Personal nga Pagtuon​—Usa ka Tagdononon

¹ Unsa man ang mga butang nga ugdang tagdononon? Kita angayng magmabalak-on bahin sa atong pagtukod ug pagmentinar ug usa ka suod nga relasyon kang Jehova. Ang personal nga pagtuon nagadulag usa ka dakong papel sa pag-ugmad nianang maong pagkasuod. Karong adlawa, dili daghan kanato ang makahimo sa paggugol ug dugayng panahon sa personal nga pagtuon. Bisan pa niana, kon dili nato basahon ang Pulong sa Diyos nga makanunayon, hayan mahimo kitang huyang kaayo sa pagsukol sa espiritu sa kalibotan ug sa unodnong mga tinguha niini.

² Ugmara ang Pagpangandoy sa Pulong: Sa dihang una natong nakat-onan ang bahin sa mga katuyoan sa Diyos, hayan kita mainiton sa pagbaton ug dugang pang kahibalo. Bisan pa niana, sa paglabay sa taas nga panahon, ang atong pagkagutom sa espirituwal nga pagkaon mahimong nagkunhod. Hayan adunay panginahanglan sa “pag-ugmad sa pagpangandoy” alang sa espirituwal nga pagkaon. (1 Ped. 2:2) Unsaon man nato pag-ugmad ang maong pagpangandoy?

³ Ang kahumot sa usa ka kinaham nga pagkaon magapukaw sa atong gana. Ang mubong mga hugna sa pagtuon makaapektar kanato sa espirituwal sa samang paagi. Ang pagpahimulos sa pipila ka espirituwal nga mga puntos mahimong magpalihok sa atong gana alang sa mas lawom nga mga kamatuoran.

⁴ Ugmara ang usa ka Naandang Paagi nga Labing Maayo Alang Kanimo: Ang pipila nagagahin ug tibuok gabii sa paghimog personal nga pagtuon, samtang ang uban nagapalabi sa mas mubo ug mas subsob nga mga hugna sa pagtuon. Kon imong nakaplagan nga makapamalandong ka ug mas maayo sa sayong kabuntagon, hayan makadesider ka sa paghimog pipila ka pagtuon una pa sa pamahaw. Kon ikaw mas alerto sa kagabhion, mahimo nimo ang pagtuon una pa matulog sa gabii. Ang hinungdanong butang mao ang pagkamakanunayon ug motapot diha sa naandang paagi nga labing angay sa imong panginahanglan.

⁵ Sa dihang gidasig sa paghimog dugang personal nga pagtuon, hayan dali kitang moingon nga nabatonan na nato ang puno nga eskedyol. Hinuon, kinahanglan kitang magmatinud-anon sa pagtimbangtimbang kon giunsa nato paggasto ang atong panahon. Ang daghan bang oras gigugol sa matag adlaw sa pagtan-awg telebisyon? Ang usa ka matinud-anong pagsusi sa atong eskedyol malagmit magabutyag sa panahong atong gigamit sa matag adlaw diha sa personal nga pagtuon.​—Efe. 5:15, 16.

⁶ Ang pagtuon sa Pulong sa Diyos takos sa atong dili-mabahin nga pagtagad. Kon kita may hilig sa pagtuon samtang nagakaon, nagapaminaw sa radyo, o nagatan-awg telebisyon, hayan dili gayod kita makasabot kon unsa ang atong gisulayan sa pagkat-on. (1 Tim. 4:15) Busa adunay panginahanglan sa pagwagtang sa mga kabaldahan.​—Tan-awang Giya sa Tunghaan, mga panid 33-4.

⁷ Ang adlaw-adlaw nga pagtuon sa tambag sa Bibliya hinungdanon tungod kay kana ang paagi nga atong madawat ang pagtultol gikan ni Jehova. Pahimusli ang matag kahigayonan, bisan unsa ka mubo, sa pagbasa, pagrepaso, o pagpamalandong sa espirituwal nga mga butang.​—Deut. 6:6-8; Col. 1:9, 10.