MAKAYA NIMO ANG STRESS
Posible ang Kinabuhi nga Walay Stress
Ang kaalam gikan sa Bibliya makatabang nato nga malikayan ang sobra ug wala kinahanglana nga stress. Dili gyod nato kayang wagtangon ang tanang butang nga makapa-stress nato. Pero mahimo nâ sa atong Maglalalang. Gani, naa siyay gitudlo nga motabang nato, si Jesu-Kristo. Sa umaabot, himoon niya sa tibuok kalibotan ang labaw pa kay sa iyang gihimo niadtong dinhi siya sa yuta. Pananglitan:
AYOHON NI JESUS ANG MASAKITON, SAMA SA IYANG GIHIMO KANIADTO.
“Ilang gidala kaniya ang tanang nag-antos sa lainlaing sakit . . . , ug iyang giayo sila.”—MATEO 4:24.
HATAGAN NI JESUS UG BALAY UG PAGKAON ANG TANAN.
“Magtukod silag [mga sakop sa Kristo] mga balay ug magpuyo niini, ug magtanom silag mga ubasan ug magkaon sa bunga niini. Dili sila magtukod aron puy-an lang sa lain, ug dili sila magtanom aron kaonon lang sa lain.”—ISAIAS 65:21, 22.
ANG PAGMANDO NI JESUS MORESULTAG KALINAW UG KASEGUROHAN SA TIBUOK YUTA.
“Sa iyang mga adlaw molambo ang matarong, ug ang pakigdait modagaya hangtod nga ang bulan mahanaw na. Duna unya siyay mga sakop gikan sa usa ka dagat ngadto sa laing dagat ug gikan sa Suba hangtod sa mga kinatumyan sa yuta. . . . Ang iyang mga kaaway motila sa abog.”—SALMO 72:7-9.
WAGTANGON NI JESUS ANG INHUSTISYA.
“Maluoy siya sa timawa ug sa kabos, ug luwason niya ang kinabuhi sa mga kabos. Luwason niya sila gikan sa pagdaogdaog ug kapintasan.”—SALMO 72:13, 14.
WAGTANGON NI JESUS BISAN ANG PAG-ANTOS UG KAMATAYON.
“Ang kamatayon mawala na, ug wala na unyay pagbangotan, pagtiyabaw, ug kasakit.”—PINADAYAG 21:4.