Kanunayng Daghang Buhatonon
1 Alang sa katawhan ni Jehova, anaa kanunay ang “daghang buhaton diha sa buluhaton sa Ginoo.” (1 Cor. 15:58) Anaay senemanang mga tigom nga pangandaman ug pagatambongan. Kita gidasig sa pagpakig-ambit sa ministeryo sa kanataran kada semana. Ang panahon kinahanglang igahin alang sa personal ug pamilyahanong pagtuon. Ang mga ansiyano ug ministeryal nga mga alagad may daghang mga asaynment sa kongregasyon. May mga panahon kita hangyoong motabang niadtong nanginahanglan. Dugang pa, may obligasyon kita maylabot sa atong pamilya, panarbaho, ug tunghaan.
2 Usahay, ang pipila kanato hayan mobating masobrahan sa tanan natong ginabuhat. Bisan pa niana, ang labing puliki nga mga tawo mahimong mao ang labing malipayon kon mahuptan ang pagkabalanse ug tukmang panglantaw.—Eccl. 3:12, 13.
3 Si apostol Pablo maoy usa nga daghag buhatonon. Siya nagpangabudlay nga labaw pa sa ubang mga apostol. Siya naghago ingong tig-ebanghelyo, samtang wala pasagdi ang iyang mga kaakohan ingong usa ka magbalantay sa panon. Gawas pa niining tanan, iyang giatiman ang iyang personal nga mga panginahanglan pinaagig pagtrabaho ingong tighimog-tolda. (Buh. 20:20, 21, 31, 34, 35) Bisan pa sa iyang puliking eskedyol, si Pablo kanunayng mainiton sa pagbuhat ug labaw pa diha sa pag-alagad kang Jehova.—Itanding Roma 1:13-15.
4 Si Pablo nagmentinar sa iyang pagkatimbang ug malipayong kasingkasing pinaagig pagsalig kang Jehova alang sa kusog. (Filip. 4:13) Siya nasayod nga ang Diyos dili malimot sa iyang buhat. (Heb. 6:10) Ang kalipay sa pagtabang sa uban sa pagkaila, kang Jehova nagpalagsik kaniya. (1 Tes. 2:19, 20) Ang kasegurohan sa iyang binase-Bibliyang paglaom nagtukmod kaniya sa pagpabiling makugihon.—Heb. 6:11.
5 Kita usab angayng magtagad sa maayo nga moresulta gikan sa atong mga paghago. Ang atong pagpakig-ambit sa mga tigom magapalig-on ug magadasig sa uban. (Heb. 10:24, 25) Ang atong mga panikaysikay sa pag-abot sa tanan uban sa maayong balita magaamot sa pag-uswag sa kongregasyon samtang ang mga bag-ohan nagapakig-uban kanato. (Juan 15:8) Ang pag-abag sa uban nga nanginahanglan nagapalambo ug suod, samag-pamilyang espiritu diha sa kongregasyon. (Sant. 1:27) Dugang pa, dili gayod nato angayng kalimtan nga ang pagkapuliki sa maayong mga buhat makapahimuot kaayo kang Jehova nga Diyos. Atong gihunahunang usa ka dakong pribilehiyo ang pag-alagad kaniya. Alang kanato wala na ing mas maayo pang paagi sa kinabuhi!
6 Aduna pay dugang benepisyo sa pagkaanaay daghang buhatonon. Kon kita puliki sa espirituwal nga mga butang, ang panahon maorag mas kusog nga molabay. Sa pagkaamgo nga ang matag adlaw nga molabay nagadala kanato nga mas duol sa bag-ong kalibotan, malipayon natong gidawat ang puliking kinabuhi nga atong gipahimuslan karon. Naamgohan usab nato ang kaalam sa pagpabiling puliki, maingon nga kita wala kaayoy panahon nga magpalangkit sa walay pulos nga kalibotanong mga pangagpas.—Efe. 5:15, 16.
7 Tinuod, adunay daghang buhatonon diha sa buluhaton sa Ginoo. Apan kita makapabiling malipayon kon magapadayon kitang magasalig kang Jehova nga Diyos ug kang Jesu-Kristo, nga nagahimo sa atong pag-alagad nga makarepresko ug magantihon.—Mat. 11:28-30; 1 Juan 5:3.