Mga Batan-on Nangutana
Unsay Akong Himoon Aron Magmalipayon Ko sa Pag-alagad sa Diyos?
Si Josh, nga nag-edad ug 16, naghigda-higda diha sa iyang kama. Ang iyang mama anaa sa pultahan. “Joshua, bangon na!” matod niya. “Nahibalo baya ka nga tigom karon!” Anak ug Saksi ni Jehova si Josh, ug kabahin sa ilang pagsimba ingong pamilya ang regular nga pagtambong sa tigom. Apan ning bag-o pa, daw walay gana si Josh sa pagtambong.
“Ma,” mireklamo siya, “kinahanglan ba gyod kong motambong?”
“Ayaw na pagreklamo diha, pag-ilis na. Di ko gustong maulahi na pod ta sa tigom,” mitubag ang iyang mama ug dayon siya mibiya.
“Tambong lang god mog inyo, dili bitaw na pinugsanay,” miingon si Josh. Nahibalo siya nga nakadungog ang iyang mama kay nabatian niya nga mihunong kini sa paglakaw. Apan wala ra manumbaling ang iyang mama, ug mipadayon kini sa paglakaw.
Nahasol si Josh. Dili niya tuyo nga pasakitan ang iyang mama. Apan dili pod niya gustong mangayog pasaylo. Wala siyay mahimo.
Bisag bug-at sa iyang buot, mibangon siya aron mag-ilis. Siya nagbagutbot: “Moabot ra ang panahon nga wala nay makabuot nako. Dili ko parehas anang uban sa Kingdom Hall. Wala koy planong mag-Saksi!”
MIBATI ka ba ug sama kang Josh? Mobati ka ba usahay nga napugos lang sa pagbuhat sa Kristohanong mga buluhaton, dili sama sa uban nga nalipay sa pagbuhat niana? Pananglitan:
◼ Mibati ka ba nga ang pagtuon sa Bibliya sama rag naghimo ka ug asaynment sa eskuylahan?
◼ Mahadlok ka bang mosangyaw?
◼ Laayan ka ba sa mga tigom?
Kon “oo” ang imong tubag sa mga pangutana nga sama niini, ayaw kaguol. Pinaagi sa paghimog pipila ka kausaban, mahimo kang magmalipayon sa pag-alagad sa Diyos. Sa unsang paagi? Ato kanang hisgotan.
Hagit #1: Pagtuon sa Bibliya
Kon nganong dili kini sayon. Lagmit dili ka ganahang magtuon. Basin dali ra kang laayon—malisdan ka sa paglingkod ug dugay ug sa pagsentro sa imong hunahuna sa imong gitun-an! Gawas pa, basin daghan ka nag tun-anan sa eskuylahan.
Kon nganong kinahanglan nimo kining buhaton. Ang Bibliya pulong sa Diyos ug kini “mapuslanon sa pagtudlo ug pagtabang sa mga tawo ug sa pagtul-id kanila ug sa pagpakita kanila sa hustong paagi sa pagkinabuhi.” (2 Timoteo 3:16, Contemporary English Version) Kon imong tun-an ang Bibliya ug palandongon ang imong gibasa, molalom ang imong kahibalo. Hunahunaa kini, wala kay maani kon dili ka magkugi. Kon gusto kang mohawod sa usa ka esport, kinahanglang tun-an nimog maayo kon unsaon kana pagdula ug magpraktis ka kanunay. Kon gusto kang mahimsog, kinahanglan kang mag-ehersisyo. Kon gusto kang makakat-on bahin sa Maglalalang, kinahanglan usab nga magtuon ka sa Pulong sa Diyos.
Kon unsay komento sa ubang batan-on. “Pagtungtong nako sa hayskul, kinahanglang mohimo kog desisyon. Ang ubang mga batan-on daotan kaayog binuhatan mao nga naghunahuna ko: ‘Sundogon ba nako sila? Kamatuoran ba gayod ang gitudlo sa akong mga ginikanan?’ Kinahanglang susihon nako kana.”—Tshedza.
“Kombinsido ko nga kamatuoran ang gitudlo sa akong mga ginikanan, apan kinahanglang pamatud-an nako kana sa akong kaugalingon. Kinahanglang kinabubut-on ang akong pagsimba, dili pinugos.”—Nelisa.
Kon unsay imong buhaton. Planoha ang pagtuon sa Bibliya. Pilia kon unsang mga ulohan ang gusto nimong tun-an. Sa unsang paagi nimo kana sugdan? Mahimo nimong tun-ag maayo ang Bibliya ug ang imong mga tinuohan pinaagi sa paggamit sa librong Unsay Tinuod nga Gitudlo sa Bibliya?a
Ang akong giplanong himoon. Butangig tsek ang duha o tulo ka pangutana sa ubos nga gusto nimong tun-an—o kon gusto ka, isulat ang imong kaugalingong pangutana.
□ Duna bay Diyos?
□ Unsaon nako pagseguro nga gigiyahan gayod sa Diyos ang mga magsusulat sa Bibliya?
□ Nganong angay man kong motuo sa paglalang, dili sa ebolusyon?
□ Unsa ang Gingharian sa Diyos, ug sa unsang paagi akong mapamatud-an nga kini naglungtad gayod?
□ Unsaon nako pagsaysay sa akong tinuohan kon unsay mahitabo inigkamatay sa tawo?
□ Unsaon nako pagseguro nga aduna gayoy pagkabanhaw?
□ Unsaon nako pag-ila sa matuod nga relihiyon?
