Tabangi ang mga Batan-on sa Pagtagbaw sa Ilang mga Panginahanglan
ANG mga batan-on nagkinahanglan ug tawo nga kasultihan sa ilang mga ambisyon, pangandoy, ug mga problema. Nagkinahanglan usab sila ug maayong mga higala. Ug samtang nagkahamtong sila, ang mga batan-on kinahanglang makaila kon kinsa sila. Kon ang mga ginikanan motabang sa ilang mga anak sa pagtagbaw niini nga mga panginahanglan, ilang mapanalipdan ang ilang mga anak batok sa makadaot nga mga panaghigalaay, hasta kanang mga panaghigalaay nga daling makaplagan diha sa Internet.
◼ Ang mga batan-on kinahanglang makapakig-estorya. Kon bahin sa pagpahayag sa ilang pagbati, ang mga tin-edyer morag dili maninagad o maghilom-hilom. Apan sa tinuod lang, sila gusto gayod nga makig-estorya kanimo, nga ilang ginikanan, bahin sa seryoso ug ordinaryong mga butang. Ang pangutana, Ikaw ba andam ug gustong mamati?—Santiago 1:19.
Ayaw tugoti nga ang kalisod sa kinabuhi makapugong kanimo sa pagpahimulos sa bililhong mga kahigayonan nga maestorya ang imong mga anak. Kon dili ka makahimo niini tungod sa kalisod sa kinabuhi, tingali panahon na nga imong palandongon pag-ayo ang maalamong tambag sa Bibliya: ‘Tinoa ang mas hinungdanong mga butang.’ (Filipos 1:10) May mas importante pa ba kay sa imong mga anak?
Ayaw dayon paghunahuna nga ang mga batan-on mas gustong mangayog tambag sa ilang mga higala kay sa ilang mga ginikanan. Sa usa ka surbi, kapin sa 17,000 ka estudyante gikan sa grade 6 ngadto sa grade 12 gisugo sa paggrado ug 0 ngadto sa 5 kon unsa ka dako ang impluwensiya sa ilang mga ginikanan, higala, popular nga mga tawo, media, ug mga magtutudlo diha kanila. Ang gradong 0 nagpasabot nga walay impluwensiya, ug ang 5 nagpasabot nga dako kaayog impluwensiya. Halos katunga sa mga estudyante mihatag ug gradong 5 sa ilang mga ginikanan.
Busa, kay ginikanan ka man, dako kag papel sa paghulma sa moral nga mga sukdanan ug mga tumong sa imong mga anak. “Tingali dili tanan sa imong isulti makatukbil kanila,” matod sa usa ka ginikanan. “Apan kon dili ka makig-estorya kanila, dili mo gayod matukbil ang ilang kasingkasing.”
◼ Ang mga batan-on nagkinahanglan ug mga higala. “Sagad ang mga ginikanan wala mahibalo kon kinsay kaestorya sa ilang anak diha sa Internet o kaha dili lang gyod sila interesadong mahibalo,” matod sa usa ka 15-anyos nga dalagita. Niining atong panahon, ang mga ginikanan angay nga mabalaka kon kinsay mga higala sa ilang mga anak. Nahibalo ka ba kon kinsay ilang kauban o kaestorya diha sa Internet? Ang Bibliya nag-ingon: “Ang daotan nga mga kauban makadaot sa maayong pamatasan.” (1 Corinto 15:33, Bag-ong Hubad nga Binisaya) Oo, adunay dakong katarongan kon nganong angay nimong bantayan kon kinsa ang mga kauban sa imong anak.
Sa laktod, ang kahingawa dili kay yano lamang nga pagpanalipod sa mga batan-on batok sa makadaot nga mga impluwensiya. Ang mga anak nagkinahanglan usab ug hustong matang sa mga higala. “Siya nga nagalakaw uban sa mga tawong maalamon mahimong maalamon,” nag-ingon ang Bibliya. (Proverbio 13:20) Busa, kinahanglang imong tabangan ang imong mga anak nga makakita ug maayong mga kauban—kadtong mga batan-on nga nagpasundayag ug maayong panig-ingnan sa paghinumdom sa ilang Maglalalang.—Ecclesiastes 12:1.
