Nagakahanaw ba ang Paglaom sa Pakigdait?
“Atong gibati nga karon kita nagkinabuhi . . . sa tunga sa alimpulos, sa di-hitupngang katalagman.”—“La Repubblica” nga mantalaan, Roma, Italya.
HUMAN sa mga pag-atake sa mga terorista sa miaging tuig sa New York City ug Washington, D.C., daghang tawo ang nabalaka sukad masukad bahin sa kaugmaon sa katawhan. Ang mga esena sa TV nga nagpakita sa Twin Towers nga nagkahugno nga nagdilaab—ingon man ang gipakitang pagkawalay-paglaom sa mga nabuhi—gipasalida sa daghang higayon. Kining mga esenaha nakapasubo sa mga tawo sa tibuok kalibotan. Ang maong kasubo giduyogan sa pagbati nga ang kalibotan daw nakasinati ug dakong kausaban. Tinuod ba kini?
Ang gubat gisangka ingong sangpotanan sa Septiyembre 11, 2001. Wala madugay, ang mga nasod nga kanhi mabatokon sa usag usa nag-alyansa sa paningkamot nga sumpoon ang terorismo. Sa katibuk-an, daghan ang namatay ug grabe kaayo ang kadaot. Apan lagmit ang mas talagsaong kausaban sa daghang tawo sa tibuok kalibotan mao ang pagbati nga wala nay kasegurohan, misamot ang pagbati nga wala nay tawong tinuod nga luwas, bisan diin.
Ang mga lider sa kalibotan nag-atubang ug dagkong mga suliran. Ang mga magsusulat sa balita ug mga komentarista nahibulong kon unsaon pagpakgang sa terorismo nga dili mokaylap nga samag sunog sa lasang, kay kini mopatim-aw nga gisugnoran sa kakabos ug panatisismo—mga sakit nga daw walay tawo nga maantigong motambal. Ang inhustisya kaylap kaayo diha sa kalibotan nga anaa ang tanang hinungdan nga makamugnag mabangison kaayong kahimtang. Ang tanang matang sa mga tawo nahibulong kon mahanaw pa ba kaha ang mga sakit sa katilingban. Matapos pa kaha ang gubat, duyog ang tanang kalisdanan, kamatayon, ug kalaglagan nga dala niini?
Minilyong tawo midangop sa organisadong relihiyon alang sa tubag niining mga pangutanaha. Apan, ang uban mas maduhaduhaon. Komosta ka man? Nagtuo ka ba nga ang mga lider sa relihiyon makatubag sa maong mga pangutana? Ug makatabang ba gayod sila sa pagpatunghag pakigdait pinaagi sa ilang mga pag-ampo?