Gahinig Panahon ang Mas Hinungdanong Butang

“Ang panahong nabilin mubo na.”—1 Corinto 7:29.

“KON ang usa nagkapa-kapa diha sa tubig, kana wala magpasabot nga siya naglangoy,” sumala kang Michael LeBoeuf diha sa iyang librong Working Smart.

Sa ato pa, kon ang usa daghag gikuri-kuri, kana wala magpasabot nga siya dunay natapos nga hinungdanong trabaho. Hunahunaa ang imong mga nahimo sa miaging semana. Unsay imong gihatagag panahon? Nganong napuliki man ka? Kulang ka bag panahon alang sa mga butang nga importante kanimo?

Tagda kon unsay gitagna ni Jesus bahin sa atong puliki nga panahon. Siya miingon nga samtang nagkaduol ang kataposan ug ang matarong nga bag-ong kalibotan sa Diyos, ang iyang mga sumusunod mapuliki. Sa unsang buluhaton? Sa pagsangyaw sa “maayong balita sa gingharian [sa Diyos].” Si Jesus usab miingon nga ang kadaghanan sa mga tawo walay panahon sa pagpaminaw. Puliki sila sa adlaw-adlawng mga buluhaton. Siya midugang nga kadtong walay panahon sa pagpaminaw sa mensahe sa Gingharian pagalaglagon.—Mateo 24:14, 37-39; Lucas 17:28-30.

Karon, ang mga Saksi ni Jehova nagsangyaw sa maayong balita sa Gingharian sa Diyos sa kapig 230 ka kayutaan. Ingon sa gitagna ni Jesus, daghan karon ang dili mamati tungod kay sila “walay panahon.” Apan bisan pa sa imong kapuliki, palihog gahinig panahon ang pagsusi kon unsay gitudlo sa Bibliya bahin sa Gingharian sa Diyos. Nanghinaot kami nga sa dihang masayran nimo ang mga panalangin nga gitagana sa Diyos alang sa katawhan, ikaw mouyon nga ang pagpaminaw ug pagpadapat sa mensahe sa Bibliya angayng gahinag panahon ug hinungdanon gayod.a

[Footnote]