Si Jehova taas ug sukdanan bahin sa matang sa mga tawo nga iyang ginapili ingong mga higala, ug kita angayng maningkamot sa pagsundog kaniya. (Salmo 15:1-5; Efeso 5:1) Sa pagkatinuod, ang usa sa labing hinungdanong katakos nga imong ikatudlo sa imong mga anak—sa pulong ug sa buhat—mao ang pagpili ug maayong mga kauban.—2 Tesalonica 3:6, 7.
◼ Ang mga batan-on kinahanglang makaila kon kinsa sila. Ang usa ka hinungdanong bahin sa pagtubo mao ang pag-umol ug usa ka personalidad—talagsaong mga kinaiya nga magpalahi sa usa ka bata gikan sa uban. Usa ka sanglitanan sa Bibliya nagkanayon: “Pinaagi sa binuhatan sa usa ka bata, siya nagapadayag kon kinsa siya.” (Proverbio 20:11, The Holy Bible in the Language of Today, ni William Beck) Usa sa imong mga buluhaton ingong ginikanan mao ang pagsilsil sa hustong mga prinsipyo diha sa kasingkasing sa imong mga anak.—Deuteronomio 6:6, 7.
Sa pag-ilustrar: Ang mga ginikanan maoy kasagarang mopili sa isul-ob adlaw-adlaw sa ilang gamayng bata, sa tuyo nga makakat-on ang bata ug maayong pagpamesti. Apan imo bang mahanduraw ang usa ka himsog nga 30 anyos nga ilisan pa gihapon sa iyang mga ginikanan? Kataw-anan kaayo kanang hunahunaon! Nagtandi sa personalidad ingong usa ka besti, ang Bibliya nagdasig kanato: “Isul-ob ang bag-ong pagkatawo”—ang samag-Kristong personalidad. (Colosas 3:10) Makatabang ka sa imong mga anak sa pagsul-ob ug bag-ong personalidad pinaagi sa mahigugmaong pagdisiplina ug “pagdumala-sa-kaisipan.” (Efeso 6:4) Dayon samtang sila nagkahamtong ug nagkaindependente, tingali sila modesisyon usab sa “pagsul-ob” ug “bag-ong pagkatawo,” kay kini ilang gilantaw nga nindot kaayo.—Deuteronomio 30:19, 20.
Pangutan-a ang imong kaugalingon: ‘Unsay tinuod nga pagbati sa akong mga anak bahin sa moral nga mga sukdanan nga gitudlo sa Pulong sa Diyos? Sa unsang paagi ako makatabang kanila “sa pagkinabuhi uban ang maayong panghunahuna”?’ (Tito 2:12) Ang imong tuyo dili ang pagpadako ug anak nga taphaw ang pagkamatinumanon. Ang ubang mga bata maayo kaayong mosunod bisag unsay isulti kanila, nga dili mokuwestiyon, makiglalis, o morebelde. Apan ang bata nga mosunod lang sa kon unsay imong gustong ipabuhat kaniya karon mahimong mosunod sa kon unsay gustong ipabuhat kaniya sa kalibotan sa umaabot. Busa, bansaya ang imong mga anak sa pag-ugmad sa ilang “gahom sa pagpangatarongan.” (Roma 12:1) Tabangi sila sa pagsabot kon nganong makataronganon ang mga prinsipyo sa Bibliya ug sa unsang paagi kini makabenepisyo kanatong tanan.—Isaias 48:17, 18.
Oo, nagkinahanglan ug paningkamot ang pagtabang sa mga batan-on sa pagtagbaw sa ilang mga panginahanglan. Apan ang mga ganti takos gayod niini! Kon ang imong mga anak magkinabuhi subay sa matarong nga mga prinsipyo nga imong gisilsil diha kanila, ikaw makaingon gayod sa imong bug-os nga kasingkasing nga ang mga anak ‘panulondon gayod gikan ni Jehova.’—Salmo 127:3.
[Mga hulagway sa panid 9]
Tabangi ang imong mga anak sa pagpili ug maayong Kristohanong mga kauban