Ang Asul Kaayong Pollia Berry

ANG gamayng bunga sa tanom nga Pollia condensata, nga makita sa tibuok Africa, asul kaayog kolor kon ikompara sa ubang tanom. Pero kini walay asul nga pigment. Busa nganong asul kaayo nig kolor?

Hunahunaa: Ang mga cell wall sa panit sa bunga dunay pinong hilohilo nga galumbay samag mga palito sa posporo. Kini nga mga hilohilo nagpatongpatong, ug ang matag patong niini nisiwil ug gamay gikan sa gipatongan, busa naespayral ang porma niini. Dili asul ang kolor sa mga hilo. Nahimo ning asul tan-awon tungod sa pagkapatongpatong niini. Busa ang pagkaplastar sa hilo, dili ang pigment, ang nakahatag ug sinaw, asul kaayong kolor. Ang kadaghanang selula morag asul tan-awon. Pero kon tan-awon sa laing mga anggulo, kini kolor green, pink, o yellow tungod sa mga hilo nga wala kaayo magkatungod. Dugang pa, kon tan-awon kinig maayo, ang mga kolor nagpat-ak-pat-ak nga pormag gagmayng square, o pixelated, sama nianang mga kolor sa eskrin sa computer.

Kay walay pigment ang Pollia berry, asul gihapon nig kolor bisan pag mapulak o mangahulog na. Gani, ang ubang bunga nga mga usa ka gatos ka tuig nang natago pareho gihapog kolor sa bag-ong pupo nga bunga! Sumala pa sa mga researcher, bisag ang bunga walay unod kay puro lang ni liso, ang mga langgam madani gihapon sa pagduol niini.

Ang mga siyentista nagtuo nga ang walay pigment nga kolor sa Pollia berry masundog sa paghimog produkto sama sa mga pangtina nga dili mapughaw ug mga papel nga dili mapeke.

Unsay imong hunahuna? Ang asul kaayong kolor sa Pollia berry mitungha lang ba pinaagig ebolusyon? O kini ba gidisenyo?