. 8/The Historical Society of Berks County
[Hulagway sa panid 31]
(Aktuwal nga gidak-on)