□ ․․․․․
Hagit #2: Pagsangyaw
Kon nganong dili kini sayon. Dili gayod lalim ang pagpakig-estorya bahin sa Bibliya—ilabina kon makita ka sa imong klasmet.
Kon nganong kinahanglan nimo kining buhaton. Gisugo ni Jesus ang iyang mga sumusunod: “Paghimog mga tinun-an . . . , nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Apan may lain pang katarongan kon nganong buhaton kana. Gipakita sa mga pagtuon nga diha sa pipila ka dapit, kadaghanan sa mga batan-on nagtuo sa Diyos ug sa Bibliya. Apan sila walay tinuod nga paglaom sa umaabot. Pinaagi sa imong pagtuon sa Bibliya, imong nakat-onan ang mga butang nga gipangita ug gikinahanglan sa ubang mga batan-on!
Kon unsay komento sa ubang batan-on. “Kami sa akong amiga nangandam ug epektibong mga introduksiyon, ug among nakat-onan kon unsay among isulti sa dihang mobalibad ang tagbalay ug kon unsaon usab sa pagbalik-duaw. Mas dako ang akong kalipay sa dihang naningkamot ko sa pagpauswag sa akong ministeryo.”—Nelisa.
“Dakog natabang kanako ang usa ka sister nga magulang nakog unom ka tuig. Iuban ko niya sa pagsangyaw ug usahay mangaon ming duha. Basahan ko niyag mga teksto aron ipasibo ang akong hunahuna sa pipila ka butang. Mas epektibo na ako sa pagtabang sa uban tungod sa iyang maayong panig-ingnan. Mapasalamaton kaayo ko niya!”—Shontay.
Kon unsay imong buhaton. Uban sa pagtugot sa imong mga ginikanan, pangitag igsoon sa kongregasyon nga mas magulang nimo nga imong ikauban sa pagsangyaw. (Buhat 16:1-3) Ang Bibliya nag-ingon: “Pinaagi sa puthaw, ang puthaw mapahait. Mao man usab ang usa ka tawo makapahait sa nawong sa laing tawo.” (Proverbio 27:17) Kon makig-uban ka sa mas hamtong nga mga igsoon nga dunay daghang kasinatian, makabenepisyo kag dako. “Di kaayo ka malisdan kon naay mga hamtong,” matod pa sa 19-anyos nga si Alexis.
Ang akong giplanong himoon. Isulat sa ubos ang ngalan sa igsoon diha sa inyong kongregasyon nga makatabang kanimo sa ministeryo, gawas pa sa ang imong mga ginikanan.
․․․․․
Hagit #3: Pagtambong sa Kristohanong mga Tigom
Kon nganong kini dili sayon. Human sa tibuok-adlaw nga klase, basin kapoyan ka na kaayong motambong sa usa o duha ka oras nga tigom.
Kon nganong kinahanglan nimo kining buhaton. Ang Bibliya nagtambag sa mga Kristohanon: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw nagkaduol na.”—Hebreohanon 10:24, 25.
Kon unsay komento sa ubang batan-on. “Importante gayod nga mangandam alang sa mga tigom sa kongregasyon. Usahay kinahanglan nimong pugson ang imong kaugalingon aron magtuon. Kon imo kanang buhaton, malipay ka panahon sa tigom tungod kay nahibalo ka kon unsay gihisgotan, ug mahimo ka pa ganing makigbahin sa panaghisgot.”—Elda.
“Akong namatikdan nga malipay gyod ko kon makakomento ko sa tigom.”—Jessica.
Kon unsay imong buhaton. Pangandam sa tigom, ug kon mahimo, pagkomento. Pinaagi niana, mobati ka nga kabahin ka sa tigom.
Sa pag-ilustrar: Hain ang mas makalingaw—ang pagtan-aw sa dula sa TV o ang pag-apil mismo sa dula? Mas makalingaw gyod ang pag-apil kay sa pagtan-aw lang. Dili ba ingon pod niana kon bahin sa tigom?
Ang akong giplanong himoon. Isulat diha sa blangko sa ubos kon kanus-a ka magtuon aron mangandam sa tigom bisag 30 minutos lang kada semana.
․․․․․
Napamatud-an sa daghang batan-on nga tinuod gayod ang mga pulong sa Salmo 34:8, nga nag-ingon: “Tilawi ug tan-awa ninyo nga si Jehova maayo.” Matagbaw ka ba kon igo ka lang makabalita sa usa ka lamiang pagkaon? Dili ba mas maayo kon imo kanang matilawan? Sama usab niana ang pagsimba sa Diyos. Tilawi kon unsa ka magantihon ang pagpakigbahin sa espirituwal nga mga buluhaton. Ang Bibliya nag-ingon nga kon molihok gayod ang usa ug dili lamang basta maminaw, siya ‘magmalipayon sa pagbuhat niana.’—Santiago 1:25.
Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/ype
[Footnote]
a Gipatik sa mga Saksi ni Jehova.
MGA BUTANG NGA ANGAYNG PALANDONGON
◼ Nganong daw laayan ang usa ka tin-edyer sa pagbuhat sa espirituwal nga buluhaton?
◼ Sa tulo ka bahin sa pagsimba nga gihisgotan niining artikuloha, hain niana ang gusto nimong pauswagon, ug sa unsang paagi imong mahimo kana?
[Hulagway sa panid 20, 21]
Kon gusto kang mahimsog, pag-ehersisyo. Kon gusto kang masuod sa Diyos, tun-i ang Bibliya