Pagpaniid sa Kalibotan

“Ang mga babaye nga nagpuyo sa kabos nga mga nasod maoy 300 ka pilo nga mas lagmit nga mamatay panahon sa pagmabdos o sa pagpanganak kay sa kon nagpuyo sila sa datong mga nasod.”—BUSINESSWORLD, PILIPINAS.

Sumala sa usa ka surbi sa Germany, 40 porsiyento sa nag-edad ug 11 ngadto sa 15 wala mahibalo nga ang adlaw mosubang sa sidlakan; 60 porsiyento ang wala mahibalo nga ang yugto tali sa duha ka nagsunod nga pagtakdol sa bulan maoy upat ka semana.—WELT ONLINE, GERMANY.

Ang mga arkeologo nakadiskobreg templo sa mga Filistehanon sa karaang Gat. Ang maong templo, nga may duha ka kinataliwad-ang poste, magpahinumdom kanato sa asoy sa Bibliya bahin kang Samson, kinsa mitukod sa iyang kamot sa duha ka poste ug natumpag ang templo.—THE JERUSALEM POST, ISRAEL.

Pagkuhag mga Asawa Gikan sa Asia

“Nagkadaghan ang mga lalaki sa datong mga nasod sa Asia sama sa Japan ug South Korea nga nangitag pangasaw-onon diha sa kabos [nga mga nasod] sama sa Vietnam ug Pilipinas,” nag-ingon ang BusinessWorld, usa ka mantalaan sa Pilipinas nga mabasa diha sa Internet. Tali sa 1995 ug 2006, ang gidaghanon sa mga Hapon nga nagminyog langyawng mga babaye misakag 73 porsiyento. Ngano man? “Ang mga babaye sa ilang lugar nga makasustento sa kaugalingon nahimong pilian,” matod sa report, ug mas magpanagana sa pagminyo. Sa laing bahin, ang mga babaye sa kabos nga mga nasod andam makigminyo bisan sa ordinaryong mga trabahante sa datong mga nasod, tungod sa “posibilidad nga makahatag [silag] mas maayong kinabuhi.”

Gihimong Epektibo ang Pagluib?

Ang usa ka kontrobersiyal nga dating site sa Internet nga nag-operit diha sa lima ka nasod nag-anunsiyo sa ilang serbisyo pinaagi sa eslogan: “Mubo ra ang kinabuhi. Pakigrelasyon sa lain.” Sumala sa nagpundar niini nga site, wala sila mag-awhag sa mga tawo sa pagluib sa ilang kapikas, kay kadtong moabli niini nga site “nakadesisyon nang daan nga magluib.” “Kadaghanan sa mga problema nga nalangkit sa pagluib mitungha tungod kay sila nasakpan. Among tabangan ang mga tawo sa pagbuhat niana nga dili masakpan,” siya miingon. “Dili kami ang nagmugna sa pagluib—amo lang kanang gihimong mas epektibo.” Karon, ang maong site adunay mga 6.4 ka milyong membro.

Gipakatawong May Katakos sa Pagsayaw?

“Ang mga tawo dunay talagsaong katakos sa pagtakdo sa lihok sa ilang lawas uban sa musika nga ilang madungog, sama sa pag-undak-undak sa tiil duyog sa ritmo sa musika o sa pagsayaw,” matod sa report nga gipatik sa mga tigdukiduki sa mga unibersidad sa York, England ug Jyväskylä, Finland. Ilang nadiskobrehan nga bisan sa dili pa makakat-on sa pagsulti ang mga masuso, sila mosanong na sa ritmo sa musika ug molihok duyog niana. Kon mas masundan nila ang musika, mas malipay sila. Kini nagpakita nga ang atong pagsanong sa ritmo sa musika ug ang tinguha sa paglihok duyog niana dili na kinahanglang tun-an kay kini kinaiyanhon.