Ikaw ba Puliki Kaayo?
1 Si Pablo miawhag nga kita “kanunay may daghang buhaton diha sa buluhaton sa Ginoo.” (1 Cor. 15:58) Kita gidasig sa pagbaton ug adlaw-adlawng naandan alang sa personal nga pagtuon, pakig-ambit nga regular diha sa ministeryo, pagtambong sa mga tigom, ug pag-atiman sa mga asaynment sa kongregasyon. Dugang niana, kinahanglan natong agakon ang uban kinsa nanginahanglan sa atong tabang. Tungod sa daghan kaayong buhatonon, usahay mahimong bation tang nabug-atan, nga naghunahunang kinahanglan natong menosan ang gidaghanon sa atong buluhaton.
2 Adunay mga situwasyon nga tingali magpahimong makataronganon ang pagsalindot o pagmenos sa pipila ka kalihokan. Gibati sa pipila ka indibiduwal nga gidahom kanila ang pagbuhat sa tanang gihangyo kanila sa uban. Ang kakulang sa pagkatimbang niining bahina makamugnag kapit-os ug kabug-at nga makapaluya pag-ayo. Kini motultol ngadto sa pagkadaot sa mga relasyon sa pamilya, sa nahasol nga mga pagbati, o sa grabeng mga problema sa panglawas.
3 Magmatimbang: Ang yawi sa pagkatimbang nagaagad sa pagpadapat sa tambag ni Pablo nga “matino ang mas hinungdanong mga butang.” (Filip. 1:10) Kana nagapasabot nga kita magapunting sa mga butang nga hinungdanon gayod ug, kon itugot sa panahon, mag-atiman sa mga butang nga dili kaayo hinungdanon. Ang mga katungdanan sa pamilya lakip nianang mga butanga nga maoy hinungdanon. Ang usa ka tinong gidak-on sa sekular nga mga kaakohan kinahanglang buhaton. Hinuon, si Jesus nagtudlo sa prinsipyo nga unahon ta pagpangita ang Gingharian. Kita kinahanglang unang magmahunahunaon sa espirituwal nga mga panginahanglan aron tumanon ang atong pahinungod kang Jehova.—Mat. 5:3; 6:33.
4 Tungod kay ania kini sa hunahuna, gikinahanglan natong kuhaon gikan sa atong puliking eskedyul ang bisan unsang di-hinungdanong personal nga mga pangagpas, sobrang lulinghayaw, ug di-hinungdanong mga kasabotan ngadto sa uban. Atong ieskedyul ang panahon alang sa personal nga pagtuon, usa ka makataronganong pakig-ambit sa pag-alagad, ug pagtambong sa mga tigom. Ang nahibiling panahon tingali mabahinbahin sa ubang mga pangagpas.
5 Bisan pa niana, mahimong bation ta gihapon nga ang atong palas-anon mapit-oson. Kon mao, kinahanglan tang mosanong sa pagdapit ni Jesus: “Umari kanako, kamong tanan nga nagabudlay ug nabug-atan, ug ako magapalagsik kaninyo.” (Mat. 11:28) Tutok kang Jehova, “nga sa matag-adlaw nagapas-an sa atong palas-anon” ug nagahatag sa naluya ug kusog. (Sal. 68:19; Isa. 40:29) Kita masaligon nga si Jehova magapaarang kanatong makalahutay diha sa puliki teokratikanhong kalihokan.
6 Samtang padayong puliki sa pagpangita sa intereses sa Gingharian, kita mahimong magmaya nga ang atong kahago dili kawang may kalabotan sa Ginoo.—1 Cor. 15:58.